Deuteronomi 31

Joshua Cu Moses Changtu Ah A Ser

1Cucaah hi bia cu Moses nih Israel mi vialte kha a va chimh hna. 2Cun amah nih annih sinah, “Atu cu kum za le kum kul ka si cang; ka chuak kho in ka lut kho ti lo. Bawipa nih ka sinah, ‘Hi Jordan tiva hi na tan lai lo,’ tiah a ka ti cang. * 3 Bawipa nan Pathian cu amah hrimhrim nan hmaiah a kal lai; hi miphun hna cu nan hmaiah a hrawh hna lai, cucaah nan pawnchuah hna lai; Joshua nih hmai an sak hna lai, Bawipa nih a chim bang khan. 4Cun Bawipa nih Amor mi siangpahrang Sihon le Og a hrawh hna tikah an ram cungah a tuah bang khan an cungah a tuah ve lai. * 5 Bawipa nih annih cu an pek hna lai i, kan pekmi hna nawlbia vialte bantuk khan an cungah nan tuah lai. 6Ṭhawng u law, nan ral ṭha ko u, ṭih hlah u, an hmaiah therphang hlah u; zeicahtiah nanmah he a kalmi cu Bawipa nan Pathian a si; an deuh hna lai lo i an hlaw fawn hna lai lo,” a ti.

7Cun Moses nih Joshua cu a kawh i Israel mi vialte hna hmaiah a sinah, “Ṭhawng law, ralṭha in um tuah, zeitintiah Bawipa nih annih kha pek awkin an pupa hna sinah chiat a rak sermi ram chungah khan, hi mi hna he hin na kal lai i, annih cu na coter hna lai. 8Na hmaiah a kalmi cu Bawipa a si; na sinah a um lai i an deuh lai lo i an hlaw fawn lai lo; ṭih hlah, na lung zong dong hlah,” tiah a ti. *

9Cun Moses nih hi phungbia cu a ṭial i Bawipa biakamnak kuang a putu Levi fapa tlangbawi hna sin le Israel mi upa vialte hna sinah a pek. 10Cun Moses nih annih cu, “Kum sarih kum, ngaihthiamnak kum kip chung i caan chiahmi, deu puai ah, * 11 Bawipa nan Pathian nih a thim laimi hmun ah Israel mi vialte nih a hmai i chuah awkah an rat tikah, hi phungbia cu Israel mi vialte hmaiah an theih ah nan rel lai. 12Mizapi cu, pa, nu, ngakchia le nan khua chung khual hna cu, annih nih an theih i Bawipa nan Pathian ṭih kha an thiam i hi phungbia chung bia vialte kha ṭha tein an tuah nakhnga le, 13hi a hngal rih lomi nan fale zong nih, va co awkah Jordan tiva nan tanhnawhmi ram chungah nan um chung paohpaoh, Bawipa nan Pathian ṭih kha an thiam nakhnga, pum hna u,” tiah nawl a pek hna.

14Cun Bawipa nih Moses sinah, “Zohhmanh, na thihnak caan a nai cang; Joshua kha ko law tonnak thlam chungah ratpi tuah, amah cu rian ka pek nakhnga,” tiah a ti. Cun Moses le Joshua cu an kal i tonnak thlam chungah cun an va lut. 15Cun thlam chungah cun Bawipa cu minmei tung in a lang i minmei tung cu thlam ka ah cun a dir.

16Cun Bawipa nih Moses sinah, “Zohhmanh, na pupa hna sinah na it dengmang cang; khi tikah hi mi hna hi an tho lai i, an va umnak dingmi hna lakah cun cu ram pathian hna sinah cun hlawh an hlang lai i, an ka hlawt lai i, anmah he ka biakamnak ka sermi kha an buar lai. 17Cun ka thinhunnak cu khi ni ah an cungah a alh lai i ka hlawt hna lai i ka hmai ka thuhkanh hna lai i, an lotlau dih lai i; ṭhat lonak le harnak tampi nih a tlunh hna lai i cucaah annih nih khi ni ah, ‘Hi ṭhat lonak kan cungah an tlun hi, kan Pathian kan sinah a um lo caah a si lo maw?’ tiah an ti lai. 18Ṭhat lonak an tuahmi vialte ruangah, pathian dang hna leiah an i mer caah, khi ni ah ka hmai cu ka thuh hrimhrim lai. 19Cucaah hi hla hi ṭial law, Israel mi kha cawnpiak hna; hi hla cu Israel mi hna kongah keimah ka biahngaltu a si nakhnga, an kaa chungah chia tuah. 20Zeitintiah an pupa hna sinah pek awkin chiat ka sermi ram, cawhnuk le khuaihliti in a luangmi chungah ka luhpi hna i, khika ah annih nih an ei i an khim i an thau tikah, pathian dang leiah an i mer lai i an biak hna lai i an ka sersat lai i ka biakamnak kha an buar lai. 21Cun ṭhat lonak le harnak tampi an cungah a tlun tikah, hi hla nih hin hmaitonh in a chimtu hna biahngaltu a si lai zeitintiah an tefa hna kaa chungah khan philh lo awkin a nung lai. Pek awkah chiat ka sermi ram chungah ka luhpi hna hlan hmanh ah khan, an tumtahmi cu zeidah a si lai ti kha ka hngalh cang,” tiah a ti. 22Cucaah hi hla cu Moses nih cu ni ah cun a phuah i Israel mi kha a cawnpiak hna.

23Cun Bawipa nih Nun fapa Joshua kha rian a pek i, “Ṭhawng law, na ral ṭha tuah; zeitintiah Israel fale hna cu annih pek awkah chiat ka sermi ram chungah na luhpi hna lai; nangmah sinah ka um lai,” tiah a ti. *

24Cun Moses nih hi nawlbia chung bia vialte cu tling cikcek in cauk chungah a ṭial dih hnuah, 25Moses nih Bawipa biakamnak kuang a zawntu Levi mi hna kha nawl a pek hna i. 26“Hi phungbia cauk hi la u law, Bawipa nan Pathian biakamnak kuang pawngah khan va chia tuah u, nanmah kong ah biahngaltu a si nakhnga. 27Zeitintiah zeitluk in dah ralchanh hmang le milungkhong nan si kha ka hngalh. Zohhmanh u, nannih sin i ka nun lio hmanh ah nihin ah Bawipa cu nan ralchanh; zeitluk in dik ka thih hnuah nan hei ralchanh chinchin lai! 28Nan phun upa vialte hna le nan bawi hna cu, an hna chungah hi bia hi ka chimh hna i annih kong biahngaltu ah van le vawlei kha ka kawh hna nakhnga, ka sinah pum tuah hna u. 29Zeitintiah ka thih hnuah cun thil ṭhalo kha nan tuah hrimhrim lai i nawl kan pekmi hna lam khan nan pial lai tiah ka hngalh ko; cun Bawipa mithmuh ah ṭhat lonak nan tuah i nan kut rianṭuannak in a thin nan hunter caah, hmailei ah ṭhat lonak nih an tlunhnawh hna lai,” tiah a ti.

Moses Hla

30Cun Moses nih Israel mi aa pummi vialte hna cu an hna chungah hi hla bia hi a dongh tiangin a chimh hna:

⇑

[Remove Footnotes]