Levitikas 8

Aaron le A Fapa Hna Thianternak

(Exo 29.1-37)

1 Bawipa nih Moses sinah, 2“Aaron cu a fapa hna he kalpi hna law, puan hna le thuhnak chiti le thilnu telh lo changreu bawm khat le sual thawinak cawtum le tuukawng pahnih hna kha kalpi ve hna; 3cun tonnak thlam innka ah mi zapi cu pum hna,” tiah a ti. 4Cun Moses nih Bawipa nih nawl a pek bangin a tuah i mi zapi cu tonnak thlam innka ah cun an i pum.

5Cun Moses nih mi zapi sinah cun, “Mah hihi tuah awk tiah Bawipa nawl pekmi cu a si,” tiah a ti. 6Cun Moses nih Aaron le a fapa hna cu a ratpi hna i ti in a kholh hna. 7Cun angki leng cu a hruk i, taisawm a sawmh i, tlangbawi angki fual a hruk i, tlangbawi angki a aih i, dawh tein tahmi tlangbawi angki hri in a sawmh, mah hri cun a ṭem chih. 8Cun ṭangbenh kha a cungah a benh i ṭangbenh chungah cun Urim le Thummim kha a chiah hna. 9Cun lupawng a ponh i a lupawng cungah, hmailei ah, sui kheng, a thiangmi bawi luchin cu, a benh; Moses nih Bawipa nih nawl a pek bang khan a tuah.

10Cun Moses nih thuhnak chiti kha a lak i puan biakinn le a chungah a ummi thil vialte kha a thuh hna i a thianter hna. 11Cun chiti cu tlawmpal in biakṭheng ah cun voi sarih a theh i, biakṭheng le a umkheng vialte le a hmaihum le a hunnak cu thianter awk caah a thuh hna. 12Cun thuhnak chiti cu tlawmpal in Aaron lu ah a toih i a thuh i a thianter. 13Cun Moses nih Aaron fapa hna cu a ratpi hna i angki leng a hruk hna i taisawm a sawmh hna i lupawng a ponh hna, Bawipa nih Moses nawl a pek bang khan.

14Cun sual thawinak cawtum cu a rak put i Aaron le a fapa hna nih sual thawinak cawtum lu cungah cun an kut an chuan. 15Moses nih a thah i a thi cu a lak i biakṭheng ki hna ah cun a velchum in a kutdong in a thuh, cun biakṭheng ca i remnak ser awkah biakṭheng cu a thianter i a hramah thi cu a thlet i a thianter. 16Cun a chungril a tuamtu thau vialte le a thin tuamtu le a kal pahnih cu an thau he a lak hna i Moses nih biakṭheng cungah a khangh hna. 17Sihmanhsehlaw cawtum cu a phaw le a sa le a ek he riahbuk lengah mei in a khangh, Bawipa nih Moses kha nawl a pek bang khan.

18Cun khangh thawinak tuukawng kha a hun pek; Aaron le a fapa hna nih tuukawng lu cungah cun an kut an chuan. 19Cun Moses nih a thah i a thi cu biakṭheng velchum ah a theh. 20Cun tuukawng cu a can i Moses nih a lu le a sa le a thau cu a khangh hna. 21Cun a chungril le a ke hna cu ti in a ṭawl hna i Moses nih tuukawng cu a pum in biakṭheng cungah khangh thawinak caah, rimthaw Bawipa sin i mei in thawinak caah, a khangh, Bawipa nih Moses nawl a pek bang khan. 22Cun a dang tuukawng pakhat, thleidannak tuukawng cu, a pek; cun Aaron le a fapa hna nih tuukawng lu cungah an kut an chuan. 23Cun Moses nih a thah i a thi cu tlawmpal in a lak i Aaron orhlei hnakhaw parte le a orhlei siapi le a orhlei kepi ah a thuh hna; 24cun Aaron fapa hna cu an ratpi hna i Moses nih thi cu tlawmpal in an orhlei hnakhaw par tete le an orhlei siapi le an orhlei kepi ah a thuh hna; cun Moses nih thi cu biakṭheng velchum ah a thlet. 25Cun a thau le a thaumi a mei le a chungril tuamtu thau vialte le a thin tuamtu le a thau he a kal pahnih le a orhlei phei cu a lak hna; 26cun thilnu telh lo changreu bawm Bawipa hmai i a ummi chung khan thilnu telh lo changreu pakhat le chiti he cawhmi changreu hlum khat le changreu pante dar khat kha a lak hna i sathau cungah le orhlei phei cungah khan a chiah hna; 27cun mah thil vialte hi Aaron le a fapa hna kut chungah a chiah hna i Bawipa hmaiah hninh thawinak caah a hninh hna. 28Cun Moses nih an kut chungin a lak hna i khangh thawinak he biakṭheng cungah a khangh hna, thleidannak thawinak, rimthaw Bawipa ca i mei in thawinak caah a khangh hna. 29Cun Moses nih a ii cu a lak i Bawipa hmai i hninh thawinak caah a hninh; Bawipa nih Moses nawl a pek bangin, mah cucu thleidannak tuukawng chungin Moses vo cu a si.

30Cun Moses nih thuhnak chiti tlawmpal le biakṭheng cung i a ummi thi tlawmpal cu a lak i Aaron le a puan hna cu a theh hna i, a fapa hna le a fapa hna puan hna zong cu a theh hna; cu bangin Aaron le a puan hna le a fapa hna le a fapa hna puan hna cu a thianh ṭi hna.

31Cun Moses nih Aaron le a fapa hna cu, “Tonnak thlam innka ah sa kha chuang u law, cuka ah sa le thleidannak thawinak bawm chung i a ummi changreu cu ei u, ‘Aaron le a fapa hna nih an ei lai,’ tiah nawl ka pek bang khan, a ti. 32Cun sa le changreu a tangmi cu mei in nan khangh lai. 33Cun tonnak thlam innka in ni sarih chung nan chuak lai lo, nanmah thleidannak ni hna a tlin hlantiang, zeitintiah nanmah thleidannak caah ni sarih a herh lai. 34Nihin i tuahmi bang hin, nannih ca i remnak ser awkah Bawipa nih nawl a kan pek cang. 35Tonnak thlam innka ah, chunzan in ni sarih chung, Bawipa nih an fialmi hna tuah awkah, nan thih sual nakhnga lo nan um lai; zeitintiah cu bang cun nawl pek ka si,” tiah a ti. 36Cun Bawipa nih Moses in nawl a pekmi tuah awk thil vialte cu Aaron le a fapa hna nih an tuah.

⇑

[Remove Footnotes]