JONAH

Jonah

Biahmaiṭhi

Jonah cauk hi Baibal chung i profet dang cauk hna he an i lo lo; zeicahtiah hi cauk nih hin a chimmi cu Pathian fialmi tuah a duh lomi profet kong kha a si ko. Pathian nih Jonah cu Israel ral a simi Assiria khualipi Nineveh ah khan kal a fial. Sihmanhsehlaw Jonah nih cun a duh lo, Pathian nih ka hrawh lai a timi kha a hrawk taktak ṭung lai lo, tiah a ruah.

A donghnak ah cun a duh lo nain a kal i a rawk lai tiah a chimmi kha a tlin ṭung lo caah a ing a puang.

Hi cauk hmete nih hin Pathian cu zeizong vialte uktu a si ko nain, dawtnak le zaangfahnak Pathian a si i a mi Israel mi hna an ral hna hmanh kha, hrawh nakin ngaihthiam le khamh kha a duh deuh, ti kha a langhter.

Tlangpi Hna
Jonah auhnak le a duh lonak 1.1-17
Jonah ngaihchihnak le luatnak 2.1-10
Jonah nih Nineveh khua bia a chimh 3.1-10

Jonah 1

Bawipa Sinin Jonah A Zam

1 Bawipa bia cu Amittai fapa Jonah sin a phan i: * 2“Nineveh khualipi ah cun va kal tuah, atu ah va kal law a ṭhat lonak nih khan a cerh in a ka cerh caah va si,” tiah a ti. 3Sihmanhsehlaw Jonah cu Bawipa sinin zam awkah khan Tarshish khua lei tu i kal awkah aa thawh. Joppa khua ah khan a va kal i khika ah Tarshish khua lei i a kal dingmi lawng pakhat kha a hmuh. A kalnak ding man kha a pek dih in lawng kha aa cit i Bawipa nih a phak khawh lonak Tarshish khua ah khan, cu lawng cun ka kal lai, tiah a ruah. 4Sihmanhsehlaw Bawipa nih thlichia a hranter cimmam i rili tilet cu a san tuk caah lawng cu kuai dih hnik aa zal. 5Lawng cawngtu pawl cu an thin a phang i an pathian sin cio ah khan bawmhnak hal awkah an au. Cun lawng kha zaanter deuh awkah thil kha an hlonh hna, sihmanhsehlaw Jonah tu cu tilawng chung a ken khat ah khan a vung kal i a it i aa hngilh ziar ko.

6Lawng cawngtu hna haotu nih khan a hmuh i, “Naa hngilh hluahmah ko dah ngai! Tho law na pathian sinah thlacam ve hen, a hei kan zaangfah ahcun thi loin kan hei um phum ko hnga dah kaw,” tiah a ti.

7A hmanung bik ah lawngcawng hna nih cun an i thawh i, “Hi vanchiatnak kan tonmi hi aho ruangah dah a si hnga, camcawhfung kan zuk tuah lai,” an ti. Cucaah camcawhfung cu an khiah i Jonah cungah khan a tla. 8Cun annih nih an thawh i, “Kha, atu cu hi harnak kan tonmi kong ah hin ahodah mawhchiat awk a si, ti kha kan chim tuah. Zei rianṭuan dah na si? Khuazei in dah na rat? Khuazei rammi dah na si? Zei miphun dah na si?” tiah an ti. 9Cun Jonah nih cun aa thawh i, “Kei cu Hebru mi ka si, Bawipa, vancung Pathian, rili le vawlei a sertu a biami ka si,” tiah a leh hna. 10Lawngcawng pawl cu an thin a phang i, “Zei thil ṭhalo dah na tuah?” tiah an ti. Annih cu a chimh hna caah Bawipa sinin a zam kha an hngalh.

11Thlichia cu a fak chin lengmang i cucaah lawngcawng pawl nih cun an thawh i “Rili hi a daih nakhnga, zeitindah kan in tuah lai?” an ti. 12Cun annih cu a thawh hna i, “Ka tlai u law ka hlonh u law, rili cu a dai ko lai. Hi thlichia nih an cil hna hi keimah ruangah a si ti kha ka hngalh,” tiah a ti. 13Lawngcawng pawl nih khan lawng cu tikam i chuahpi awkah fak piin an zah, sihmanhsehlaw thlichia cu a fah chin lengmang caah an tuah kho lo. 14Cucaah Bawipa cu an auh i, “Maw Bawipa, hi mipa hi kan thihter ruangah kannih cu kan that hlah; zeicahtiah zeidah kan tuah awk a si kha a kan hmuhsaktu cu maw Bawipa nangmah na si,” tiah an ti. 15Cun Jonah cu an i lak i rili chungah cun an hlonh i chikkhatte ah tilet cu a dai. 16Cucaah Bawipa cu lawngcawng pawl nih cun an ṭih i raithawinak kha an pekchanh i a sinah biakamnak kha an tuah.

17 Bawipa nih Jonah cu nga nganpi kha a dolhter i nga paw chungah cun ni thum le zan thum a um. *

⇑

[Remove Footnotes]