Genesis 19

Sodom Khuami An Sualning

1Zanlei sang ah vancungmi pahnih kha Sodom khua chung i an va luh tikah, Lot cu mi an i ton tawnnak hauka hramah khan a rak ṭhu. A hmuh hna cangka a tho zau i annih kha a rak don hna. An hmaiah cun a kun i, 2“Ka bawipale hna, nan salpa inn ah ra lut tuah u law ka tlung tuah u. Nan ke kha i ṭawl u law tuzan cu riak u. Thaizing ah nan tho lai i nan kal duhnak ah cun nan kal chin te lai,” a ti hna. Sihmanhsehlaw annih nih, “A si lo, khualai ah hin kan riak ko lai,” tiah an leh. 3Sihmanhsehlaw a nawl lengmang hna i a donghnak ah a inn ah cun an kal. Lot nih cun changreu kha a ser i rawl thaw ngai a serpiak hna i annih nih an ei.

4Khual cu an ih hlanah, Sodom khuami pa nih khan inn cu an rak kulh. Khuachung mipa vialte cu a no he a tar he an tling dih. 5Lot cu an vun auh i, “Na inn i a riakmi pahnih hna kha khuazei ah dah an si? Hun chuahter hna law kan rak ihpi hna lai,” an ti. *

6Lot cu lengah a va chuak i innka cu a khar. 7Annih cu a thawh hna i, “Ka duate le, zei kan ti hnga, hi bantuk ṭhat lonak cu tuah sawh hlah u! 8Zohhmanh u, pa a hngal rih lomi fanu ngaknu pahnih ka ngei hna. Annih tu hi rak chuahpi hna ning law nan duh paoh in nan rak tuah hna lai. Sihmanhsehlaw hi khual hi cu zeitin hmanh in ti hna hlah u, ka inn chung i a ummi ka khual an si i ka huhphenh hna hrimhrim awk a si,” a ti.

9Sihmanhsehlaw annih nih an thawh i, “Kan kian, a nang ramdangmi hi i thlak hlah, nangmah nih hin maw cutin tuah u khatin tuah u na hei kan ti. Kan kian, cu lo ahcun anmah nak fak in kan in tongh sual lai,” an ti. Lot cu an en i innka kha baoh awkah an hei fuh. 10Asinain, inn chunglei i a ummi mi pahnih nih khan Lot cu inn chungah khan an hun hnuh i innka cu an khar. 11Cun lenglei i a ummi vialte kha an mit an cawtter hna i cucaah innka kha an hmu kho lo. *

Lot Cu Sodom In A Zaam

12Mi pahnih nih khan Lot cu an thawh i, “Hika ah hin midang na ngei ti hna maw? Na fapa hna le na fanu hna le khua chung i na mi a simi hna paohpaoh kha i chuahpi hna law hika hmun hin chuak u, 13zeicahtiah hi hmun hi kan hrawh cang lai. Hi mi hna an thangchiatnak hi Bawipa nih a theih cang i Sodom khua hi hrawh awkah a kan thlah cang,” an ti. 14Cun Lot cu a va chuak i a fanule a ṭhitu hna ding pawl kha, “Khulrang in hika hmun hi chuahtak u, hi hmun hi Bawipa nih a hrawh lai,” a ti hna. Sihmanhsehlaw aa capo tiah an ruah.

15Khua a hung dei tikah vancungmi nih khan Lot cu an hnawh i, “I hnawh tuah! Na nupi le na fanu pahnih kha i lak hna law chuak u. Cu ti nan chuah ahcun khua a rawh tikah nan thi lai lo,” an ti. 16Asinain Lot cu aa nuainai i sihmanhsehlaw Bawipa nih khan a cungah zaangfahnak kha a ngeih caah, mi nih khan amah cu le a nupi le a fanu pahnih hna cu an kut in an hnuh hna i khua lengah an chuahpi hna i cuka ah cun an kaltak hna. * 17Cun khua chungin an chuahpi dih hna hnuah khan vancungmi pakhat nih cun aa thawh i, “Nan nun nakhnga tli u! Hnulei zoh hlah u, nelrawn chungah dircon hlah u. Tlang ah tli u law nan thi lai lo,” a ti hna. 18Sihmanhsehlaw Lot nih a leh i, “ Bawipa, cucu a si kho lo. 19Zohhmanh, ka cungah zaangfahnak nganpi na tuah cang i ka nunnak na ka khamh hi na ka zaangfah ruangah cun a si ko. Tlang cu an hla tuk i ka phak hlanah rawhnak nih khan a ka cil lai i ka thi lai. 20Cucaah cun khi khua hmete khi na hmu maw? A nai i ka phak khawh lai. Cucaah khika ah khin ka kalter, hmun hmete men a si ko kha na hmuh ko i khika ah ka nunnak kha a him ko lai,” a ti. 21Anih nih aa thawh i, “Cucu ka hna a tla; khi khua cu ka hrawk lai lo. 22I hnawh! A tlik in tli! Khika na phak hlanah cun zeihmanh ka tuah kho lo,” a ti. Lot nih khan cu khua cu khua hmete a ti caah a min ah Zoar sak a si.

Sodom le Gomorrah Rawhnak

23Ni a chuah ah khin Lot cu Zoar a phan ve; 24 Bawipa nih Sodom le Gomorrah cungah cun kat mei kha a surter i * 25 Bawipa nih cun cu khua pahnih hna le cu nelrawn a dihlak le khuapi chung i a ummi vialte hna le ram chung i a khomi thil vialte hna cu a hrawh dih hna. 26Lot nupi cu hnulei aa mer i cite tung ah a cang. *

27A thaizing zingkate ah Abraham cu Bawipa hmai i a dirnak hmun ah khan khulrang in a va kal. 28Sodom le Gomorrah le nelrawn cu a vun cuanh hna i, somei nganpi chung i meikhu a chuah hluahmah bantuk khin, vawlei cun meikhu cu a tho. 29Asinain Pathian nih nelrawn chung ummi khua kha a hrawh hna tikah Abraham kha a philh lo i Lot kha himnak hmun ah a zamter.

Moab Mi Hna le Ammon Mi Hna An Chuahkehnak

30Lot cu Zoar i um kha a ngamh lo caah a fanu pahnih hna he khan tlang ah an i thawn i cuka ah cun lungkua chungah an um. 31A fanu upa deuh nih khan ngakchia deuh cu a thawh i, “Kan pa hi a tar cang i a ningcang in fa kan ngeih khawhnak dingah vawlei cungah hin ahohmanh vat awk pa an um ti lo. 32Cucaah cun, ra law, zu kan ritter lai i kan ihpi lai i amah thawng cun fa kan ngei lai,” a ti. 33Cu zan ah cun zu cu an dinh i a fanu upa deuh nih khan a ihpi, sihmanhsehlaw a rit tuk caah cucu a hngal lo. 34A thaizing ah upa u nih khan ngakchia u cu a thawh i, “Zahan ah khan kan pa cu ka ihpi cang; tu zan ah hin ritter rih u sih law ka tuah bantuk khan nang nih va tuah ve. Cun kan pahnih in kan pa thawngin tefa kan ngei veve lai,” a ti. 35Cucaah cu zan ah cun zu cu an ritter ṭhan i a ngakchia deuh nih khan a ihpi ve. Cu zan zong cu a rit tuk caah cucu a hngal lo. 36Cuticun Lot fanu pahnih hna cu an pa thawngin fa an pawi. 37A upa deuh nih khan fapa a hrin in a min ah Moab a sak. Amah cu atu Moab mi a hringsortu hna hi a si. 38A ngakchia deuh zong nih khan fapa a hrin ve i a min ah Ben-ammi a sak. Amah cu atu Ammon mi a hringsortu hna hi a si.

⇑

[Remove Footnotes]