Isaiah 19

Pathian Nih Izipt Dan A Tat Lai

1Hi bia hi Izipt kong bia a si. Bawipa cu khuadawm aa cit i khulrang in Izipt ram ah a ra. A hmaiah Izipt ram siasal hna cu an ther i Izipt mi hna cu an lung a dong. * 2 Bawipa nih aa thawh i, “Izipt ram chungah mah le mah i dohnak ka chuahter lai, u le nau kha an i do lai i innpa le innpa kha an i do lai. Khua khat le khua khat an i tu lai i siangpahrang pakhat le pakhat uknak an i cuh lai. 3Izipt mi an khuakhannak kha ka tuai lai i an lung ṭhawnnak kha ka zorter lai. An siasal kha, kan bawm u, tiah an ti hna lai; khuavang kha zeitindah kan um lai tiah an hal hna lai i mithi thlarau kha ruahnak kan cheu u tiah an ti hna lai. 4Izipt mi cu a puar ngaingaimi uktu siangpahrang kut chungah ka pek hna lai i a uk hna lai Bawipa Ralkapbu Bawipa nih hi bia cu ka chim,” a ti.

5Nail tiva ti cu a puan lai i tiva cu a car te lai. 6Tivapi in tilaknak kahcham an cawhmi hna cu duhsah tein an car caah an thu lai. Phaikung le ram kha an car lai i, 7Nail tiva kamah an cinmi rawlkung vialte kha an ro lai i thli nih a choih hna lai. 8Nail tiva ah nga tlaih in a paw aa cawmmi hna kha an hrum lai i an ai lai; an sio le an sur cu zeihmanh san an tlai ti lai lo. 9Khumla in puan a takmi hna cu an lung a dong lai i 10puan taktu hna le zungthiam pawl cu hnabeidong le lungrethei in an um lai. 11Zoan khua chung haotu hna cu mihrut an si! Cun Izipt ram mifim bikbik hna nih lungthin an cheuhmi hna cu hruh bia men a si. Kannih cu hlanlio siangpahrang hna le mifim hna an ro a cotu kan si tiah zeitindah siangpahrang cu an chimh ngam? 12Izipt siangpahrang khuazei ah dah na fimchimtu mifim hna cu an si kun? Ralkapbu Bawipa nih Izipt ram caah hin zei khuakhannak dah a ngeih ti kha a chimh zong an in chimh khawh sual ko hnga dah kaw! 13Zoan khua le Memfis khua chung haotu hna cu mihrut an si ko. Annih cu an miphun kha a hruaitu ding an si nain a pingah an kalpi hna. 14Lungthin an cheuh hna tikah an lung a tuaitam chin tu dingin Bawipa nih lungthin a cheutu cu a umter hna. Cucaah cun Izipt cu a tuahmi paoh ah khan a palh lengmang i amah luak lila i a nalmi zuri bantukin a sawn lengmang. 15A ram chung i a ummi ahohmanh nih, mirum si hna seh, misifak si hna seh, mihme si hna seh, mingan si hna seh, Izipt cu bawmhnak an pe kho lo.

16Izipt mi cu nu bantukin an ral a chiat caan a phan lai. Ralkapbu Bawipa nih anmah dantat awkah a kut a samh kha an hmuh tikah a ther in an ther lai. 17Ralkapbu Bawipa nih an umtuning ding an ca i a timhmi kha an hngalh chel paoh ah Judah mi kha an ṭih ngaingai hna lai.

18Cu caan a phak tikah Izipt ram khua panga ah Hebru holh kha hman a si lai. Cuka i a ummi hna nih Ralkapbu Bawipa min in chiat an ser lai. Cu khua hna lak i pakhat cu “Ni Khua” tiah ti a si lai. 19Cu caan a phak tikah Izipt ram chungah Bawipa ca biakṭheng pakhat a um lai i Izipt ramri ah lungphun pakhat cu Bawipa caah ser a si lai. 20Cu biakṭheng le lungphun cu Izipt ram chungah Ralkapbu Bawipa a um ti hngalhnak hmelchunhnak a si lai. Cuka mi hna nih hremnak an in i Bawipa kha, kan bawm tuah tiah an hal tikah annih chuahtu dingah khan mi a thlah lai. 21Izipt mi sinah Bawipa nih aa langhter lai. Cu bantukin aa langhter tikah annih nih an hngalh lai i an biak lai i raithawinak le pekchanhmi thil an pek lai. Annih nih a fekmi biakamnak an tuah lai i bia an i kammi cu an tlinter lai. 22 Bawipa nih Izipt mi cu dan a tat hna lai, sihmanhsehlaw a damter ṭhan hna lai. Annih nih amah leiah khan an i mer lai i an thlacamnak kha a theihpiak hna lai i a damter hna lai.

23Cu caan a phak tikah Izipt le Assiria kar ah lam nganpi pakhat a um lai. Hi ram pahnih hna mi cu an i tlawng an i kai lai i hi miphun pahnih hna cu hmunkhat ah Pathian an bia lai. 24Cu caan a phak tikah, Israel cu Izipt le Assiria he aa tluk in a um lai i hi miphun pathum hna hi vawleicung mi vialte caah thluachuahnak an si lai. 25Ralkapbu Bawipa nih thluachuah a pek hna lai i, “Ka mi Izipt mi hna, thluachuah kan pek hna lai, ka sermi Assiria mi hna, thluachuah kan pek hna lai, ka thimmi Israel mi hna, thluachuah kan pek hna lai,” a ti hna lai.

⇑

[Remove Footnotes]