EXODUS

Exodus

Biahmaiṭhi

Exodus (Ek-so-das) ti hi a sullam cu ‘chuah’ ti a si i Izipt ram ah sal i an tannak in Israel mi an chuahnak kong kha a si. Hi an chuahnak hi Israel miphun tuanbia ah biapi bik a si. Hi cauk hi cheu thum ah cheu khawh a si:

1. Izipt ram in an chuah i Sinai Tlang an phak tiang.

2. Sinai Tlang ah Pathian nih annih he biakamnak a tuah i ziaza lei le uknak lei le biaknak leiah nawlbia a pek hna.

3. Israel mi caah biaknak inn nan ser lai ti le tlangbawi hna zulh awk phung le Pathian biaknak ca phung kha an si.

Hi cauk nih biapi bik ah a chiahmi cu Pathian nih a mi hna kha sal cannak chungin a chuah hna tikah zeidah a tuah ti le hmailei caan ah ruahchannak ngeimi miphun ah a ser hna tinak kong hi a si.

Hi cauk chungah hin a biapi bik mipa cu Moses kha a si. Moses cu Pathian nih Izipt ram in a mi hna a hruaitu caah khan a thimmi a si. Hi cauk chungah hin hngalh bikmi hmun cu Nawlbia Pahra umnak hmun kha a si.

Tlangpi Hna
Israel mi cu Izipt ram in an luat 1.115.21
     a. Izipt ram ah sal an si 1.1-22
     b. Moses chuahnak le no lio 2.14.31
     c. Moses le Aaron nih Izipt siangpahrang an nawl 5.111.10
     d. Lanhtak Puai le Izipt in an chuahnak 12.115.21
Rili Sen in Sinai Tlang tiang 15.2218.27
Nawlbia le biakamnak 19.124.18
Biakamnak thlam le biak ningcang cawnpiaknak 25.140.38

Exodus 1

Israel Mi Izipt Ram Ah Sal An Si

(Gen 46.8-27)

1Hi hna hi Jakob fapa, an pa sinah Izipt ram i an innchungkhar cio he a vung kalmi hna an min kha a si: * 2Reuben, Simeon, Levi, Judah, 3Issakhar, Zebulun, Benjamin, 4Dan, Naftali, Gad le Asher. 5Jakob tefa hrimhrim kha sawm sarih an si. Josef cu Izipt ram ah khan a rak um cang. 6Josef le a unau pawl vialte cu an thi dih, cu chanmi cu an dihlak in an thi dih. 7Asinain Israel mi nih cun fa tampi an ngeih hna i an tam tuk i an ṭhan tuk hringhran caah cu ram cu an khat dih. *

8Siangpahrang thar, Josef a hngal lomi kha Izipt ram ah khan a hung bawi. * 9A mi kha a thawh hna i, “Israel mi hna hi zohhmanh hna u, an tam tuk i an ṭhawn tuk cang caah hin thinphang kan si. 10An tam chin lengmang ti nakhnga lo an cungah fim ngaiin kan ṭuan a hau lai. Ral a thawh sual ahcun kan ral hna sin tu ah khan an i ṭawm lai i kanmah kha an kan doh lai i kan ram hin an chuak lai,” a ti hna. * 11Cucaah sal uktu bawi kha an cungah an chiah hna i rian fak ṭuan kha hnek rumro in an hnek hna, Israel mi nih cun rawl khonnak khua Pithom le Rameses kha Faro caah cun an sak. 12Sihmanhsehlaw Izipt mi nih Israel mi cu fak deuh in an hrem hna paoh ah tam deuh in an karh i kau deuh ah an i ṭhek. Izipt mi nih cun Israel mi cu an huat hna i an ṭih hna; 13sal hremnak a fakmi chungah khan an khumh hna i 14tlakser rian le tlakrawh rian le rian har phun zakip kha an ṭuanter hna i cuticun rethei ngaingai in an chiah hna. Rian har phun zakip kha rumro in an hnek hna.

15Cun Izipt siangpahrang nih khan, Israel nu pawl nau an hrin tikah a bawmtu hna sayamah pahnih, an min Shifrah le Puah a simi kha a thawh hna i, 16“Hebru nu pawl kha fa nan ngeihter hna tikah, pa an si ahcun nan thah hna lai i nu an si ahcun nan nunh hna lai,” tiah a ti hna. 17Sihmanhsehlaw nau hrintertu sayamah hna nih cun Pathian kha an ṭih caah siangpahrang nawl kha an zul lo i pa zong kha an nunh hna. 18Siangpahrang nih khan sayamah cu a kawh hna i, “Zeicahdah hi bantukin nan tuah i pa ngakchia kha nan nunh hna?” a ti. 19Annih nih, “Hebru nu pawl cu Izipt nu bantuk an si lo, fa hrin kha an i fawih ngaite i sayamah kan va phak tikah hin cun an fale cu an rak chuak diam cang tawn caah a si,” tiah an leh. 20Pathian cu sayamah hna cungah cun a ṭha i Israel mi cu an karh chin lengmang i an ṭhawng chin lengmang. 21Sayamah hna nih khan Pathian kha an ṭih caah Pathian nih annih cu tefa a pek hna. 22Cu tikah Faro nih a mi vialte kha nawl a pek hna i, “Hebru mi nih fa an hrinmi pa paohpaoh cu tiva ah nan hlonh dih hna lai, nu lawnglawng kha nan nunh hna lai,” tiah a ti hna. *

⇑

[Remove Footnotes]