Isaiah 33

Bawmh Halnak Thlacam

1Kan ral cu an lo cang! Ahohmanh nih an ramh hna lo i an rawi hna lo nain, mi kha an ramh hna i an rawi hna. Sihmanhsehlaw an miramh le an mirawi caan kha a dih lai i anmah tu kha ramhmi le rawimi an si ve cang lai.

2 Bawipa, kan zaangfah ko sawh. Kan i bochanmi cu nangmah na si. Ni khat hnu ni khat kan huppheng ko law harnak caan ah kan khamh tuah. 3Nangmah nih ral na kan tukpiak tikah, miphun hna cu cu raltuknak thawngpang ah cun an zam dih. 4An chawva vialte kha an chuh hna i hranchaw ah an lakpiak dih hna.

5Zeitluk in dah Bawipa cu a ngan! Zeizong vialte kha amah nih a uk dih. Jerusalem kha dinnak le ṭhatnak in a khahter lai i 6hi miphun cu a fehter lai. A mi kha a huhphenh zungzal hna i fimnak le hngalhnak kha a pek hna. Annih chawva a sung bik cu Bawipa an ṭihnak kha a si.

7Kan bawm u, tiah mi ralṭha kha an au. Daihnak tlunter aa zuammi lamkaltu hna kha fak piin an ṭap. 8Lam ah khan himnak a um lo caah cu lam cu ahohmanh nih an zul ti hna lo. Biakamnak kha an rawk, cuticun kan tuah ṭi lai ti hnatlaknak kha zeihmanh ah an rel lo. Ahohmanh zei ah an i rel lo. 9Ram cu a um sawhsawh ko i mi nih an chuahtak. Lebanon tlang tupi cu an car i Sharon nelrawn cu thetse ram bantuk a si, cun Bashan ram le Karmel Tlang thingkung hna cu an hnah a ṭil dih.

Bawipa Nih A Ral Kha Ralrinnak A Pek Hna

10 Bawipa nih miphun cu a thawh hna i, “Atu cu ka cawlcang cang lai! Zeitluk in dah a ṭhawngmi ka si kha kan hmuhsak cang hna lai. 11Nannih nih san a tlai lomi khua kha nan khan i nan tuahmi paohpaoh kha zeihmanh a ṭhahnem lomi thil an si. Nanmah le nanmah nan i hrawk ko. 12Thung ser awkah an khanghmi lung bantukin nan mot lai i vutcam ah cang lakin a kangmi hlingbur bantukin nan lo lai. 13Lamnai i a ummi nih si hna seh, lamhla i a ummi nih si hna seh, ka tuahmi kha thei hna seh law ka ṭhawnnak kha hngal hna seh,” a ti.

14Zion i a ummi misual hna cu an thinphan tuk ah a ther in an ther. “Pathian biaceihnak cu zungzal in a alhmi mei bantuk a si. Cu bantuk mei cu kan lakah hin a celh kho kan um ngai hnga maw?” an ti. 15A dingmi thil kha na chim i na tuah ahcun na celh ko lai. Na lianhngannak cu misifak hlennak ah khan hmang hlah law ziknawh kha la hlah. Lainawnnak tuah awk le thil dang a ṭha lomi tuah awkah khua a khangmi kha kom hna hlah. 16Cu bantukin na um ahcun khua-awng na pem lai i a ṭhawngmi ralhau bantukin na fek lai. Rawl ei awk kha na ngei zungzal lai i tidin awk kha zeitikhmanh ah na dong lai lo.

A Sunglawimi Hmailei Caan

17Ram kaupi a uktu siangpahrang sunparnak cu na mit in na hmuh ṭhan lai. 18Ramdang in a rami ngunkhuai khawltu hna le mingiatu hna na rak ṭihmi hna kha, na lung chung i na ruahmi thil men ah an cang lai. 19A ruam a kaimi ramdangmi, an holh na theih lomi kha na hmu ti hna lai lo. 20Biaknak puai kan tuah tawnnak Zion khua khi zoh hmanh. Jerusalem khi zoh hmanh. Khika um cu zeitluk in dah hnangam a si lai. A cawl in a cawl lomi thlam, a khenhnak fung phawi bal lomi le a hri a cat bal lomi bantuk a si lai. 21 Bawipa nih a sunparnak kha a kan hmuhsak lai. Tiva ngan pipi le tiva kau pipi pawngah khua kan sa lai, asinain kan ral hna tilawng cu cuka ah cun zeitikhmanh ah an ra lai lo. 22-23Cu lawng cung i thil hnuhnak hri vialte cu santlailo an si; lawng puanzar cu samh khawh an si lo. Kan ral hna ralkapbu i an chawva vialte cu lak dih an si lai. A tam tuk hringhran lai caah kebei hmanh nih an i cuh khawh ve lai. Bawipa hrimhrim cu kan siangpahrang a si lai i amah nih a kan uk lai i a kan huhphenh lai. 24Kan ram i a ummi cu ka zaw tiah an zai ti lai lo i an sualnak vialte cu ngaihthiam an si lai.

⇑

[Remove Footnotes]