BIACEIHTU

Judges

Biahmaiṭhi

Biaceihtu Hna timi cauk hi Israel mi nih Kanaan ram ah an luh i khuasak hram an i thawk in siangpahrang an ngeih tiang caan karlak kong kha a si. Hi cauk chungah a tam bik kan hmuhmi cu an phun hruaitu hna biaceihtu timi hna rian ṭuannak kong kha a si. Hi hruaitu hna hi ralkap hruaitu an si deuh i biaceihtu ti nakin ralkap hruaitu ti ah ahmaan deuh hnga.

Hi cauk cawnpiaknak ngan bik pakhat cu Israel mi hna hi an nun khawhnak caah Pathian an i bochan a hau i Pathian cungah zumhawktlak loin an um paoh ah rawhralnak an tong ti hi a si. Asinain cu nak hmanh in a biapi chinchinmi pakhat cu, an Pathian sinah zumhtlak loin an um i rawhralnak nih a tlunhnawh hna hnu hmanh ah, Pathian nih a mi hna cu an i ngaihchih paoh ahcun ngaihthiam le khamh kha a duh zungzal i aa tim zungzal ko, ti hi a si.

Tlangpi Hna
Joshua thih tiang thil a cangmi hna 1.12.10
Israel biaceihtu hna 2.1116.31
Thil dangdang a cangmi 17.121.25

Biaceihtu 1

Judah le Simeon Nih Adonibezek An Tlaih

1Joshua a thih hnuah Israel mi nih Bawipa kha an hal i, “Kanaan mi hna kha doh awkah ahodah kan caah a hmasa bik ah a kal lai?” tiah an ti. 2 Bawipa nih, “Judah a hung kal lai; zohhmanh u, ram cu amah kut chungah ka pek cang,” tiah a ti. 3Cun Judah nih a unau Simeon sinah cun, “Kanaan mi kha kan hung doh hna nakhnga, keimah covo ram ah cun hung ka kalpi tuah; cun cu bantuk ṭhiamṭhiam in kei zong nih na covo ram ah cun kan kalpi ve lai,” tiah a ti. Cucaah Simeon nih a hun kalpi. 4Cun Judah cu a hung kal i Kanaan mi hna le Periz mi hna cu Bawipa nih an kut chungah a pek hna i Bezek khua ah an mi sang khat an tei hna. 5Bezek khua ah cun Adoni-bezek an hmuh i an doh i Kanaan mi le Periz mi cu an tei hna. 6Adonibezek cu a zam; sihmanhsehlaw an dawi i an tlaih i a siapi hna le a kepi hna kha an tan. 7Cun Adonibezek nih cun, “An siapi hna le an kepi hna tan a simi siangpahrang sawm sarih nih ka cabuai toiah rawl ṭiltlawt an char tawn; ka rak tuah bangin Pathian nih a ka rulh ve cang,” tiah a ti. Jerusalem ah an ratpi i khika ah a thi.

Judah Nih Jerusalem le Hebron Khua A Lak Hna

8Cun Judah mi nih Jerusalem cu an doh i an lak i vainam in an sam cikcek i khuapi cu mei in an khangh. 9Cun a hnuah, tlangram le Negeb le rawnram i a ummi Kanaan mi hna kha doh awkah Judah mi hna cu an ṭum. 10Cun Hebron i a ummi Kanaan mi hna cu Judah mi nih cun an fuh hna i Sheshai le Ahiman le Talmai kha an tei hna. (Hebron cu, hlanah cun a min ah Kiriath-arba a si).

Othniel Nih Debir Khua Kha A Tei i Aksah Kha A Co

(Jos 15.15-19)

11Khika in Debir i a ummi kha an hei fuh hna. Debir cu, hlanah cun a min ah Kiriath-sefer a si. 12Cun Kaleb nih, “Kiriath-sefer kha a chim i a la khomi cu ka fanu Aksah kha nupi ah ka pek lai,” tiah a ti. 13Cun Kaleb nau Kenaz i fapa Othniel nih a lak i a fanu Aksah cu nupi ah a pek. 14Cun Aksah cu a sinah a rat tikah Othniel cu Aksah nih a pa kha ram hal awkah a fial; Aksah cu a laa cungin a ṭum i Kaleb nih a sinah, ‘Zeidah na duh?” tiah a ti. 15Cun anih nih, “Laksawng pakhat in ka pe tuah; Negeb ram chungah na ka chiah caah tiput zong ka pek chih tuah hna,” tiah a ti. Cun Kaleb nih chaklei tiput hna le thlanglei tiput hna kha a pek chih.

Judah le Benjamin Nih An Teimi Khua Hna

16Cun Moses pu, Ken miphun a simi i a tefa hna kha ungkung khua in Negeb chung i a ummi Arad pawng i a ummi Judah ramlak ah khan Judah mi hna he an hung kal i an lakah cun an hung um. 17Cun Judah cu a unau Simeon he an hung kal i Zefath i a ummi Kanaan mi hna cu an hung tei hna i an hrawh cikcek. Cucaah cu khua min cu Hormah ti a si. 18Cun Judah nih Gaza le a pawngkam ram. Ashkelon le a pawngkam ram le Ekron le a pawngkam ram hna zong cu a lak hna. 19Cun Bawipa cu Judah sinah a um i tlangram i a ummi hna cu a dawi hna, sihmanhsehlaw rawn i a ummi hna cu, thir rangleng hna kha an ngeih caah an dawi kho hna lo. 20Cun Moses nih a rak chim bang khan Hebron cu Kaleb an pek i Anak fapa pathum hna kha, cu ka cun a dawi hna. 21Sihmanhsehlaw Benjamin mi nih Jerusalem i a ummi Jebus mi kha an dawi hna lo; cucaah nihin tiangin Jebus mi cu Benjamin mi hna he Jerusalem ah an um. *

Josef Hrin Nih Bethel An Tei

22Josef hrin hna zong nih Bethel an hung doh i Bawipa cu an sinah a um. 23Cun Josef hrin hna nih cun Bethel kha ngiatthlai awkah mi an thlah hna. (Cu khua min cu, hlan ah cun Luz ti a si). 24Cun mingiathlaitu hna nih cun mipa pakhat khua chungin a chuah kha an hmuh i, “Zaangfahnak in, khua chung luhnak lam kan hmuhsak tuah, cun nangmah cu ṭha tein kan in ti ve te lai,” tiah an ti. 25Cun khua chung luhnak lam cu a chimh hna; khua cu vainam in an sam cikcek, sihmanhsehlaw mipa le a innchungkhar vialte cu an thlah hna. 26Cun cu pa cu Hit mi ram ah a kal i khua pakhat a tlak i a min ah Luz a sak; nihin ni tiang hin mah cu cu a min a si ko.

Manasseh le Efraim Nih An Teimi Khua Hna

27Manasseh nih Beth-shean le a khuate hna i a ummi si hna seh, Taanak le a khuate hna i a ummi si hna seh, Dor le a khuate hna i a ummi si hna seh, Ibleam le a khuate hna i a ummi si hna seh, Megiddo le a khuate i a ummi si hna seh, a dawi hna lo; sihmanhsehlaw Kanaan mi hna cu cu ram ah cun an i benh peng ko. * 28Israel mi cu an hung ṭhawn tikah Kanaan mi hna cu hnekmi rian an ṭuanter hna, sihmanhsehlaw an dawi dih cikcek hna lo.

29Efraim nih Gezer i a ummi Kanaan mi kha an dawi hna lo; sihmanhsehlaw Kanaan mi cu an lakah Gezer ah cun an um ko. *

A Taang Rihmi Phun Hna Nih An Teimi Khua Hna

30Zebulun nih Kitron i a ummi si hna seh, Nahalal i a ummi si hna seh an dawi hna lo; sihmanhsehlaw Kanaan mi hna cu an lakah an um ko i hnekmi rian kha an ṭuan.

31Asher nih Akko i a ummi si hna seh, Sidon i a ummi si hna seh, Ahlab i a ummi si hna seh, Akzib i a ummi si hna seh, Helbah i a ummi si hna seh, Afik i a ummi si hna seh, Rehob i a ummi si hna seh a dawi hna lo; 32an dawi hna lo caah khan Asher mi hna cu Kanaan mi hna lakah cun an um ko.

33Naftali nih Beth-shemesh i a ummi si hna seh, Beth-anath i a ummi si hna seh a dawi hna lo, sihmanhsehlaw cu ka ram i a ummi Kanaan mi hna lakah cun a um; sihmanhsehlaw Beth-shemesh le Beth-anath i a ummi hna cu an caah hnekmi rian ṭuanpiaktu ah an cang.

34Amor mi nih Dan mi hna cu tlangram ah an dawi ṭhan hna, rawn i rung ṭum cu an onh hna lo; 35Amor mi hna cu Har-heres, Aijalon le Shaalbim ah cun an i benh peng ko, sihmanhsehlaw Josef hrin hna kut cu an cungah a rit i hnekmi rian ṭuanpiaktu ah an cang. 36Cun Amor mi hna ramri cu Akrabbim i hung kainak le Sela le a cunglei in a kal.

⇑

[Remove Footnotes]