Isaiah 28

Chaklei Pennak Ralrin Peknak

1Israel ram cu a lo cang! A sunparnak cu, a mi hruaitu upa pawl, zu a ri zungzalmi nih an i chinhmi pangpar luchin bangin a ziam cuahmah cang. Aa porhlawmi an lu hna cu zihmui an i thuh, sihmanhsehlaw an ril ko, thi koin an ri i an ril ko. 2Anmah dohtu dingah a ṭhawng i a liannganmi pakhat Bawipa nih a chiah ko. Rial bantukin a ra lai, ruahpi sur in a sur lai, ti lian bantukin a ra lai i ram kha a tei cikcek lai. 3Efraim mi zu rit buin a hruai zungzalmi haotu pawl nih an i uanthlarmi pangpar ṭhi rual kha vawlei ah lamh beh an si lai. 4Cu haotu pawl sunparnak a ziam lio lengmangmi cu, a hmin hmasa bikmi theipi, an hmin cangka in an lawh hna i an eimi hna bantuk khin, a lo lai.

5Khi ni ah Ralkapbu Bawipa cu a tangmi a mi hna caah a sunglawimi bawi luchin pangpar in ṭamhmi bantuk a si lai. 6Biaceihtu hna kha dinnak lungthin a pek hna lai i khua kulhnak kutka ah ral a rak khirhtu hna kha ralṭhatnak a pek hna lai.

Isaiah le Judah Ram Profet Zuri Hna

7Profet hna le tlangbawi hna hmanh kha zu an ri tuk i an sawn lengmang. Zu le zureu tam tuk an din caah lungmit in an ril lengmang i khoika zawn ah kan kal ti hmanh kha an hngal lo. Cucaah profet nih Pathian sinin langhnak an hmuhmi ah an palh i tlangbawi nih bia an ceihnak ah an palh. 8An ṭhutnak cabuai cu luak a khat i a thiannak hmun pakhat hmanh a um lo.

9Keimah kong ah khan an zai i, “Khi pa nih khin, aho ka cawnpiak hna ti ah dah aa ruah hnga? Aho nih dah a bia cu an herh? Hnukthlei ka bawhte ca lawngah pei a ṭhat ko cu. 10Amah nih cun a cafang tete in, a tlang a tlang in, cawn awk timi a bu a bu in cawnpiak a hei kan zalh,” an ka ti.

11Keimah bia kha nan ngaih lo ahcun, holh phun dang in a holhmi ramdangmi kha, nanmah cawnpiaktu dingah Pathian nih a hman hna lai. * 12Dinhnak le hnangamnak kan pek hna lai, tiah nan dihlak in an ti hna, sihmanhsehlaw nannih nih cun nan ngai duh lo. 13Cu ruangah cun pei Bawipa nih a cafang tete in, a tlang a tlang in, cawn awk timi a bu a bu in an cawnpiak hna lai cu a si cu. Cun nannih cu nan kal tikah nan ril lengmang ko lai. Hma nan ing lai, rap in foih nan si lai i sal ah tlaih nan si lai.

Zion Caah Innkil Lung

14Cucaah cun Jerusalem khuami uktu, mi lungpuam rual hna, Bawipa nih a chimmi hi ngai tuah u. 15Thihnak he hnatlaknak kan tuah cang i mithi khua he biakamnak kan tuah cang tiah nan i porhlaw. Lih le hlennak nih an kan huhphenh khawh lai tiah nan i bochan hna caah harnak a tlun tikah kan luat lai tiah nan i ruat. 16Sihmanhsehlaw Bawipa Pathian nih a chimmi cu hihi a si: “Zion ah hin a fek i a ṭhawngmi inn hram ka ser lai. Cu hram ah cun innkil lung, lungcang pakhat ka bunh lai i cu lung cungah cun, ‘Zumhnak fek cu a lung zong a sau,’ tiah ṭial a si lai. * 17A hram a phei lei in an tahnak hri cu dinnak a si lai i a tunglei in an tahnak hri cu lihchim lonak a si lai. Sihmanhsehlaw nan i hngatchanmi lih bia cu rial he a rami ṭotho nih a choih dih lai i nan himnak cu tilian nih a fenh dih lai,” a ti.

18Thihnak he hnatlak ṭinak nan tuahmi cu hloh a si lai i mithi khua he biakamnak nan tuahmi cu hrawh a si lai. Harnak a tlun tikah nan dir kho lai lo. 19Zing khat hnu zing khat an den chih lengmang hna lai i chun he zan he nan in a hau lai. Pathian sinin a rami bia thar paohpaoh nih ṭihnak thar an rak i ratpi lai. 20Phungthluk bia chung i, ihkhun a tawi tukmi cung i puan a bi tukmi he a it mipa bantuk kha nan si lai. 21Perazim Tlang le Gibeon nelrawn ah Bawipa nih ral a rak tuk hna bantuk khan, aa timhmi tuah awkah an tuk hna lai i cu a tuahmi cu khuaruahhar ngai a lo ko lai nain an tuk taktak ko hna lai. A rian cu a lim lai i cu a rian cu khuaruahhar ngaingai a si. *

22Ralrinnak kan pekmi hna hi nan nih men chuak hlah seh. Nan nih a chuah ahcun nan caah luatnak a har chinchin lai. Ralkapbu Bawipa nih ram cu a dihlak in ka hrawh lai a timi kha ka theih cang.

Pathian Fimnak

23Ka chimmi hi ngai tuah u, kan chimhmi hna hi ṭha tein nan hna chit tuah u. 24Lothlopa nih a lo cu, thlaici tuhnak caah ti in a thuan lawng a thuang zungzal bal lo. 25A thuan dih cun thlaici kha a tuh hna, nannan tehna, zira tehna kha a tuh hna. Changvut le barli kha a tlang a tlang in a tuh hna i a lo ri ah thlaici dang kha a tuh hna. 26Pathian nih a cawnpiak caah a rian kha a ṭuanning a thiam. 27Zira ci le nannan ci kawnnak caah thingtan rit pipi kha a hmang bal lo, a zaangmite a hmet a ngan aa tawkzate kha a hman tawn. 28Changvut fang cu parh cikcek in a naang bal lo, a fang kha rawk lo tein cawleng kha a rialter. 29Hi bantuk fimnak vialte hi Ralkapbu Bawipa sinin a rami a si. Pathian khuakhannak cu a fimmi a si zungzal i thlua a chuak zungzal.

⇑

[Remove Footnotes]