JEREMIAH

Jeremiah

Biahmaiṭhi

Profet Jeremiah hi B.C. kum za nga donghnak le za ruk thawhnak hrawng i a rak ummi a si. Saupi rian a ṭuan chungah hin a mi hna cu siasal an biak ruang le an sual ruangah an cung i rawhralnak a tlun lainak kong kha a chimh hna. Cu a chimmi cu amah hmuh hngan hrimhrim ah a hung tling i Babilon siangpahrang Nebukhadnezzar nih Jerusalem le a Biakinn kha a hrawh hna i Judah mi tampi le an siangpahrang cu Babilon ah sal ah a kalpi hna. Cun Judah mi an kir ṭhan te lainak le miphun an si ṭhan te lainak kong zong kha a rak chimchung hna.

Jeremiah hi mi thil hngal kho ngai a si i a miphun kha a daw ngaingaimi a si. An cung i a tlung dingmi thil kha chim a duh hrimhrim lo nain chim lo awk a ṭhat lo caah a chim hna. Pathian nih a profet si awk i a auh ruangah harnak a inmi kong kha lungfak ngaiin a chim hna. Pathian bia cu a lung chungah khan mei bantukin a lin i chim loin a um in a um kho lo.

Jeremiah bia lakah hin a biapi bikbik hna nih cun Jeremiah chan tiang lawng kha si loin Jeremiah chan leng tiang zong kha an chim i cu chan cu biakam thar chan, Pathian mi hna nih saya hau loin Pathian biakamnak an lung chungah an i ṭial lainak kong kha a si (31.31-34).

Tlangpi Hna
Pathian nih Jeremiah a kawh 1.1-19
Siangpahrang Josiah, Jehoiakim, Jehoiachin le Zedekiah      chan ah Jeremiah chimmi bia 2.125.38
Jeremiah chan chungah thil a cangmi hna 26.145.5
Miphun hna cungah ṭhat lonak a tlung dingmi thil kong 46.151.64
Jerusalem rawhnak 52.1-34

Jeremiah 1

1Jeremiah bia, amah cu Benjamin ram chung Anathoth khua i a ummi tlangbawi hna chung mi Hilkiah fapa a si; 2Amah sinah cun Bawipa bia cu Judah siangpahrang Amon fapa Josiah a bawi kum hleithum kum ah a phan; * 3Judah siangpahrang Josiah fapa Jehoiakim chan zongah khan a phan i Josiah fapa Zedekiah, Judah siangpahrang, a bawi kum hleikhatnak a dongh tiang khan a phan. Cu kum thla nganak chungah khan Jerusalem mi cu sal ah khan kalpi an si. *

Pathian Nih Jeremiah A Auhnak le Jeremiah Nih Langhnak A Hmuhmi Pathian

4Cun Bawipa bia cu ka sinah a ra i, 5“Paw chung i kan ser hlanah kan hngalh i na chuah hlanah kan thianter cang;

Nangmah cu miphun hna ca i profet ah kan chiah cang,” tiah ati.

6Khi tikah kei nih ka thawh i, “Aa, Bawipa Pathian ! Zohhmanh, ngakchiate men ka si i biachim ka thiam lo,” tiah ka ti.

7Sihmanhsehlaw Bawipa nih a ka thawh i, “Ngakchiate men ka si, ti hlah; Zeicahtiah cu hna sinah cun va kal, tiah kan tinak ah na kal lai i nawl kan pekmi paoh kha na chim lai.

8Annih cu ahohmanh ṭih hna hlah. Zeicahtiah na sinah ka um i kan huhphenh lai”, tiah Bawipa nih a ti.”

9Khi tikah Bawipa nih a kut cu a hun samh i ka ka kha a tawngh; cun Bawipa nih cun a ka thawh i, “Zohhmanh, ka bia cu na ka chungah ka chiah cang hna. 10Zohhmanh nihin ah hin nangmah cu miphun hna cung le pennak hna cungah, phawi awk le ṭheh awkah, hrawh awk le hral awkah, sak awk le phun awkah kan chiah cang,” tiah a ti.

Langhnak Pahnih

11Cun Bawipa bia cu ka sinah a ra i, “Jeremiah, zeidah na hmuh?” tiah a ti. 12Cun kei nih, “Tuan tein a parmi almond kung ka hmuh,” tiah ka ti. “Na hmaan, zeitintiah kaa tinhmi kha tlinter awkah tuan tein ka tho,” tiah a ti. 13 Bawipa bia cu a voi hnihnak ka sinah a phan ṭhan i, “Zeidah na hmuh?” tiah a ti. Cun kei nih, “A tlok hluahmahmi um, chaklei in hika leiah a sawnmi ka hmuh,” tiah ka ti. 14Cun Bawipa nih a ka thawh i, “Hi ram chung i a ummi vialte hna cungah chaklei in ṭhat lonak a rung tlung lai. 15Zeicahtiah zohhmanh, chaklei ram hna chung i a ummi miphun vialte kha ka kawh hna, tiah Bawipa nih a ti; cun annih cu an ra lai i Jerusalem kutka luhnak hna ah khan le a velchum vampang vialte hna pawng le Judah ram khua vialte ah khan an bawiṭhutdan cu an chiah cio hna lai. 16Keimah kha an ka hlawt i pathian dang hna sinah zihmui an khangh i anmah kut lila in sermi an biaknak ṭhat lonak vialte ruangah an cungah ka biakhiahnak cu ka chim lai. 17Sihmanhsehlaw nang cu na lung ṭhawng ko, tho law nawl kan pekmi vialte kha chim hna. Annih ruangah na lung dong hlah, atu i na lung a dongh ahcun an hmaika i na um tikah na lung kaan donghter chinchin sual lai. 18Nihin ah hin nangmah cu, Judah ram siangpahrang hna le bawi hna le tlangbawi hna le mi zapi hna he aa tawng dingah kan ser, kulhmi khuapi, thir tung le dar vampang bantuk na si lai. 19Annih nih nangmah cu an in tuk lai, sihmanhsehlaw na sinah ka um i kan huhphenh lai caah an in tei lai lo, tiah Bawipa nih a ti,” tiah a ti.

⇑

[Remove Footnotes]