Isaiah 20

Taklawng In A Ummi Profet

1Assiria siangpahrang Sargon nih a fial bantukin, Assiria ralkap uktu bawi a ngan bik nih Filistin mi khua Ashdod kha a tuk. 2Cu hlan kum thum ah khan Bawipa nih Amoz fapa Isaiah cu, naa hrukmi khum puan le na kedan kha i phoih hna, tiah a rak ti. Bawipa nih a chimh bang cun, taklawng le kelawng in aa chawk. 3Ashdod cu lak a si tikah Bawipa nih aa thawh i, “Ka sal Isaiah cu taklawng le kelawng in kum thum chung aa chawk. Hihi Izipt ram le Ethiopia ram cung i a tlung ding hmelchunhnak a si. 4Hi ram pahnih hna chung mi a tlaihmi sal hna cu Assiria siangpahrang nih taklawng in a kalpi hna lai. Tar thlu lo, no thlu loin, ke lawng le taklawng in an kal lai i an chiaṭha zong kha a lang lai; cuticun Izipt ram cungah ningzahnak a tlunter lai. 5Ethiopia aa bochanmi le Izipt a um sawk tiah aa porhlawmi cu an ruahnak a khel ngaingai hna lai i vansang au in an um lai. 6Cu caan a phak tikah Filistia ram rili kam i a ummi hna nih, ‘Assiria siangpahrang sinin an kan huhphenh lai tiah kan rak i bochanmi hna kha zoh hna hmanh u. Zeitindah kannih zong kan nun bal rua hnga,’ an ti lai,” tiah a ti.

⇑

[Remove Footnotes]