Isaiah 13

Pathian Nih Babilon Dan A Tat Lai

1Hi bia hi Babilon kong ah Amoz fapa Isaiah nih Pathian sinin a hmuhmi bia a si: *

2Tlang kawng pakhat par ah raltuknak alan phun tuah! Ralkap cu au hna law, aa porhlawmi khualipi kutka cu tu cang hna u ti hmelchunhnak caah na ban kha hlerpiak hna. 3 Bawipa nih a thin a phoktu kha tuk awkah a ralkap kha a kawh hna, cu a thiangmi raldohnak doh awkah cun aa zum ngaingaimi a ralkap, ral cu kanmah nih kan tei ṭheo lai tiah aa ruatmi ralkap pawl kha, a kawh hna.

4Tlang cung thawng cu ngai tuah u — mibu nganpi thawng a si, miphun tampi le ram tampi aa pummi thawng a si. Ralkapbu Bawipa nih a ralkap cu raldoh awkah a timh hna. 5Lamhlatpi i a ummi ram vanhramdeng in a rami an si. A thinhun in ram cu a pumpi in Bawipa nih a hrawh lai.

6Nganfak in ai tuah u! Bawipa ni cu a nai cang, Lianngan Bik nih rawhnak a tlunter lai ni cu a nai cang. * 7Mi cu ahopaoh an kut a thlep lai i an lung a dong lai. 8An dihlak in therphang in an um lai i nau nganfah a ingmi nu bantukin fahnak nih a tei hna lai. Pakhat le pakhat kha an i zoh tikah an i ṭih lai i an hmai thi khal a chuak ciocio lai. 9 Bawipa ni cu a ra lio, a thinhunnak le a thinlinhnak ni, ni ṭihnung cu a phan dengmang cang. Vawlei cu ramking ah a cang lai i misual mi paohpaoh cu thah an si lai. 10Arfi hna le arfi bu hna khi an ceu ti lai lo, ni cu a chuah tikah a mui lai i thlapa cu a vang lai lo. *

11 Bawipa nih aa thawh i, “Vawleicung ah rawhralnak ka tlunter lai i miṭhalo vialte cu an sualnak ruangah khan dan ka tat dih hna lai. Aa porhlawmi paohpaoh kha ka ṭhumh hna lai i a lung a puammi le ruam a kaimi vialte cu dan ka tat hna lai. 12A tangmi cu sui nakin an tlawm deuh lai, Ofir sui nakin an tlawm deuh lai. 13Ralkapbu Bawipa keimah nih ka thinhunnak ka chuah ni ah cun, van khi an ther dih lai i vawlei hi a umnak hmun in a choi lai.

14“Babilon ram chung i ramdangmi a ummi hna kha, anmahle an ram cio ah an kir lai, sakhi cu ramvai hna sinin a zam bantukin annih zong cu an zam lai, khaltu ngei lo tuu an i ṭhek bantukin an i ṭhek lai. 15Tlaih a tongmi paoh cu thi lakin nam in chunh an si lai. 16Zeihmanh tuah kho ṭung loin an mit lawng i an zoh ko lio hna ah khan, an fale tete cu thi lakin an tenghpiak hna lai, an inn kha an ramh hna lai i an nupile kha hranhram in an sualpiak hna lai,” a ti.

17 Bawipa nih, “Babilon tuk awkah Media mi * kha ka cawlcanghter lio hna. Annih cu ngun kha zeihmanh ah an rel lo i sui zongin lem khawh an si lo. 18An li le an thal in tlangval kha an thah duahmah ko hna lai. Ngakchia cungah siseh, bawhte cungah siseh, zaangfahnak zeihmanh an ngei lai lo. 19Babilon ram hi ram vialte lakah ram dawh bik a si, a chung i a ummi a mi hna nih an i chor ngaingaimi a si. Sihmanhsehlaw Bawipa nih Sodom le Gomorrah ka rak hrawh bantuk khan ka hrawh ve lai. * 20Cuka ah cun ahohmanh an um ṭhan ti lai lo. A vak a vai tawnmi Arab mipa zong nih cuka ah cun a thlam a bunh lai lo; cuka ah cun tuukhal zong nih an saṭil an khal hna lai lo. 21Cu hmun cu thetse rawn saram umnak hmun ah a cang lai i chimbu nih an bu an saknak hmun a si lai. Cuka ah cun ostrik va an um lai i sathar hna cu cu hmunrop ah cun an laam lai. * 22Innsang hna le bawi inn nuamnuam ah khan cenghngia aw le ramui awnh thawng lawng a leng ko lai. Babilon cu a caan a phan cang! A ni cu a dih dengmang cang,” a ti.

⇑

[Remove Footnotes]