Deuteronomi 34

Moses Thihnak Kong

1Cun Moses cu Moab nelrawn in Jeriko zawn i a ummi Nebo tlang, Pisgah tlangpar ah cun, a hung kai. Cun Bawipa nih ram vialte cu a hmuhsak, Gilead ram cu Dan tiangin, 2Naftali a dihlak, Efraim le Manasseh ram, Judah ram vialte Nitlaklei Rili tiangin, 3Negeb ram, cun Nelrawn — ungkung khua Jeriko nelrawn timi cu — Zoar tiangin. 4Cun Bawipa nih a chawnh i, “Mah hi ram hi Abraham, Isak le Jakob sinah, ‘Nan tefa hna sinah ka pek lai,’ tiin chiat ka sermi ram a si. Na mit cun kan hmuhter, sihmanhsehlaw khika ah cun na kal lai lo,” tiah a ti. * 5Cu bangin Bawipa sal Moses cu Bawipa bia ningin Moab ram chungah a thi i, 6Bethpeor ral, Moab ram chung nelrawn ah Bawipa nih a vui; sihmanhsehlaw a vuinak hmun cu nihin ni tiang ahohmanh nih an hngal lo. 7Moses cu a thih ah, kum za le kum kul a si; a mit a mui lo i a thazang zong a ṭum lo. 8Cun Israel mi nih Moses cu Moab nelrawn ah ni sawm thum an ṭah; cun Moses an ṭahnak ni hna cu a dong.

9Cun Nun fapa Joshua cu, Moses nih a cungah a kut a chuan caah, fimnak thlarau in a khat; cucaah Israel mi nih a bia an ngaih i Bawipa nih Moses nawl a pek bang khan an tuah. 10Cun cu thawk in Israel mi chungah Bawipa nih hmaitonh in a hngalhmi profet Moses bantuk an chuak ti lo. * 11Izipt ram chung i Faro le a sal vialte hna le a ram dihlak cungah, hmelchunhnak le khuaruahharnak, Bawipa nih Moses a tuahtermi bantuk le 12a ṭhawngmi lianngannak le a ngan i ṭih a nungmi thil Moses nih Israel mi hna hmaiah, a tuahmi bantuk a tuah khotu kha midang ahohmanh an um ti lo.

⇑

[Remove Footnotes]