LEVITIKAS

Leviticus

Biahmaiṭhi

Levitikas hi tlangbawi hna rian ṭuannak kong a si bik. Pathian biak tik le raithawinak pekchanh tikah tlangbawi pawl nih an zulh awk phung le lam kha an si bik.

Hi cauk nih biapi bik ah a chiahmi cu Pathian a thiannak kongle a mi Israel mi nih cu Pathian thiang cu zeitindah an biak awk a si ti kha a si.

Hi cauk chungah hin hngalh bikmi bia cu 19.18 i a ummi, Jesuhnih Nawlbia ngan bik pahnihnak a timi kha a si i cucu, “Na innpa kha nangmah naa dawt bantukin na dawt lai,” ti kha a si.

Tlangpi Hna
Thawhlawm le raithawinak peknak phungbia 1.17.38
Aaron le a fapa hna tlangbawi ah an fehter hna 8.110.20
Phung lei in thiannak le thian lonak 11.115.33
Tlanhnak Ni 16.1-34
Nunning le biaknak ah thianhlimnak phung hna 17.127.34

Levitikas 1

Khangh Thawinak Kong

1 Bawipa nih Moses cu a kawh i tonnak thlam chungin a chawnh i hi bangin a ti: 2“Israel mi hna sinah cun chim law, annih sinah: Nannih lakah ahohmanh nih Bawipa sinah pekchanhnak nan tuah tikah saṭil pekchanhnak cu cawrun chungin siseh, tuurun chungin siseh, nan rak put lai, ti hna.

3“A pekchanhnak cu cawrun chungin khangh thawinak a si ahcun, a tum do a tlami kha pek a si lai; Bawipa hmaiah amah cu cohlan a si nakhnga tonnak thlam innka ah cun a pek lai; 4amah nih khangh thawinak sa a lu cungah cun a kut a chiah lai i amah caah remnak tuahnak caah cohlanpiak a si lai. 5Cun Bawipa hmaiah cawtum kha a thah lai i Aaron fapa hna, tlangbawi hna nih khan, sa thi cu an pek lai i, tonnak thlam innka i a ummi biakṭheng kha a velchum in an theh lai. 6Cun khangh thawinak sa cu a phaw a hawh lai i a can cikcek lai; 7cun tlangbawi Aaron fapa hna nih cun biakṭheng cungah cun mei an kau lai i a ningcang tein mei cungah cun thing an chiah lai; 8cun Aaron fapa hna tlangbawi hna nih cun biakṭheng cung mei cung thing cungah cun sazam hna cu, a lu le a thau cu a ningcang tein an chiah hna lai; 9sihmanhsehlaw a chungril hna le a ke hna cu ti in an ṭawl hna lai. Cun tlangbawi nih a dihlak in khangh thawinak caah biakṭheng cungah a khangh lai; mei in thawinak, Bawipa caah rimthaw a si lai.

10“Khangh thawinak ca i a pekchanhmi cu tuurun chungin siseh, meheh run chungin siseh a si ahcun, a tum dotla a si lai; 11cun Bawipa hmaiah a ummi biakṭheng chaklei kamah a thah lai i Aaron fapa hna tlangbawi hna nih khan a thi cu biakṭheng kha a velchum in an theh lai. 12Cun a can cikcek lai, a lu he a thau he, cun tlangbawi nih biakṭheng cung mei cung thing cungah cun a ningcang tein a chiah hna lai; 13sihmanhsehlaw a chungril le a ke hna cu ti in a ṭawl hna lai. Cun tlangbawi nih a dihlak te cun a pek lai i biakṭheng cungah a khangh lai; khangh thawinak, mei in thawinak, Bawipa caah rimthaw a si lai.

14 Bawipa sin i a pekchanhmi cu vate khangh thawinak a si ahcun, a pekchanhmi ṭhuro si hna seh laileng no si hna seh a rak put hna lai. 15Cun tlangbawi nih biakṭheng ah a rak put lai i a lu cu cat lak in a merh lai i biakṭheng cungah a khangh lai; cun a thi cu biakṭheng sirah cun a thlor lai; 16cun a cok cu a hmul he a lak lai i biakṭheng pawng i nichuahlei kam vutcam chiahnak hmun ah cun a hlonh lai; 17a thlaki a thlongh hna lai, sihmanhsehlaw a pum cu a cheu lai lo. Cun tlangbawi nih biakṭheng cungah cun, mei cung thing cungah cun a khangh lai; mah cucu khangh thawinak, mei in thawinak, Bawipa caah rimthaw cu a si.

⇑

[Remove Footnotes]