Levitikas 2

Changvut Thawinak Kong

1“Ahohmanh nih changvut thawinak kha Bawipa sin i thawinak ah a rak put tikah, a pekchanhmi cu changvut dipmite a si lai; chiti a toih lai i frankinsen a toih lai i 2Aaron fapa hna tlangbawi hna sinah khan a rak put lai. Cun cu chung cun changvut dipmi le chiti cu a frankinsen vialte he pei khat in a lak lai; cun tlangbawi nih cun mah hi cu hngalh camcinnak caah biakṭheng cungah a khangh lai; mei in thawinak, Bawipa caah rimthaw a si lai. 3Cun changvut thawinak chungin a taangmi cu Aaron le a fapa hna caah a si lai; mah hi cu mei in thawinak Bawipa sin pekmi hna lakah a thiang bik a si ve.

4“Changreu rawhnak um chung i rawhmi changvut thawinak cu na pekchanh tikah, thilnu telh lo changvut dip chiti he cawhmi changreu a si lai, asiloah, thilnu telh lo changreu pan chiti thuhmi a si lai. 5Na pekchanhmi cu u-kang chungah reumi changvut thawinak a si ahcun, thilnu telh lomi changvut dip chiti he cawhmi a si lai; 6na hmal cikcek lai i chiti na toih lai; mah cucu changvut thawinak a si. 7Cun na pekchanhmi cu um in chuanmi changvut thawinak a si ahcun changvut dip le chiti in na ser lai. 8Hi thil in sermi changvut thawinak cu Bawipa sinah na rak put lai; tlangbawi sinah na chanh tikah biakṭheng ah a kalpi lai. 9Cun tlangbawi nih changvut thawinak chung cun hngalh camcinnak kha a lak lai i biakṭheng cungah a khangh lai; mah cucu mei in thawinak, Bawipa caah rimthaw a si lai. 10Cun changvut thawinak chungin a tangmi cu Aaron le a fapa hna caah a si lai; mah hi cu mei in thawinak Bawipa sin pekmi hna lakah a thiang bik a si ve.

11 Bawipa sinah nan rak putmi changvut thawinak paohpaoh cu thilnu telh in sermi a si lai lo; zeitintiah thilnu siseh khuaihliti siseh Bawipa sinah mei in thawinak caah nan khang lai lo. 12Theitlai hmasa bik thawinak caah cun Bawipa sinah nan rak put ko hna lai, sihmanhsehlaw rimthaw caah cun biakṭheng cungah nan khang hna lai lo. 13Nan changvut thawinak vialte cu cite nan phulh hna lai; nan Pathian he biakamnak cite cu nan changvut thawinak vialte chungin nan bauter lai lo; nan pekmi vialte sinah cite nan pek chih lai.

14 Bawipa sinah theitlai hmasa bik hna changvut thawinak nan pek ahcun, nan theitlai hmasa bik hna changvut thawinak caah cun a voi tharmi chungin lakmi, mei in reu i rialmi fang nan pek lai. 15Cun chiti nan toih lai i frankinsen nan toih ve lai; mah cucu changvut thawinak pakhat a si. 16Cun tlangbawi nih hngalh camcinnak caah cun rialmi fang le chiti cawhmi a cheu cu, frankinsen a dihlak he, a khangh lai; mah cucu Bawipa sinah mei in thawinak a si.

⇑

[Remove Footnotes]