GENESIS

Genesis

Biahmaiṭhi

Genesis (Zenesis) ti hi a sullam cu ‘hramthawknak’ ti a si. Genesis cauk nih hin Pathian nih van le vawlei vialte a ser hnanak kong le minung thawhkehnak le vawlei cungah sualnak le nganfahnak an i hramthawknak le Pathian nih zeitindah minung cungah rian a ṭuan tinak kong kha a chim. Genesis hi ṭhen hnih ah ṭhen khawh a si:

1. Angan 1 in 11 tiang. Hi chungah hin vawlei sernak kong le minung phun kong kan hmuh. Hi chungah hin Adam le Evi kong tehna, Kain le Abel kong tehna, Noah le buanchukcho kong tehna le Babel (Babilon) Innsang kong tehna kha an um.

2. Angan 12 in 50 tiang. Hi chungah hin Israel mi a hringsortu hna tuanbia kha kan hmuh. A hmasa bik cu Abraham a si i amah cu Pathian a zumhnak le aa bochannak ah minthang a si. Cun amah a hun zultu ah cun a fapa Isak le Isak fapa Jakob, Israel ti zongah timipa kong kha a si. Cun Jakob fapa hleihnih, Israel miphun hleihnih a hringsortu hna kha an si. Cu dih cun cu hna lak i Josef kong kha tam khun in a hung um i amah chan ah cun Israel le a tefa vialte kha Izipt ram ah khan an pem.

Hi cauk nih hin a chimmi cu minung kong si hmanh seh law aa tinh bikmi cu Pathian nih rian a ṭuannak kong a si. Pathian nih zeizong vialte a ser dih hnanak kong khan aa thawk i Pathian nih a mi hna cu an zawn a ruah zungzal hna lai ti biakamnak in a dong. Hi cauk chungah hin a hramthawk in a donghnak tiang a biapi bikmi cu Pathian a si, Pathian nih ṭhat lonak a tuahmi hna an bia a ceih hna i dan a tatnak hna kong le a mi a hruainak hna kong le a bawmhnak hna le an tuanbia a sersiamning kha kan hmuh. Hi cauk hi hlan lio pi i a rak ummi miphun pakhat an zumhnak kong le cu zumhnak cu zeitindah a nun tinak kong cinken zungzalnak ding caah a si.

Tlangpi Hna
Van le vawlei le minung sernak 1.12.25
Sualnak le temhinnak hramthawknak 3.1-24
Adam in Noah tiang 4.15.32
Noah le buanchukcho 6.110.32
Babel Innsang 11.1-9
Shem in Abram tiang 11.10-32
Hringsortu hna:
   Abraham, Isak, Jakob 12.135.29
   Esau tefa hna 36.1-43
   Josef le a unau hna 37.145.28
   Israel mi Izipt ram ah 46.150.26

Genesis 1

Sernak Kong

1A hramthawk ah, Pathian nih van le vawlei a ser hna tikah, * 2vawlei cu mui zong a ngei lo, pungsan zong a ngei lo. Rilipi cu muihnak nih a khuh i ti cungah cun Pathian ṭhawnnak * cu aa chawk. 3Cun Pathian nih, “Ceunak um seh,” tiah a ti i ceunak cu a hung um. * 4Ceunak cu a zoh i aa lawm. Cun ceunak le muihnak cu a ṭhen hna i 5ceunak cu “Chun” tiah min a sak i muihnak cu “Zan” tiah a ti. Zanlei cu a hung dih i zinglei kha a hung um — cucu ni khatnak ni cu a si.

6Cun Pathian nih cun, “Ti le ti a ṭhentu hna ding caah aa kuaimi van pakhat in um seh law, ti cu hmun hnih ah um hna seh,” tiah a ti i cu tining cun a hung si. * 7Cuticun Pathian nih cun van kuai cu a ser i a tang i a ummi ti le a cung i a ummi ti cu a ṭhen hna; 8van kuai cu a min ah “Van” a sak. Zanlei cu a hung dih i zinglei kha a hung um, cucu ni hnihnak ni cu a si.

9Cun Pathian nih cun, “Van tang i a ummi ti cu hmun khat ah i pum hna seh law vawlei kha hung lang seh,” tiah nawl a pek i cu bang cun a hung si. 10Vawlei cu a min ah “Vawlei” a sak i a pumhtermi ti cu “Rili” tiah a ti. A tuahmi kha a zoh i a lung a si. 11Cun aa thawh i, “Vawlei cungah hin thingram a phunphun kho hna seh, a tlaimi kung hna le rawl a phunphun thei a phunphun a vuimi rawlkung hna,” tiah a ti i cu bang cun a hung si. 12Cucaah cun vawlei cungah cun thingram a phunphun an kho, rawl a vuimi rawlkung hna le thei a tlaimi thingkung hna an si. Pathian nih a tuahmi cu a zoh i a lung a si. 13Zanlei cu a hung dih i zinglei kha a hung um, cucu ni thumnak ni cu a si.

14Cun Pathian nih cun, “Chun le zan a ṭhentu ding le ni le kum le caan kha zeitik in dah an i thawk cio ti hngalhtertu dingah van ah khin ceunak um hna seh; 15cun cu ceunak hna nih cun vawlei hi ceuh hna seh,” tiah a ti i cu bang cun a hung si. 16Cucaah Pathian nih cun ceunak ngan pipi pahnih hi a ser hna, ni hi chun uktu dingah a ser i thlapa hi zan uktu dingah a ser; arfi zong khi a ser hna; 17ceunak hna cu van ah khin vawlei a run ceuhtu dingah a chiah hna, 18chun le zan a uktu hna ding le ceunak le muihnak a ṭhentu hna dingah a chiah hna. A tuahmi kha a zoh i a lung a si. 19Zanlei cu a hung dih i zinglei kha a hung um, cucu ni linak ni kha a si.

20Cun Pathian nih cun aa thawh i, “Ti nih hin thilnung phun tampi a hrin hna lai i va hi thli lakah hin an zuang lai,” a ti i cu bang cun a hung si.” 21Cuticun Pathian nih cun rili chung i a ummi sahrang ṭihnung pipi le ti lak i a tlongmi thilnung a phunphun le va a phunphun kha a ser hna. A tuahmi kha a zoh i a lung a si. 22Cun thluachuah a pek hna i, “Ti chung i a ummi thilnung hi karh u law rili hi khat u, va hi tampi in karh u,” tiah a ti hna. 23Zanlei cu a dih i zinglei kha a hung um, cucu ni nganak ni a si.

24Cun Pathian nih cun, “Vawlei nih hin inn zuat saṭil a phunphun le ramlak saram a phunphun, a hme he a ngan he, hring hna seh,” a ti i cu bang cun a hung si. 25Cuticun inn zuat saṭil a phunphun le ramlak saram a phunphun a hme he a ngan he a ser hna. A tuahmi kha a zoh i a lung a si.

26Cun Pathian nih cun, “Atu cu minung kan ser cang hna lai; kanmah mui an keng lai i kanmah he kan i lo lai. Nga si hna seh, va si hna seh, inn zuat saṭil si hna seh, ramlak i a ummi saram a hme he a ngan he si hna seh, an uk dih hna lai,” tiah a ti. * 27Cuticun Pathian nih minung cu amah mui lo in a ser, minung cu Pathian mui in a ser hna. Mipa le minu kha a ser hna. * 28Thluachuahnak a pek hna i, “Tefa tampi in ngei u law nan tefa cu vawlei cung khuazakip ah khat hna seh, cun annih nih vawlei cu uk hna seh. Nannih cu nga cung le va cung le ramlak saram a hme he a ngan he an dihlak cung i nawlngeihnak kan pek hna,” a ti. * 29Nan ei awk caah thlai phun kip le thei phun kip kan pek hna; 30Sihmanhsehlaw ramsa vialte hna le va vialte hna le vawlei ah a lawn in a lawnmi vialte nunnak thaw a ngeimi vialte hna caah ram hring le thlaihnah borbor ka pek hna,” a ti i cu bang cun a hung si. 31Pathian nih a sermi thil vialte cu a zoh i a lung a si ngaingai. Zanlei cu a hung dih i zinglei kha a hung um, cucu ni ruknak ni cu a si.

⇑

[Remove Footnotes]