ESTHER

Esther

Biahmaiṭhi

Esther cauk hi Judah mi minu pakhat a min Esther a simi nih a miphun a khamh hnanak kong a si. Hi cauk nih hin zeicahdah Judah mi nih Purim timi puai kha an tuah tinak kong a sullam a langhter.

Tlangpi Hna
Esther kha siangpahrangnu a cang 1.12.23
Haman nih ṭhat lonak khua a khan 3.15.14
Haman cu thahnak a huah 6.17.10
Judah mi nih an ral an tei hna 8.110.3

Esther 1

Siangpahrangnu Vashti Nih Siangpahrang Ahasuerus Kha Zei Ah A Rel Lo

1Ahasuerus chan, India ram in Ethiopia ram tiang, ram za khat le ram kul le ram sarih a uktu Ahasuerus chan ah khan, * 2Siangpahrang Ahasuerus cu a khuapi bik Susa khua i a bawiṭhutdan cungah khan a ṭhu i, 3a bawinak kum thum kum ah khan a bawi vialte hna le a sinum hna caah puai a tuah i Persia le Media ralbawi hna le ram uktu bawi hna le tuavon hna kha a hmaiah cun an um i 4a siangpahrang sunparnak chawhlawn le a lianhngannak sunlawinak le upatnak kha ni saupi, ni za khat le ni sawm riat chung a hmuhsak hna. 5Cun hi ni hna an dih tikah Susa khuapi chung i a ummi mi vialte hna caah, a ngan he a hme he, rawl danghnak pakhat, ni sarih chung, siangpahrang inn dum chung tual ah cun a serpiak hna. 6Laa in tahmi puanzar a rangmi le puanzar aa thlaimi a dummi hna cu la hmangṭhia in le a senduk in a senmi la in lungrang tung i ngunkual ah khan an ṭem chih hna; cun lung hak le lung rang le lungvar le lung mansung in a mui an sermi ṭuang ah cun sui ṭhutdan le ngun ṭhutdan kha an chiah hna. 7Cun zu cu sui hrai a phunphun khan an ser hna i siangpahrang nih a ngeihmi a tam rup khan an pek huahmah hna. 8Cun zu din cu a phung ning tein a si, ahohmanh hnek a um lo; zeicahtiah siangpahrang nih cun a siangpahrang inn bawi pawl kha nawl a pek hna i mi nih anmah duhning cio ah nan tuah lai, tiah a ti hna. 9Siangpahrangnu Vashti zong nih khan Siangpahrang Ahasuerus ta a simi siangpahrang inn chungah khan nu caah rawl danghnak a tuah ve.

10A ni sarihnak ni, siangpahrang cu zu nih a lung a lawmhter ni ah cun, inn zohkhenhtu a simi hna tildit pasarih Mehuman, Biztha, Harbona, Bigtha le Abagtha, Zethar le Karkas hna cu nawl a pek hna i 11Siangpahrangnu Vashti cu midawh ngai a si caah aa dawhnak cu mizapi hna le bawi hna kha hmuhsak awkah a bawi luchin he siangpahrang hmaiah cun ra chuak seh, tiah a ti hna. 12Sihmanhsehlaw tildit pawl nih siangpahrang nawlbia an hei lanhpimi cu Siangpahrangnu Vashti nih khan a rak al i a chuak duh lo. Hi ruangah hin siangpahrang cu a thin a hung a thinhunnak cu a chungah a kangh in a kang.

13Cun siangpahrang nih khan caan a hngalthiammi mifim kha a thawh hna i, cu hna cu 14amah a hun changtu Persia le Media mi hna i an bawi pasarih, siangpahrang hmai a hmu tawnmi le a pennak chungah bawi bikbik a simi Karshena, Shethar, Admatha, Tarshish, Meres, Marsena le Memukan an si, cu hna cu phungbia le biaceihnak ah a thiam ngaingaimi hna a ti tawn hna ning khan a thawh hna i, 15“Siangpahrangnu Vashti nih Siangpahrang Ahasuerus nawlbia, tildit pawl nih an chimhmi cu a tuah duh lo caah, a phung bantukin a cungah zeidah tuah a si lai?” tiah a ti hna. 16Cun Siangpahrang le bawi pawl hmaiah cun Memukan nih a thawh i, “Siangpahrangnu Vashti nih hin Siangpahrang cung lawngah palhnak a tuah a si lo, Siangpahrang Ahasuerus ram chung i a ummi bawi vialte hna le mi vialte hna cung zongah khan a tuah a si. 17Zeicahtiah siangpahrangnu nih a tuahmi hi nu vialte nih an hngalh ve lai i, ‘Siangpahrang Ahasuerus nih Siangpahrangnu Vashti cu a hmai i chuah awkah nawl a pek i a chuak duh lo,’ an ti lai caah an vale kha an serhsat hna lai. 18Nihin hrimhrim ah hin, siangpahrangnu umtuning a theimi Persia le Media ram minu hna nih cu kong cu siangpahrang bawi pawl kha an chimh cang hna lai i serhsatnak le thinhunnak tampi a um ko cang lai. 19Siangpahrang nih na duhnak a si ahcun, Vashti hi siangpahrang hmaiah chuak ti hlah seh, tiin, nangmah sinin siangpahrang nawlbia pakhat chuahter law, thlen ṭhan a si nakhnga lo Persia le Media nawlbia hna chungah ṭial si ve seh; cun siangpahrangnu sinak cu amah nakin a ṭha deuhmi sinah siangpahrang nih pe ko seh, 20cun siangpahrang nih na sermi nawl cu a kau ngaingaimi na ram chungah hin thanh a si tikah nu vialte nih an vale hna cu a sang he a niam he upatnak an pek hna lai,” tiah a ti. 21Hi ruahnak cheuhmi nih hin siangpahrang le a bawi hna cu an lung a ton hna i Memukan nih a chim bantuk cun siangpahrang nih a tuah. 22Siangpahrang ram chung vialte ah khan, ram kip ah khan anmahle an holh cio le miphun kip sinah khan anmah le an ca cio in, pa paohpaoh cu amahle a innchung ah cun bawi a si lai i a miphun holh khan holh a si lai, tiin ca a kuat hna.

⇑

[Remove Footnotes]