Isaiah 27

1Cu ni ah cun Leviathan * rulpi, a kualh in aa kual i a ngerh in aa ngerhmi rulpi kha dantat awkah le rili chung i a ummi rulpi kha thah awkah a ṭhawng i a har ngaingaimi a vainam kha Bawipa nih a hman lai. *

2Cu ni ah cun a nuammi a mitsur dum kong ah Bawipa nih hitihin bia a chim lai, 3“Ka mitsur dum cu ka cawngh i ti ka toih zungzal. Ahohmanh nih an hrawh nakhnga lo chunzan in ka cawngh. 4Ka mitsur dum cungah ka thin a hung ti lo. Sam len awk hling le so um hna seh law ka duh hnga. Um hna seh law a khangh in ka khangh dih hna hnga. 5Asinain ka mi hna an ral nih keimah huhphenhnak hmuh kha an duh ve ahcun, keimah he i remnak tuah hna seh. Asi, keimah he i remnak tuah hna seh,” a ti.

6Cu ni ah cun, Israel mi, Jakob tefa hna cu thingkung bangin hram an thla lai i an kuhkulul lai i an par lai. Vawlei cu an tlai kha a khat dih lai. 7Israel kha Bawipa nih dan a tatmi cu, a ral hna a tatmi hna tluk khan cun a fak lo, minung zong a ral hna tluk khan cun an thi lo. 8 Bawipa nih a mi hna dan a tat hna cu, ramdang i a kalter hna kha a si. A ṭhawngmi thli, nichuahlei thlitu kha a choihter hna. 9Pathian bia lomi biakṭheng kha thungrang bantukin rial an si hlan le tung thiang le zihmui khanghnak biakṭheng hna kha hlonh dih an si hlanah cun, Israel sualnak cu ngaihthiam a si kho lai lo.

10Ralhau in kulhmi khuapi cu a rawk cang. Zeihmanh um lonak ramlak bantukin chuahtak a si cang. Caw tlonnak phong, ram an ṭam i an bawhnak hmun ah a cang cang. 11Thing nge cu an kiak i an car i nu nih mei tih awkah an khawmh hna. Mi nih khan zeihmanh an hngalh khawh lo caah, anmah a sertu Pathian nih khan a zaangfah hna lai lo i vel zong a ngeih hna lai lo.

12Cu ni ah cun, Bawipa hrimhrim nih a mi Israel mi kha an bia a ceih hna lai, khattelei deng in khattelei deng tiang, Zufrates tiva in Izipt ramri tiang. A ṭhami le a ṭha lomi kha a ṭhen hna lai.

13Cu ni a phak tikah, Assiria ram le Izipt ram i sal ah a tangmi Israel mi vialte kha muko in a kawh hna lai. An ra lai i Bawipa cu Jerusalem khua chungah, a tlang thiang cungah khan an biak lai.

⇑

[Remove Footnotes]