Genesis 28

1Isak nih Jakob cu a kawh i thluachuah a pek hnuah, “Kanaan mi nu hi cu ṭhi hna hlah. 2I tim law Mesopotamia ram i a ummi na nu pa Bethuel inn ah va kal. Cuka nu pakhatkhat cu vaa ṭhit hna, na pu Laban fanu pakhatkhat kha vaa ṭhit hna. 3Lianngan Bik Pathian nih na nupi ṭhitnak ah cun thluachuah in pe seh law fa tam piin in pe seh law miphun tampi hna pa ah in ser seh. 4Abraham thluachuah a pek bantuk khan nangmah le na tefa hna cu thluachuah in pe hna seh law, atu i na umnak ram, Pathian nih Abraham a pekmi ram hi nangmah ta si seh,” a ti. * 5Isak nih Jakob cu Mesopotamia ram i a ummi Aramean mi Bethuel fapa Laban sinah khan a thlah. Laban cu Jakob le Esau nu Rebekah ṭa kha a si.

Esau Nih Nupi Dang A Ṭhit

6Esau nih Jakob kha Isak nih thluachuahnak a pek i nupi vaa ṭhit awkah Mesopotamia ram ah a kalter ti kha a theih. Cun thluachuah a pek ah khan, Kanaan mi nu na ṭhi lai lo tiah nawl a pek ti zong kha a theih fawn. 7Jakob nih a nu le a pa kha an nawl a ngaih hna i Mesopotamia ram ah a kal cang ti kha a hngalh. 8Cucaah Esau nih, ka pa Isak nih Kanaan mi nu kha a duh hna lo ti kha a hngalh. 9Cucaah cun Abraham fapa Ishmael sinah khan a va kal i nu dang pakhat a va ṭhit, a min cu Mahalath a si, amah cu Ishmael fanu kha a si i Nebaioth far a si.

Bethel Khua I Jakob Mang

10Jakob cu Beer-sheba khan aa thawh i Haran khua leiah cun a kal. 11Hmun pakhat khi a va phan i ni a tlak caah cuka ah cun a riak. A it i chantling ah lung aa tlinh. 12Mang a manh i a mang ah cun hlei pakhat a hmuh i cu hlei cu vawlei in van tiang a phan i cu hlei ah cun Pathian vancungmi kha an kai i an ṭum lengmang. * 13Cun Bawipa nih cun, “Keimah hi Bawipa, Abraham le Isak Pathian kha ka si. Na ihnak ram hi nangmah le na tefa kha kan pek hna lai. * 14Na tefa cu an tam tuk ah vawlei cung leidip zat an si lai. An ram cu nichuahlei he nitlaklei he chaklei he thlanglei he a kau chin lengmang lai i vawlei cung miphun vialte nih na tefa hna thluachuah ka pek hna bantuk hin kan pe ve tiah an ka hal lai. * 15Khuazeika na kalnak hmanh ah kan umpi zungzal lai i kan huhphenh zungzal lai, cucu philh hlah, cun hi ram ah hin kan kirpi ṭhan lai. Kan chimhmi vialte ka tuah dih hlanah cun nangmah cu kan kaltak lai lo,” tiah a ti. 16Jakob cu a hun i hlau i, “ Bawipa cu hika hmun ah hin a um taktak, a hngalh bel ka rak hngal lo i a si,” a ti. 17A thin a phang i, “Hika hmun hi hmun ṭihnung ngai pei a rak si hi! Pathian inn le vancung kutka pei a rak si hi,” a ti.

18Jakob cu zingka tein a tho i aa tlinhmi lung cu philh lonak lung ah a bunh i Pathian sin i pekchanhnak caah chiti a toih. 19Cu hmun cu a min ah Bethel a sak. (Cu hlanah cun cu khua cu a min ah Luz rak ti a si). 20Cun Jakob nih Bawipa Pathian sinah cun chiatser in biakamnak a tuah i, “Atu ka khualtlawnnak ah hin na ka umpi i na ka huhphenh i rawl le hnipuan na ka pek i 21ka pa inn ah him tein ka kir ṭhan ahcun nangmah cu ka Pathian na si lai. 22Philh lonak lung ah ka phunmi lung hi na inn a si lai i na ka pekmi thil vialte cheu hra ah cheu khat kan pek lai,” a ti.

⇑

[Remove Footnotes]