Jeremiah 29

Jeremiah Nih Saltangmi Kha Ca A Kuat Hna

1Profet Jeremiah nih Jerusalem khua in, saltangmi hna an upa hna le tlangbawi hna le profet hna le mi vialte hna, Nebukhadnezzar nih Jerusalem in Babilon ah a kalpimi hna kha ca a kuat hna. * 2Mah cucu Jekoniah * siangpahrang le a nu siangpahrang bawinu le tilditmi hna le Judah le Jerusalem bawi hna le zungthiam hna le soser hna kha, Jerusalem khua in an kal hnuah a ṭialmi a si. 3Judah siangpahrang Zedekiah nih cun Safan fapa Elasah le Hilkiah fapa Gemariah cu cu ca he cun Babilon siangpahrang Nebukhadnezzar sinah a thlah hna. Profet nih a ṭialmi cu hihi a si:

4“Ralkapbu Bawipa, Israel Pathian nih hitin a ti: Jerusalem in Babilon ah sal ah ka kaltermi vialte hna sinah, 5Inn rak i sak hna u law a chungah rak um ko hna u; dum rak i ser hna u law, a chuakmi rak ei ko hna u, 6nupi rak i ṭhit hna u law fapa hna le fanu hna rak ngei ko hna u; nan fapale kha nupi rak ṭhitpiak hna u law nan fanule kha va rak ngeihter hna u law, fanu hna le fapa hna kha rak hring ko hna seh, khaka ah khan nan karhcho i a zorlei nan si nakhnga lo. 7Sal ah kan tanternak hna khuapi kha a ṭhatnak ding kawl cio u law kha khua caah khan Bawipa sinah thla cam cio ko u; zeicahtiah a ṭhat ahcun nannih zong ṭhatnak nan hmu ve lai. 8Hi bangin Ralkapbu Bawipa, Israel Pathian nih a ti: Nan lak i a ummi profet hna le litin thiam hna kha i hlenter hna hlah u, mangmanh nan fialmi hna mifim kha an bia ngaihpiak hna hlah u. 9Annih nih ka min in lih an in chimh hna, annih cu ka thlahmi an si lo, tiah Bawipa nih a ti.

10“Mah hihi Bawipa chimmi bia cu a si: Babilon cungah hin kum sawm sarih kha a tlin tikah nan bia cu kan lakpiak ṭhan hna lai i thil ṭha nan cungah ka tlunter lai ti in bia kan kammi hna kha ka tlinter lai i hi hmun ah hin kan kirpi ṭhan hna lai. * 11Nan ca i ka tinhmi cu keimah lawnglawng nih ka hngalh, tiah Bawipa nih a ti. Cucu vanchiatnak si loin thluachuahnak a si lai i nan hnu i a rung um ding tefa tampi kong a si lai. 12Nan ka hal i ka sinah thla nan cam ahcun nan bia kan ngaihpiak hna lai. 13Nan ka kawl tikah nan ka hmuh lai; nannih nih nan lung dihlak in nan ka kawl tikah * 14keimah cu nan ka hmuh lai, tiah Bawipa nih a ti. Cun nannih cu nan vanṭhatnak kha kan pek ṭhan hna lai i miphun vialte hna sin le hmun kip i kan ṭhawl hnanak hmun khan kan pumh ṭhan hna lai i saltannak chungah kan kalter hnanak hmun khan cuka i nan rak kalnak nan ram ah khan kan kirpi ṭhan hna lai, tiah Bawipa nih a ti.

15“Nannih nih, Babilon ah Bawipa nih profet a kan pek ve ko, nan ti. 16David bawiṭhutdan ah a ṭhumi siangpahrang kong ah le hi khua chungah khua a sami, nan sinah saltannak chungah a kal lomi nan phunhawi mi hna kong i Bawipa bia hi ngai tuah u: 17Mah hihi Ralkapbu Bawipa bia cu a si: An cungah vainam le mangṭam le rai kha ka tlunter lai i theipi ṭhalo, a ṭhat lo tuk ca i ei awk tlak a si lomi bantuk ah ka ser hna lai. 18Annih cu vainam le mangṭam le rai in ka zulh hna lai i vawlei cung ram kip ah tuksapur ah ka ser hna lai, ka ṭhawl hnanak miphun kip sinah khan fihnung le ṭeifiak, zawmhtaih awk le nihsawh awkah ka ser hna lai. 19Hihi an cungah a tlung lai, zeicahtiah annih sinah ka profet kha ka thlah lengmang ko hna nain, ka bia kha an ngai duh lo, tiah Bawipa nih a ti. 20Sihmanhsehlaw nannih saltangmi hna, Babilon ah Jerusalem in ka kaltermi hna, keimah Bawipa bia hi ngai tuah u:

21“Nan sinah lih in bia a chimmi Kolaiah fapa Ahab le Maaseiah fapa Zedekiah kong ah Ralkapbu Bawipa, Israel Pathian bia cu hi bangin a si: Annih cu Babilon siangpahrang Nebukhadnezzar kut ah ka chanh hna lai i nan mithmuh hrimhrim ah a thah hna lai. 22Jerusalem in Babilon ah sal ah kalpimi hna nih, chiat ser an duh tikah, ‘Babilon siangpahrang nih a nung in a kiaomi Zedekiah le Ahab bantukin Bawipa nih na cungah tuah seh,’ tiah an ti lai. 23Annih nih mihrut bantukin thil an tuah caah hi ṭhat lonak hi an cungah a tlung lai — mi nupi cung sualnak an tuah i ka min in lih an chim. Mah hihi Bawipa duhnak he aa ralchanhmi a si; an tuahmi cu ka hngalh i an cungah tehte ka si, tiah Bawipa nih a ti.”

24-25Ralkapbu Bawipa, Israel Pathian nih, Nehelam fapa Shemaiah sin i va chim awk bia a ka pek. Nehelam nih cun Jerusalem khuami vialte hna le Maaseiah fapa profet Zefaniah le tlangbawi dang vialte hna sinah khan amah min in ca a rak kuat i a ca chungah cun Shemaiah nih khan Zefaniah cu 26 Bawipa nih Jehoiada hmun ah khan tlangbawi ah an ser cang i atu cu biakinn chungah bawi bik na si cang. Cucaah na rian cu profet ka si aa timi, mihrut hna paoh kha thir cincik in khih le an hngawng i thirkual oih kha a si lai. 27Zeicahdah Anathoth khuami Jeremiah, mi sinah profet biachim in bia a chim lengmangmi cungah khan zeihmanh na tuah bal lo? 28Babilon i a ummi hna kha, khika ah khan saltang saupi nan si lai caah inn le lo i khuar hna u law dum i ser hna u law, nan cinthlakmi khan i cawm hna u, tiin ca a kuat hna caah amah kha thlauh hrimhrim awk a si,” a ti

29Cu ca cu Zefaniah nih khan a ka relpiak i 30 Bawipa nih a ka thawh i 31hi bia Nehelam mi Shemaiah kong bia hi, Babilon i a ummi saltang vialte kha kua hna a ka ti: 32“Keimah Bawipa nih, Shemaiah le a tefa vialte cu dan ka tat hna lai. Amah cu ka thlahmi a si lo. Asinain profet bantukin bia a chim hna i lih kha a zumhter hna. Nan lakah tefa zeihmanh a ngeih hna lai lo. Ka mi hna cu, keimah doh awk kha a fial hna caah ka mi hna ca i thil ṭha ka tuah ding kha a thih hlanah a hmu manh hna lai lo. Keimah Bawipa nih hi bia cu ka chim,” tiah a ka ti.

⇑

[Remove Footnotes]