JOSHUA

Joshua

Biahmaiṭhi

Joshua cauk chungah hin Israel mi nih Kanaan ram an laknak kong kan hmuh. Cu lio i a hruaitu hna cu Moses a hun chaangtu Joshua kha a si. Hi cauk chungah hin Jordan Tiva an tannak tehna, Jeriko khua an laknak tehna, Ai khua an tuknak tehna, le Pathian le a mi hna a thar in bia an i kamnak tehna kha kan hmuh. Hi cauk chung i biatlang sunglawimi cu 24.15 hi a si.

Tlangpi Hna
Kanaan ram teinak 1.112.24
Ram cheunak 13.121.45
     a. Jordan nichuahlei ram 13.1-33
     b. Jordan nitlaklei ram 14.119.51
     c. Himnak khua 20.1-9
     d. Levi mi hna khua 21.1-45
Jordan nichuahlei phun pawl an ram ah an kir 22.1-34
Joshua rovuih bia 23.1-16
Shekhem ah an biakam an tharchuah 24.1-33

Joshua 1

Kanaan Ram Teinak Caah Timhnak

1 Bawipa sal Moses thih hnuah, Moses rianṭuantu Joshua, Nun fapa cu, Bawipa nih a chawnh i, 2“Ka sal Moses cu a thi cang; cucaah nangmah le hi mi vialte hna hi tho u law, hi Jordan tiva hi tan u law, anmah, Israel mi hna ka pek laimi ram chungah cun lut tuah u. 3Nan keza nih a lamh laimi hmun paoh cu, Moses sinah bia ka rak kam bang khan, nanmah kan pek cang hna. * 4Ramlak le hi Lebanon tlang in tiva ngan Zufrates tiang, Hit mi hna ram vialte nitlaknak leiah Rili Ngan tiang; nan ram a si lai. 5Na nunchung vialte ahohmanh na hmai i a dir khomi an um lai lo; Moses sinah ka um bang khan, nangmah sin zongah ka um lai; kan deuh lai lo i kan hlaw fawn lai lo. * 6Ṭhawng ngai le ralṭha ngaiin um tuah; zeitintiah an pupa hna sinah pek awkin chiat ka rak ser cangmi ram hi, hi mi hi na coter hna lai. * 7Moses ka sal nih nawl an pekmi phungbia vialte ningin ralring tein tuah awkah, a ṭhawn bel ṭhawng ngai le ralṭha ngaiin um ko; khuazei ka na kalnak hmanh ah khuaawng na pemh nakhnga, orhlei ah siseh kehlei ah siseh i mer hlah. 8Hi phungbia cauk nih hin na kaa kha chuahtak hlah seh; sihmanhsehlaw a chungah aa ṭialmi vialte ningin tuah awkah ralring tein na um nakhnga, chunzan in mah cucu na ruat lai; zeitintiah khi tikah na lam kha na tluanter lai i khi tikah khua awng na tong lai. 9Keimah nih nawl kan pek a si lo mei? Ṭhawng ngai le ralṭha ngaiin um ko; na thinphang hlah, na lung zong dong hlah; zeicahtiah Bawipa na Pathian cu khuazeika na kalnak hmanh ah na sinah a um ko,” tiah a ti.

10Cun Joshua nih mi zapi chung i an bawi hna cu, 11“Riahhmun chungah khan i chawk u law, mi zapi kha, ‘Riahcaw i tim tuah u; zeitintiah ni thum chungah, Bawipa nan Pathian nih co awkah an pekmi hna ram cu va co awkah hi Jordan hi nan tan lai,’ tiah chim hna u,” tiah nawl a pek hna.

12Cun Reuben mi hna le Gad mi hna le Manasseh phun cheu hna sinah khan Joshua nih, * 13 Bawipa sal Moses nih, ‘ Bawipa nan Pathian nih dinhnak hmun an pek hna i hi ram hi an pek hna lai,’ tiin nawl an pekmi hna kha i cinken tuah u. 14Nan nupile hna le nan fale hna le nan saṭil cu Jordan tiva ral Moses nih an pekmi hna ram ah hin an rung tang lai; sihmanhsehlaw nannih lak i miralṭha vialte cu ralthuam in i thuam in, nan unau hna hmaiah nan kai lai i nan bawmh hna lai, 15 Bawipa nih nan unau hna cu nanmah bantukin dinhnak a pek hna i Bawipa nan Pathian nih a pek liomi hna ram cu annih zong nih an co hlantiang nan bawmh hna lai. Cun Bawipa sal Moses nih a pekmi hna Jordan ral nichuahlei kam i a ummi ram, nanmah ta a simi ram ah cun, nan kir lai i nan co lai,” tiah a ti. 16Cun Joshua cu an leh i, “Nawl na kan pekmi paohpaoh cu kan tuah lai i khuazei hmanh ah na kan thlahnak paoh ah kan kal lai. 17Moses kha zeizong vialte ah a bia kan ngaih bantuk tein nangmah bia zong kan ngaih lai; amah belte, Bawipa na Pathian cu Moses sinah a rak um bang khan na sinah um ve ko seh! 18Zei na fial paoh ah na nawlbia kha a ralchanh i na bia kha a almi cu ahohmanh thah a si lai. A ṭhawn bel ṭhawng law, ralṭha ngaiin um ko,” tiah an ti.

⇑

[Remove Footnotes]