EZRA

Ezra

Biahmaiṭhi

Ezra cauk hi Chanrelnak cauk peh kha a si i Judah mi Babilon in an kirnak kong kha a chim. A chimning cu hitihin a si:

1. Persia siangpahrang Sairas nawl peknak thawngin Judah mi tlawmpal cu Babilon i sal i an tannak khan an ram ah an kir.

2. Biakinn kha an remh i Pathian sinah an pek i Pathian biaknak caah an hman ṭhan.

3. Kum tam nawn hnuah khin Ezra hao in Judah mi cu Babilon in Jerusalem ah khan an kir ṭhan i Israel miphun an thlarau ro kha an thlau nakhnga lo Ezra nih cun fak piin a bawmh hna i a cawnpiak hna. Ezra cu Pathian Nawlbia a thiam ngaingaimi a si.

Tlangpi Hna
Sal tannak in a kir hmasa bik phu 1.12.70
Biakinn an remh ṭhan i an pekchanh 3.16.22
Ezra kha saltang dang he an kir 7.110.44

Ezra 1

Sairas Thawngthanhnak

(2Cha 36.22-23)

1Persia siangpahrang Sairas a bawi kum khatnak ah, Jeremiah kaa in Bawipa nih a chimmi bia kha a tlin nakhnga, Persia siangpahrang Sairas lungthin cu Bawipa nih a thawhter i cucaah a ram dihlak ah khan thawngthanhnak a tuah i ca zongin a ṭial: *

2“Hi bangin Persia siangpahrang Sairas nih a ti: Bawipa, vancung Pathian nih vawleicung ram vialte hi a ka pek dih cang i Judah ram i a ummi Jerusalem khua ah amah caah inn sak awk a ka fial. * 3Nannih amah mi vialte hna, nan sin i a ummi paoh cu a sinah a Pathian kha um seh law, Judah ram i a ummi Jerusalem khua ah cun hung kal seh, cun Bawipa, Israel Pathian inn cu hung sa seh — amah cu Jerusalem i a ummi Pathian cu a si; 4cun a nung rihmi paohpaoh cu, khuazei ka i a um a si hmanh ah, a umnak mi hna nih cun ngun le sui le thilri le saṭil in, Pathian inn Jerusalem i a ummi ca i mah lungtho tein pekmi lengah khan, rak bawm hna seh,” a ti.

Saltangmi Jerusalem Ah An Kir

5Khi tikah Judah phun le Benjamin phun chung i pale innchungkhar lu cio a simi hna le tlangbawi hna le Levi mi hna, Bawipa inn Jerusalem i a ummi sak ṭhan awkah Pathian nih an lungthin a canghtermi vialte kha an tho i, 6an pawngkam i a ummi vialte hna nih khan ngun umkheng le sui le thilri le saṭil le a man a fakmi thilri khan, mah lungtho tein thawhmi thil ri lengah khan an bawmh hna. 7Nebukhadnezzar nih Jerusalem i a rak kalpi i a pathian hna inn chungah a rak chiahmi Bawipa inn umkheng hna zong kha Sairas siangpahrang nih cun a chuah hna. 8Cu thil hna cu Persia siangpahrang Sairas nih cun, a rak kengtu Mithredath kha a chuahter hna i Judah bawi Sheshbazzar kha rel ciammam tein a pek. 9Cun hi vial hi an si: sui hmaihum sawm thum, ngun hmaihum thong khat, zihmui kheng kul le pakua, 10sui khengkuar sawm thum, ngun khengkuar za li le pahra, le umkheng dangdang thong khat an si; 11sui umkheng le ngun umkheng vialte cu a dihlak ah thong nga, za li an si. Saltangmi hna cu Babilonia in Jerusalem ah hunpi an si tikah hi thil vialte hna hi Shesh-bazzar nih a hun ken hna.

⇑

[Remove Footnotes]