Isaiah 56

Miphun Dihlak Pathian Miphun An Si

1 Bawipa nih a mi cu a thawh hna i, “Nannih cu tuan ah kan khamh hna lai. Cucaah cun a dingmi thil le a hmaanmi thil kha tuah hna u. 2Sabbath ni a ul zungzal i a buar lomi kha thluachuahnak ka pek hna lai. Ṭhat lonak zeihmanh a tuah lomi kha thluachuahnak ka pek hna lai,” a ti.

3 Bawipa mi sin i aa fonmi ramdangmi nih khan, “ Bawipa nih a mi hna sin i biak ve cu a ka sianh lai lo,” tiah ti hlah seh.

Tilditmi nih khan, kannih cu Bawipa mi hna lakah kan i tel kho lai lo, ti hna hlah seh. 4Zeicahtiah Bawipa nih annih cu a thawh hna i, “Sabbath ulhnak le keimah duhmi tuahnak in nan ka upat i ka biakamnak kha zumh awk tlak tein nan zulh ahcun, 5nan min cu ka Biakinn chungah le ka mi hna lakah, fapa fanu nan ngeih i nan min cinken a si nak hmanh khin, sau deuh cinken a si lai. Zeitikhmanh ah kan philh hna lai lo,” a ti.

6Cun Bawipa nih a mi hna chung i aa tel vemi, amah a daw i a rian a ṭuanmi, Sabbath kha a ul i a biakamnak kha ṭha tein a zulmi ramdangmi kha a thawh hna i, 7“Ka tlang thiang Zion ah kan kalpi hna lai. Thlacamnak inn ka inn ah khan lawmhnak kan pek hna lai i biakṭheng cung i nan ka pekchanhmi raithawinak kha ka cohlan hna lai. Ka Biakinn cu miphun vialte caah thlacamnak inn ti a si lai,” a ti. *

8Saltannak chungin a mi Israel mi a chuahpitu hna Bawipa Pathian nih, anmah he fonh awkah midang kha ka ratpi rih hna lai, tiah bia aa kam.

Israel Hruaitu Sual A Phawt Hna

9 Bawipa nih ramdangmi kha, ramlak saram bantukin ra u law ka mi hi ra ei hna u, tiah a chimh hna. 10A thawh hna i, “Ka mi ralrinnak a petu ding a simi an hruaitu hna kha mitcaw lawngte an si. An hngalhmi zeihmanh a um lo. Inn hngaktu ui, a bao lomi bantuk an si — an it sawhsawh i mang lawng an man men ko. Ih cu an duh hringhran. 11A paw a kau tukmi, a za cang ti a hngal lomi uico bantuk an si. Hngalhnak ngei lo hruaitu an si. Anmahle an duhning cio paoh khan an um i anmah miaknak lam cio lawng kha an kawl. 12Hi zuri hna nih hin an i thawh i, ‘Zu kha la rih u sih law kan celh chungin tawng u sih. Thaizing cu nihin nak hmanh hin a ṭha chin deuh rih lai,’ an ti,” a ti hna.

⇑

[Remove Footnotes]