Exodus 38

Biakṭheng

(Exo 27.1-8)

1Khanghthawinak ca biakṭheng cu anri thing in a ser. Tungvangpalh a si, pe sarih le a cheu a sau i pe sarih le a cheu a kau, cun pe li le a cheu a sang. 2A kil pali ah khan ki pali a bunh hna i cu ki pali hna cu a pum he khan an i peh dih. A dihlak in dar in a tuam. 3Biakṭheng ca thilri, um, cawhlek, khengkuar, sio le mei zawhnak pakan kha a ser hna. A thilri vialte cu an dihlak in dar in a ser hna. 4Biakṭheng caah cun fingrilh pakhat a ser i cu fingrilh cu dar fingrilh a si. Cu fingrilh cu a tlang tangah khan a chiah i biakṭheng canceo cu a hun phak. 5Cun a zawnhnak kual pali a ser hna i dar fingrilh kil pali ah cun lang hrolhnak ding caah khan a thlaih hna. 6Lang cu anri thing in a ser hna i dar in a tuam hna. 7Cun biakṭheng kap i aa thlaihmi kual ah khan a hrolh hna. Biakṭheng cu thing phel in a ser i a chung cu a kua.

Kut Ṭawlnak Kheng

(Exo 30.18)

8Kut ṭawlnak dar kheng le a hunnak dar tawdanh cu nu pawl bihnak thlalang in a ser hna, cu nu pawl cu pumhnak thlam luhnak i rian a ṭuanmi kha an si.

Puan Biakinn Tual

(Exo 27.9-19)

9Tual kha a ser. Thlanglei kam ca puanzar cu khumlahrual hmangṭhia in tahmi a si i pe za le sawm nga a sau. 10Tung pakul hna le an dirnak kedanh pakul hna cu dar in sermi an si. Cu tung sio hna zong cu dar in sermi an si; cun cu tung nih cun ngun fung an ngei cio. 11Chaklei kamah puanzar cu pe za le sawm nga a sau i tung pakul nih an doh, cu tung pakul hna cu dar kedanh pakul chungah khan an dir i sio an ngei cio i ngun fung zong an ngei cio. 12Nitlaklei kamah puanzar cu pe sawm sarih le pe nga a sau i tung pahra nih an doh, cu tung pahra hna cu dar kedanh pahra chungah khan an dir i sio an ngei cio i ngun fung zong an ngei cio. 13A nichuahlei kam cu pe sawm sarih le pe nga a kau. 14A chung i vung luhnak khattelei kamah khan puanzar an um i pe kul le pe hnih le a cheu an kau i tung pathum kedanh chung i a dirmi nih khan an doh hna. 15Khattelei kap zongah cun cu bantuk ṭhiamṭhiam cun a um; cucaah tual i vung luhnak kutka ah khan a kap hnih in puanzar pe kul le pe hnih le a cheu a kau i kedanh pathum chungah a dirmi tung pathum nih an dohmi kha an um veve. 16Tual velchum i an hmanmi puanzar cu khumla hrual hmang ṭhia in tahmi an si. 17Tung kedanh cu dar in an ser hna i tung ca i sio hna le an fung hna le an par khuhnak cu ngun in sermi an si. Tual kulhnak tung vialte cu ngun fung in peh dih an si. 18Tual luhnak kutka ca puanzar cu dawh tein ṭamhmi a si i tuuhmul a dum, a sendung le a sen le khumlahrual hmang ṭhia in tahmi an si. Pe sawm thum a sau i pe sarih le a cheu a sang i tual kulhnak puanzar bantuk kha a si. 19Dar kedanh pali chungah a dirmi tung pali nih an doh hna. An sio le an par tuamnak le an fung cu ngun in sermi an si. 20Pathian umnak thlam le a velchum i a ummi a tual khenhnak fung cu dar in sermi an si.

Biakinn Ca Hmanmi Thilri

21Biakamnak lungtlap an chiahnak Pathian umnak thlam chung hmanmi thilri cu hihi a si: Cu thilri hna cu Moses nih a fial hna ningin tuahmi an si i tlangbawi Aaron fapa Ithamar kuttang i a ṭuanmi Levi mi hna nih an sermi an si.

22 Bawipa nih Moses a fialmi vialte kha Judah phun chungmi Hur fapa Uri fapa Bezalel nih khan a tuah dih hna. 23Amah a bawmtu Dan phun chung mi Ahisamak fapa Oholiab kha lung ṭial thiam, pungsan suai thiam le tuuhmul a dum, sendung, a sen le khumla hmangṭhia tah thiam a si.

24Biakinn chung hmanmi sui cu a dihlak in pawng thong hnih za le sawm kua panga a si. Bawipa sinah pekchanhmi biakinn cuaithlainak in thlaimi an si. 25An milu relning in thawhmi ngun cu pawng thong sarih, za nga sawm nga a si, cu zong cu biakinn cuaithlainak in thlaimi ṭhiamṭhiam an si. * 26Milu relnak ah relmi nih an thawh awk hnga a simi ning cio ah an thawhmi cu hi zat hi a si i biakinn cuaithlainak in thlaimi an si. Milu relnak ah cun, pa kum kul ri in a cunglei cu thong za ruk le thong thum, za nga le sawm nga an si. * 27Ngun chungin pawng thong sarih le za nga cu biakinn tungdanh le puanzar kedanh hna sernak ah khan hman an si: kedanh za khat an si i kedanh pakhat ah pawng sawm sarih panga cio a si. 28A taang rihmi ngun pawng sawm nga cu tung, sio hna le an par khuhnak hna le an fung hna kha sernak ah khan Bezalel nih a hman. 29 Bawipa sin pekmi dar cu pawng sing thum le pahra a phan. 30Cu dar cun pumhnak thlam luhnak innka tungdanh hna le dar biakṭheng le a dar fingrilh le biakṭheng ca thilri vialte le 31a velchum i a ummi tual kulhnak tungdanh hna le tual luhnak kutka tung danh hna le Pathian umnak thlam le a velchum tual ca fungkhenh vialte kha a ser hna.

⇑

[Remove Footnotes]