ISAIAH

Isaiah

Biahmaiṭhi

Isaiah cauk hi Jerusalem khua i B.C.700 hrawng i a rak ummi profet ngan pakhat a min Isaiah an timi min zulh in a min sakmi a si. Hi cauk hi ṭhen thum ah ṭhen khawh a si:

1. Dal 1 in 39 tiang. Hi ka chung bia hi Assiria cozah ṭhawngpi nih Judah Pennak doh a zalh lio caan i a chuakmi bia a si. Judah nunnak ah hin ṭih awk taktak a simi cu Assiria ṭhawnnak lawng hi si loin Judah mi an sualnak le Pathian nawl an ngaih lonak le Pathian an i bochan lonak tu kha a si deuh ti hi Isaiah nih a hmuhning a si. Judah mi nih dinnak le biatak chimnak ziaza nan ngeih awk a si ti kha fiang tein a chimh hlei hna ah a pum hrimhrim zongin a hmuhsak hna. Cu ti nan tuah lo ahcun rawhnak le lohtlaunak nih khan an in tlunhnawh hna lai tiah a ti hna. Cun Isaiah nih cun vawlei cung dihlak i daihnak a um ding kong le siangpahrang ṭhatnak tling a ngei laimi David tefa chungin a chuah lainak zong kha a rak chim chung fawn.

2. Dal 40 in 55 tiang. Hi caan hi Judah mi Babilon ah sal i an tan i hnabei dong ngaiin khua an sak lio caan kha a si. Hika Isaiah nih hin Pathian nih a mi cu a luatter dengmang cang hna i inn ah a tlunter dengmang cang hna, ti kha a chim. Hi dal 40 in 55 tiang nih hin, Pathian cu minung tuanbia cung i bawi a sinak kong kha a chim i a mi Israel mi kha miphun vialte sin i ṭuan awk rian a ngeimi an si kha a langhter. Cu mi hna cu Israel mi thawngin thluachuahnak a hmu ding an si. “Bawipa Sal” kong chimnak hmun hna hi Biakam Hlun chung i theihhngalh bikmi biatlang an si.

3. Dal 56 in 66 tiang. Hi ka chung bia hi Jerusalem khua chung i a um ṭhan cangmi hna sin chimmi bia an si bik. Pathian nih a miphun ca i biakamnak a tuahmi kha a tling lai ti kha hngalhter ṭhan le forh ṭhan an hau. Dinnak kong, Sabbath ulhnak kong, raithawinak kong le thlacamnak kong cawnpiaknak kha kan hmuh. Cinken awk a tlakmi bia cu 61.1-2 i kha a si i Jesuh nih rian ṭuan hram aa thawk tikah a hmanmi bia an si.

Tlangpi Hna
Ralrin peknak le biakamnak 1.112.6
Miphun hna dantatnak 13.123.18
Pathian nih vawlei bia a ceih 24.127.13
Ralrin peknak le biakam 28.135.10
Hezekiah le Assiria mi hna 36.139.8
Biakam le ruahchannak 40.155.13
Ralrinnak le biakam 56.166.24

Isaiah 1

1Amoz fapa Isaiah sinah Pathian nih Judah le Jerusalem kongah Judah siangpahrang Uzziah, Jotham, Ahaz le Hezekiah hna chan i a hmuhmi langhnak hna. *

Pathian Nih A Mi Kha A Chimhhrin Hna

2 Bawipa nih aa thawh i, “Van le vawlei hna, Bawipa nih ka chimmi hi ngai tuah u. Ka cawm cia le ka ken cia ka fale nih hin an ka doh. 3Caw nih a ngeitu kha a hngalh i laa nih a bawipa nih rawl a peknak kuang kha a hngalh. Sihmanhsehlaw ka mi Israel mi hna nih cun cu hmanh cu an hngal lo. A hngalh in an hngalthiam hrimhrim lo,” a ti.

4A! misual phun, ṭhat lonak in a khat i dinlonak a tuah pengmi hna, nannih cu nan lo cang. Bawipa Israel Pathian Thiang cu nan hlawt i hnulei nan chit caah nan sualnak nih chuk ah an hnuh cang hna. 5Zeicahdah nan puar chin lengmang ko? Fak chinchin in dantat maw nan duh? Israel mi hna, nan lu cu hma a khat i nan lungthin le nan ruahnak cu a zaw. 6Nan kechik in nan luthlung tiang, nan pum cungah hin khuazei hmanh ah damnak a um lo, hma le rung in nan khat dih. Nan hma cu an in ṭawlpiak hna lo i an in tuampiak hna lo. Si zong an in thuhpiak hna lo.

7Nan ram cu a rawk dih i nan khua cu an kang dih. Nanmah mit hmuh hrimhrim ah ramdangmi nih khan nan ram cu an lak i an hrawh dih. 8Jerusalem lawng a tang, cu hmanh cu ral nih an kulh dih — mitsur lo chung lo hngaktu thlam bantuk ceo a si, zil lo chung deu bantuk ceo a si cang. 9Ralkapbu Bawipa nih mi kha tlawmte tanter hna hlah seh law, Jerusalem cu a rawk dih cikcek taktak cang hnga, Sodom le Gomorrah an rawh dih cikcek bantuk khan a rawk dih cikcek ve cang hnga. *

10Jerusalem, na uktu bawi hna le na mi hna hi Sodom le Gomorrah khuami bantuk kha an si. Bawipa nih an chimhmi bia hi ngai tuah. Kan Pathian nih an cawnpiak mi hi ṭha tein ruat tuah. 11Pathian nih cun, “Nan ka pekchanh lengmangmi thawinak vialte hi a duh ko hna ti ah maw nan ka ruah? Khangh thawinak caah tuu nan khanghmi hna le nan saṭil ṭha bikbik hna thau nan khanghmi hna hi kaa za diam cang. Nan cawtum hna le nan tuu hna le nan meheh hna thi nih hin a nor in an ka nor cang. * 12Keimah biak awk i nan rat tikah, hi vialte hi nan tuah lai, tiah aho nih dah an in ti hna? Ka Biakinn chungah hin torcawl len u, tiah aho nih dah an in fial hna? 13Man ngei lo nan ka pekchanhmi thil hi ka duh ti hna lo. Nan ka pekchanhmi zihmui rim hi ka luak a chuak. Nan Thla Thar Puai te hna, nan Sabbath te hna, nan biaknak pumhnak tehna hi a in in ka ing kho ti lo; nan sualnak nih a thutter dih cang hna. 14Nan Thla Thar Puai hna le nan ni thiang hna cu a huat in ka huat hna. Ka caah a phorh ka zuam ti lomi thilrit an si.

15“Thlacam in nan kut nan hler tikah kan zoh duh hna lai lo. Zeizat tam hmanh in cam u law kan ngaihpiak hna lai lo, zeicahtiah nan kut ah thisen aa neh. 16Thiang tein i kholh u. Nan tuah lengmang ka hmuhmi ṭhat lonak hi ngol hna u. Ṭhat lonak cu tuah ti hna hlah u law 17a dingmi thil tuah tu kha cawng cang u. Dinnak tuah kha i zuam u, cucu mi nih an serhsatmi hna bawmh le ngakṭah hna chanh le nuhmei hna ṭanpi kha a si,” a ti.

18 Bawipa nih aa thawh i, “Atu cu hi bia hi ṭhate in ruat ṭi tuah u sih. Nan sualnak cu a sen in sen hna hmanh seh law, hawhra bantukin an thiang hna lai; a dum in dum hna hmanh seh law tuuhmul bantukin an vaar lai. 19Ka bia nan ka ngaih paoh ahcun, ram nih a chuahtermi thil ṭha kha nan ei hna lai. 20Sihmanhsehlaw ka bia kha nan ka al i nan ka doh ahcun nan thi ko lai. Hi bia cu Bawipa nih ka chim,” a ti.

A Sualmi Khuapi

21Zumhawktlak a rak si tawnmi khua kha, atu cu hlawhhlangnu a si cang. Hlanah khan cun a chungah miding an rak um tawn, sihmanhsehlaw atu cu lainawng pawl lawng an tang cang. 22Jerusalem, hlan ah cun ngun bantuk na rak si, sihmanhsehlaw atu cu zeihmanh man na ngei ti lo; zu thlum bantuk na rak si, sihmanhsehlaw atu cu na da cang. 23Na bawi hna cu ralthawh hmangmi le mifir hna hawikom an si; laksawng le ziknawh kha an ei thluangthluan ko. Zung ah khan ngakṭah kha zeitikhmanh ah an ṭanh duh bal hna lo i nuhmei cu an bia kha a ngaih hmanh an ngaihpiak duh bal hna lo.

24Cucaah Bawipa, Ralkapbu Bawipa Israel miṭhawng nih a chimmi bia hi ngai tuah u: “Ka ral hna, phu kan hlam cang hna lai i harnak nan ka pe ti lai lo. 25Atu cu kan tongh cang hna lai. Ngun an thianh bantukin kan thianh hna lai i nan thurhnawmhnak vialte kha ka thianh dih lai. 26Hlanpi ah nan rak ngeihmi hruaitu hna le fimchimtu hna bantuk kha kan pek ṭhan hna lai. Cun Jerusalem cu, dinnak khua, zumhawktlakmi khua, ti a si lai,” a ti.

27 Bawipa cu a din caah Jerusalem le aa ngaihchihmi paoh cu a khamh hna lai. 28Asinain a sualmi le amah a dohmi paoh cu a hrawh hna lai; amah a hlawmi paoh cu a thah dih hna lai.

29Thingkung nan rak biakmi hna le dum thiang * nan rak sermi hna kha nan i ngaichih ngaingai lai. 30A thi cuahmahmi kuhthing bantukin nan car lai i ti toih lomi dum bantukin nan ro lai. 31Thing ro cu meici nih a alhter bantukin miṭhawng hna cu amah tuahmi lila nih a hrawh hna lai i cu bantukin an rawhnak cu ahohmanh nih an kham kho lai lo.

⇑

[Remove Footnotes]