Isaiah 17

Pathian Nih Damaskas le Israel Dan A Tat Hna Lai

1Hi bia hi Damaskas kong bia a si. Bawipa nih aa thawh i, “Damaskas cu khua a si ti lai lo, thil rawk pon lawnglawng a si cang lai. * 2Siria khua hna cu zungzal in chuahtak an si lai. Tuu le caw tlonnak hmun ah an cang lai i ahohmanh nih an ṭhawl hna lai lo. 3Israel cu hupphengtu ralhruang zeihmanh a ngei ti lai lo i Damaskas cu amahte in aa ukmi ram a si ti lai lo. Siria mi hna chungin a tangmi hna kha Israel mi hna bantukin ningzak in khua an sa ve lai. Hi bia hi Bawipa nih ka chim,” a ti.

4 Bawipa nih, “Israel lianhngannak a dongh lai ni a phan lai, cun a rumnak vialte cu sifahnak nih a rolh lai. 5Israel cu rawl an hleh i an ṭuan cianak lo bantuk a si lai, Refaim Nelrawn i famua an suatnak cia lo bantuk a si lai. 6Tlawmte lawnglawng an tang lai i Israel cu a thei an lawh dih i a parpahlek ah pum hnih pum thum, a nge ah pum li pum nga lawng an nganhmi oliv kung bantuk a si lai. Bawipa Israel Pathian keimah nih hi bia cu ka chim,” a ti.

7Cu ni a phak tikah annih a sertu hna Israel Pathian thiang cu bawmh an hal lai. 8Anmah nih an kut in an sermi biakṭheng kha an i bochan ti lai lo, anmah nih an kut in an tuahmi zong kha an i bochan ti hna lai lo — cu an kut in an tuahmi hna cu Asherah khuazingnu biaknak caah an tuahmi thingṭial hna zihmui khanghnak caah an sermi biakṭheng hna kha an si.

9Cu ni a phak tikah cun ralhau in kulhmi khua hna kha an zamtak hna lai i an rawk dih lai; Israel mi nih an rak dawi hna tikah Hiv mi le Amor mi nih an rak zamtakmi hna khua bantuk kha an si lai.

10Israel, nangmah an chanhtu le lungpi bangin an hupphengtu na Pathian cu na philh cang. Dum thiang tu kha naa serh hna i ramdang pathian kha na biak. 11Asinain na cin hna zing hrimhrim ah kho in par hna hmanh seh law kumvui zeihmanh na hmu ṭhiamṭhiam lai lo. Harnak le a dam kho lomi fahnak lawng a um lengmang ko lai.

12Miphun ṭhawngṭhawng hna cu an i tuai, an i tuai thawng cu rili thawng bantuk le tilet ngan pipi thawng bantukin a thang. 13Miphun hna cu hmailei ah rili tilet bangin an kal, sihmanhsehlaw Pathian nih a sik hna i an kir, tlang cung i thli nih a choihmi leidip bantuk le phuchim nih a choihmi capawl bantuk an si. 14Zanlei ah cun annih nih thil ṭihnung an chuahter, sihmanhsehlaw zinglei ah cun an lo. Cu bantuk cu kan ram a hrawktu paoh cu an si ko.

⇑

[Remove Footnotes]