Isaiah 36

Assiria Mi Nih Jerusalem Chim An Timh

(2Sia 18.13-27)

1Hezekiah kha Judah siangpahrang a si a kum hleilinak ah, Assiria siangpahrang Sennakherib nih khan Judah ram khua, ralhau a ngeimi khua kha a tuk hna i a lak hna. 2Cun a ralbawi ngan bik kha Lakhish khua in Jerusalem khua ah ralkap tampi he a thlah i Siangpahrang Hezekiah kha, i pe ko, nan va ti lai, tiah a ti. Ralbawipa nih cun puantaktu pawl lam kha a kham, cu a khamnak cu cunglei lam in ti a rung luannak kahcham pawngah khan a si. 3Judah mi pathum nih an hung ton: cu hna cu siangpahrang inn zohkhenhtu Eliakim, Hilkiah fapa, zung ca ṭialtu Shebna le cazin kengtu Joah, Asaf fapa kha an si. 4Assiria bawipa nih cun, zeicahdah Siangpahrang Hezekiah hi amah le amah hi tlukin aa zumh hnga ti kha Assiria siangpahrang nih hngalh a duh tiah a chimh hna. 5A thawh hna i, “Bia nih hin ralkap lei ṭhawnnak le thiamnak hi a tei khawh tiah dahra nan zumh? Keimah doh hi aho nih khin dah a kan bawmh ngam hnga tiah nan ruah? 6Izipt nih a kan bawmh lai tiah nan i ruah ahcun, cucu phaikung ṭhiangṭhunh i i hman bantuk a si — phaikung cu ṭhiangṭhunh i hman ahcun a kiak i kut lam ah mi a chun. Izipt siangpahrang cu mi nih an i bochan tikah cu bantuk cu a si ko,” a ti. *

7Cun a bia cu a vun peh i, “Asiloah, ‘ Bawipa kan Pathian pei kan i bochan,’ nan ti hnga maw? Cu nan Pathian cu, Hezekiah nih a biakṭheng vialte a hrawhpiak dih i Judah ram mi le Jerusalem khuami hna cu, biakṭheng pakhat lawngah Pathian nan bia cang lai, tiah a timi hna kha a si ṭung. 8Chawdet bantukin ka siangpahrang min in kan i det tuah lai. Rang thong hnih kan pek hna lai, cun nannih nih aa cit khotu ding cu zat cu nan i kawl lai! 9Assiria bawi lak i a hme bik hmanh tluk ṭung loin, Izipt nih rangleng le rangcung ralkap a kan kuat lai, nan hei ti. 10Nan ram ka ra doh i ka ra hrawh hi Bawipa bawmhnak tel loin a si tiin dahra nan ruah? Bawipa hrimhrim nih pei nan ram doh le hrawh hi a ka fial cu,” a ti.

11Cun Eliakim le Shebna le Joah nih khan ralbawipa cu, “Aramaik holh in kan chawn, kan hngalh ko. Hebru holh cun kan chawn hlah; ralhau cung mi vialte nih kan bia an kan ngaih ko,” an ti.

12Anih nih a leh hna i, “Nanmah le nan siangpahrang lawng cu maw hi bia hi ka bawipa nih va chim hna a ka ti, tiah nan ruah. Nanmah lawng nan si lo, ralhau cung i a ṭhumi vialte hna zong khi ka chimh hna a hau; anmah zong cu nanmah bantukin mah ek a ei ve ding le mah zun a ding ve ding an si ko,” a ti.

13Cun a dir i Hebru holh in fak piin a au i, “Assiria siangpahrang nih an chimhmi hna hi ngai tuah u. 14Hezekiah nih in hleng hna hlah seh tiah ralrinnak an pek hna. Hezekiah nih cun an khamh kho hna lai lo. 15 Bawipa kha i bochan u, tiah an lem hnanak kha i zumh hlah u, Bawipa nih a kan khamh lai i Assiria mi kha kan khualipi hi a lakter hna lai lo, tiah i ruah sual hlah u. 16Hezekiah cu a bia ngai hlah u. Assiria siangpahrang nih khua kha chuahtak u law ka sinah i pe u, tiah an ti hna. 17Nanmah ram bantuk a simi ram, mitsur zu a chuahnak lo a umnak ram le changreu ser awk rawl a umnak ram i siangpahrang nih an umter hna hlan cu, nanmahle nan mitsur ruang nih a tlaimi thei le nan theipi nih a tlaimi thei kha an eiter ko hna lai i nanmahle nan tikhor ti te kha an dinter ko hna lai. 18 Bawipa nih a kan khamh lai, ti in Hezekiah kha i hlenter hlah u. Ram dang pathian hna nih tah an ram cu Assiria siangpahrang kut cun an khamh kho hna maw? 19Hamath khua le Arpad khua hna pathian cu tah, khuazei ah dah an si kun? Sefarvaim khua pathian hna kha tah, khuazei ah dah an um? Ahohmanh nih Samaria kha an khamh kho lo, a si lo mei? 20Hi ram pathian vialte hna nih hin an ram cu zeitik tal ah dah kan bawipa kut chungin an khamh khawh? Cu ti a si ko ṭung ahcun, zei nih dah, Bawipa nih Jerusalem khua cu a khamh lai, tiah an ruahter hna?” a ti.

21Siangpahrang Hezekiah nih a chimh hna bantukin mi cu dai tein an um i bia kaa khat hmanh an let lo. 22Cun Eliakim, Shebna le Joah nih an puan kha ngaihchiatnak langhternak ah an thleh i Assiria ralbawipa nih a chimmi cu siangpahrang kha an va chimh.

⇑

[Remove Footnotes]