Isaiah 16

Moab Ram In A Zammi Judah Ram Ah An Kal

1Thetse ram i a ummi khua Sela khua in Moab mi nih, Jerusalem khua i bawi a simi sinah laksawng caah tuufa pakhat an kuat. 2Arnon tiva kam khan an hngah i zei tuah awk hngal loin an i chawk lengmang, vate fano an bu chungin an lak hna i an thla lawng an bengh lengmang bantuk khi an si. 3Judah mi cu an thawh hna i, “Zeitindah kan um lai, kan chim tuah u. Chun ni lin ah naidem a demhtu thing bangin kannih cu kan huppheng tuah u, nan thladem tangah cun kan dorter tuah u. Kannih cu ralzam kan si, ahohmanh nih an kan hmuh khawh lonak ding hmun ah kan thup u. 4Nan ram chungah kan umter u law, kanmah hrawh a kan duhtu hna sin khan kan huppheng ko u,” an ti hna.

(Hremnak le rawhralnak kha a dong lai i ram a hrawktu kha anum ti lai lo, 5Khi tikah David tefa pakhat cu siangpahrang a si lai i a mi kha zumhawktlak le dawtnak in a uk hna lai. A hmaanmi thil tuah ah khan a khul a rang lai i mi kha dinnak cu a tuahter hna lai.) 6Judah mi nih an i thawh i, “Moab mi cu miporhlaw ngaingai an si kha kan theih. Miruamkai, mizum an si kha kan hngalh, sihmanhsehlaw an tluangkhawnnak cu pakpalawng an si,” an ti.

7Harnak an in caah khan Moab mi cu an ṭap lai. Kir Heres Khua i rawl thawthaw an rak ei tawn kha an lung ah a hung pem tawn lai i an dihlak in an ṭap tawn lai, lung dong in an um lai. 8Heshbon khua lo hna le Sibmah khua mitsur dum hna cu an rawk dih — miphun hna uktu bawi lunglawmhtertu zu a chuahnak mitsur dum kha an rawk dih. Voi khat cu a mitsur ruang kha nichuahlei ah Jazer khua tiang a zam i thetse ram zong kha a va phan, cun nitlaklei ah Rili Thi ralchan tiang a phan. 9Sihmanhsehlaw atu cu Jazer ka ṭah bang khan Sibmah khua mitsur ruang cu ka ṭah ve hna. Heshbon le Elealeh caah ka mitthli a tla, zeicahtiah mi lawmhternak dingah kumvui zeihmanh a um lo. 10Rawl tampi a rak chuahnak lo ah khan atu cu ahohmanh aa lawmmi an um lo. Mitsur dum chungah khan a aumi siseh, hla a sami siseh, ahohmanh an um lo. Ahohmanh zu ser awkah mitsur thei a nengmi an um lo, lunglawmhnak au thawng kha a dong cang. 11Moab caah ngaihchia in ka hram i Kir Heres caah lungfak in ka ai. 12Moab mi hna nih thla cam awkah tlang cung hmunthiang ah an kal lengmang le an biakinn i an kal lengmang cu alak ah an tha lam an i bat men, zeihmanh a ṭhathnem hna lai lo. 13Hi bia hi Bawipa nih Moab kong ah a rak chimmi bia a si. 14Cun atu cu aa thawh i, “Kum thum chung hrimhrim ah Moab rumnak cu a lo dih lai. A mi tampi hna chung khan tlawmte lawng an tang lai i cu hna cu a der a thawmmi an si lai,” a ti.)

⇑

[Remove Footnotes]