Levitikas 5

1“Ahohmanh nih thil a hmuhmi ah siseh, a hngalhmi ah siseh, hngaltu a si i zapi hmaiah chiatsertertu aw a theih zongah a chim duh lo ahcun, a sual a ṭhat lonak kha amah nih a in lai. 2Cun, ahohmanh nih a thiang lomi thil, a thiang lomi saram ruak siseh, a thiang lomi saṭil ruak siseh, a thiang lomi a lawnmi ruak siseh a tongh i amah nih a hngalh lo i aa buar ahcun, amah nih a hun hngalh cangka in a mawh lai. 3Cun ahohmanh nih minung thian lonak, zei bantuk thian lonak phun hmanh in thianglo si ai kun, cun amah nih a hngalh lo i a buar ahcun, amah nih a hun hngalh tikah a mawh lai. 4Cun ahohmanh nih ṭhat lonak tuah awk siseh, ṭhatnak tuah awk siseh, i ruat cungcang loin a hmur in zei bantuk chiatsernak hmanh si ai kun, a ser i amah nih a hngalh lo ahcun, a hun hngalh tikah hi chiatsernak pakhatkhat cungah a mawh lai. 5Hi thil pakhatkhat cungah a mawh ahcun, sualnak a tuahmi kha a phuan lai i 6sualnak a tuahmi caah khan Bawipa sinah sual thawinak a rak put lai, tuurun chungin a nu, tuufa siseh meheh siseh, sual thawinak caah a si lai; cun tlangbawi nih a sualnak caah remnak a serpiak lai.

7“Sihmanhsehlaw tuufa kha a ngeih nih a tlinh lo ahcun, sualnak a tuahmi caah khan sual thawinak caah ṭhuro pahnih siseh, laileng no pahnih siseh, Bawipa sinah a rak put lai, pakhat cu sual thawinak caah a si lai i pakhat cu khangh thawinak caah a si lai. 8Tlangbawi sinah a rak put hna lai i tlangbawi nih cun sual thawinak ding ca cu a thawi hmasa lai; a hngawng cu a merh lai, sihmanhsehlaw a lu cu a chat lai lo i 9sual thawinak thisen cu tlawmpal in biakṭheng sirah a theh lai i thisen a taangmi cu biakṭheng hram ah a zor lai; mah cucu sual thawinak a si. 10Cun, pahnihnak cu a phunglam ning in khangh thawinak caah a thawi lai i sualnak a tuahmi caah khan tlangbawi nih remnak a serpiak lai i ngaihthiam a si lai.

11“Sihmanhsehlaw ṭhuro pahnih siseh, laileng no pahnih siseh, a ngeih nih a tlinh lo ahcun, sualnak a tuahmi thawinak caah khan, sual thawinak caah changvut dip ephah * cheu hra cheu khat a rak put lai; chiti a toih lai lo, frankinsen zong a toih lai lo, zeitintiah mah hi cu sual thawinak a si. 12Cun tlangbawi sinah a rak put lai i tlangbawi nih pei khat in a lak lai i biakṭheng cungah Bawipa sin i mei in thawinak cungah cun hngalh camcinnak ah a khangh lai; mah cucu sual thawinak a si. 13Cu bantukin tlangbawi nih a caah, hi thil pakhatkhat hna cung i sualnak a tuahmi caah cun remnak a serpiak lai i ngaihthiam a si lai. Cun a taangmi cu changvut thawinak i bantuk khan tlangbawi caah a si lai.”

Phungbuar Thawinak Kong

14 Bawipa nih Moses kha hi bangin a chimh, 15“Ahohmanh nih phung a buar i Bawipa thil a thiangmi pakhatkhat cungah hngalh loin a sual ahcun, Bawipa sin i phungbuar thawinak caah tuurun chungin tuukawng pakhat dotla a rak put lai; hmunthiang i shekel * ning khan ngun shekel zeizat man a si kha na tuak lai; mah cucu phungbuar thawinak a si. 16A thiangmi thil cung i a palhsualnak caah cun rulhnak a tuah lai i a cheu nga cheu khat a chap lai i tlangbawi kha a pek lai; cun tlangbawi nih phungbuar thawinak tuukawng khan remnak a serpiak lai i ngaihthiam a si lai.

17“Ahohmanh nih Bawipa nih tuah lo awk i nawl a pekmi tuahnak in a sual ahcun, a hngalh lo hmanh ah, a mawh ko, a ṭhat lonak cu amah nih a in lai. 18Tuurun chungin tlangbawi sinah tuukawng pakhat dotla, nangmah nih phungbuar thawinak caah a man a za na timi a rak put lai i tlangbawi nih remnak, hngalh loin a tuahmi a palhnak caah khan, a serpiak lai i ngaihthiam a si lai. 19Mah cucu phungbuar thawinak a si; Bawipa hmaiah a mawh ko.”

⇑

[Remove Footnotes]