Isaiah 29

Jerusalem Kong

1Pathian biakṭheng, Jerusalem zong a rawk cang! David a rak riahnak khua kha a rawk cang. Kum khat kum hnih chung cu an puai le an puai kha i tong ko rih hna seh, 2cun “Pathian biakṭheng” timi khua ah cun Pathian nih harnak a tlunter lai. Ṭahnak le aihramnak a um lai i a khua hrimhrim kha raithawinak an khanghnak biakṭheng ah a cang lai. 3Khua cu Pathian nih a tuk lai, a kulh lai i a hren lai. 4Jerusalem cu vawlei tangin bia chim a hun zalmi muthla bantuk a si lai, leidip chungin a hung chuakmi aw dinte bantuk a si lai.

5Jerusalem, nangmah an dotu ramdangmi vialte hna cu leidip bangin an choi dih lai i ṭih a nungmi a ralkap hna cu capawl bangin thli nih a choih dih hna lai. Chikkhatte le ruah lopi ah khin 6Ralkapbu Bawipa nih a ṭhawngmi ṭotho le lihnin in a khamh lai. Thlichia a hranter lai i zeizong vialte a khang dihtu mei a chuahter lai; 7cun Pathian biakṭheng khua a tutu ralkap vialte hna kha, an hriam le an nam vialte he an zeizong tein, mang bantukin an lo lai, zanmang bantukin an lo lai. 8Jerusalem tuk awkah aa pummi miphun vialte hna cu, a rawl a ṭammipa, a mang i rawl a ei ko na i aa hlauh tikah a rawl a ṭam ṭhiamṭhiammi bantuk le tihal in a thi dengmangmi, a mang i ti a ding nain aa hlauh tikah a dang a car ṭhiamṭhiammi bantuk khi an si lai.

Ralrinnak Bia Kha Ahohmanh Nih Zei Ah An Rel Lo

9Va kal u law va hrut ṭhiamṭhiam ko rih u. Va kal u law mitcaw in va um ṭhiamṭhiam ko rih u. Zu din loin ri ko u. Dor khat hmanh din ṭung lo ah sawn lengmang in um ko u. 10 Bawipa nih an ngutter hna i thu hluahmah in nan i hngilh dengmang cang. Profet cu nan mit an si awk a si, sihmanhsehlaw Pathian nih cu nan mit cu an mit a huh hna. * 11Profet nih an hmuhmi langhnak sullam cu thuhkanh nan si lai, cakhenhnak in khenh chihmi cazual bantuk a si lai. A rel a thiammi sin i nan va kalpi i, kan relpiak tuah, nan va ti tikah, aa hrenh caah ka rel kho lo, a rak in ti hna lai. 12A rel a thiam lomi sin i nan va kalpi i kan relpiak tuah, nan va ti tikah, kei cu ca rel ka thiam lo caah ka rel kho lo, a rak in ti hna lai.

13 Bawipa nih, “Hi mi hna nih hin kan in biak tiah an ka ti, sihmanhsehlaw an bia cu sullam a ngei lomi lawngte an si i an lung cu kaa dangpi ah a um. Biaknak an timi cu minung serchommi phung le pupa nih an zulh tawnmi lam lawnglawng kha a si i an kaa in a chim a thiam sawhsawh in an thiammi kha a si. * 14Cucaah cun a tlung lai tiah a ruah in an ruah hrimhrim lomi thil kha pakhat hnu pakhat in an cungah ka tlunter lai i cu nih cun a hlauh in an hlauh hna lai. An mifim cu mihrut ah an cang lai i an fimnak cu an caah zeihmanh ṭhathnemnak a ngei lai lo,” a ti. *

Hlengtu Fimchimtu Hna

15 Bawipa nih hmu hlah seh, tiah an khuakhannak a thupmi hna cu an lo cang. An i timhmi cu a thli tein an ṭuan i, kan tuahmi cu ahohmanh nih an hmu lai lo i an hngal lai lo, tiah an ruah. 16Zeizong vialte kha a bingtalet in an ser dih. Zeidah a biapi deuh, um sertu maw tlak dah? Mi nih an sermi thil nih khan, a sertu minung cu, “Na ka ser lo,” a ti khawh lai maw? Asiloah, “Na tuahmi hi zei a si na hngal lo,” a ti khawh lai maw? *

17Phungthluk ah an ti bang, tupi hmawng cu lo ah a cang lai i lo cu tupi ah a cang ṭhan lai.

18Cu ni a phak tikah cun, thang piin an relmi cauk chung bia cu hnachet nih a theih khawh lai i muihnak chungah a ummi mitcaw kha an mit a dei lai i khua an hmu kho lai. 19Misifak le mirethei hna nih, Israel Pathian thiang nih a pekmi hna lawmhnak kha an hmuh ṭhan lai. 20Midang a hremtu hna le Pathian zei ah a rel lomi hna caah cun an donghnak a si lai. Misual paoh cu hrawh an si lai. 21Mi congoih a hmangmi hna le misual dantat loin a luattertu hna le lihchim lomi nih biakhiahnak a dingmi an hmuh ding hmu kho loin a dawntu milihchim hna cu, Pathian nih a hrawh hna lai.

22Cucaah cun atu cu Abraham kha harnak chungin a khamhtu Bawipa, Israel Pathian nih, hi bangin a ti: “Ka mi hna, ningzak hmaichia in nan um ti lai lo, nan hmai thikhal zong a chuak ti lai lo. 23Kan pek laimi hna nan fale kha nan hmuh hna lai i keimah cu Israel Pathian thiang ka si kha nan hngalh lai. Nan ka upat lai i nan ka ṭihzah lai. 24Mihrut nih hngalhthiamnak an ngei kho cang lai i a phun a zai zungzalmi nih cawnpiaknak cohlan kha an duh cang lai,” a ti.

⇑

[Remove Footnotes]