Isaiah 64

1Zeicahdah van khi na run baoh ko lo i na rung ṭum ko lo? Tlang nih hin an in hmuh hnga i an in ṭih tuk ah a ther in an ther hnga. 2Mei lin chungah a tlokmi ti bantukin an ther hnga. Ra law na lianhngannak cu na ral hna sinah hin langhter tuah, na hmaiah miphun hna cu a ther in ther hna seh. 3Voi khat cu na rak ra i na tuah lai tiah kan ruah lomi thil ṭihnung kha na tuah hna; tlang nih an in hmuh i ṭihnak in an ther. 4Amah aa bochantu hna caah cu bantukin rian a ṭuantu Pathian cu nangmah lawnglawng na si, nangmah bantuk cu ahohmanh nih a theih zong an thei bal hna lo a hmuh zong an hmu bal hna lo. * 5Ahmaanmi thil tuah duhnak a ngeimi kha na bawmh hna i nangmah nih cutin um hna seh ti na duhning a philh lomi cu na lawmh hna. Kan cungah na thin a rak hung, sihmanhsehlaw kan sual lengmang ṭhiam ko; kan cungah na thin a hung ko nain hlanlio piin kan sual lengmang ko. 6Kan dihlak in misual kan si, kan thil tuahmi ṭha bik kan timi hna hmanh hi puanchia fihnung an si. Kan sualnak ruangah cun hnahchawl thli nih a choihmi bantuk khi kan si. 7Ahohmanh nih thlacam in nangmah lei kan hoih lo, ahohmanh nih bawmhnak hal in kan in fuh lo. Kan sinin naa thup i kan sual ruangah na kan kaltak cang.

8Sihmanhsehlaw Bawipa, nangmah cu kan Pa na si. Kannih cu tlak bantuk kan si i nangmah cu um sertu bantuk na si. Nangmah nih kannih cu na kan ser, 9cucaah cun kan cungah fak tuk in na thinhung hlah, kan sualnak zong zungzal in i cinken sawh hlah. Kannih cu na mi kan si, kan zaangfah ko sawh. 10Na khua thiang hna cu thetse ram bantuk an si i Jerusalem cu a rawk i ṭiaotakmi khua a si. 11Kan pu le kan pa hna nih an in thangṭhatnak hmun, hmun dawh le hmun thiang, kan Biakinn cu mei nih a hrawh cang, a nuammi kan hmun cu an rawk dih cang. 12 Bawipa, hi thil nih hin na lung an hnorsuang hrim lo maw? Zeihmanh tuah loin maw na um ko lai kan celh lo tiangin na kan inter ko lai?

⇑

[Remove Footnotes]