Levitikas 10

Nadab le Abihu Sualnak

1Cun Aaron fapa Nadab le Abihu nih an meilaknak kheng cu an i lak veve i a chungah mei an chiah i a cungah zihmui an phulh i Bawipa hmaiah a thiang lomi mei cu an thawi, nawl a pek lomi hna kha an tuah. 2Cun Bawipa hmaika in mei a hung chuak i a kangh hna i Bawipa hmaika ah cun an thi. 3Khi tikah Moses nih Aaron sinah, “Mah hihi Bawipa nih a chimmi cu a si, ‘Ka pawng i a ummi hna lakah thianghlim in kaa langhter lai i mi vialte hmaiah thangṭhat ka si lai,’ a ti,” tiah a ti. Cun Aaron cu dai tein a um ko.

4Cun Moses nih Aaron pa unau Uzziel fapa Mishael le Elzafan cu a kawh hna i, “Hmaiah hung chuak u, hmunthiang hmai in nan unau hna cu riahhmun lengah chuahpi hna u,” tiah a ti hna. 5Cucaah an ra chuak i Moses nih a chim bang khan riahhmun lengah an angkileng in an hnuh hna. 6Cun Moses nih Aaron le a fapa hna Eleazar le Ithamar sinah, “Nan sam i thlah hlah u, nan puan kha thlek hna hlah u, nan thih sual i mibu dihlak cungah thinhunnak a rat sual nakhnga lo; sihmanhsehlaw Bawipa nih a kanghtermi mei kanghnak cu nan unau, Israel chungkhar dihlak nih khan, ṭah hna seh. 7Cun tonnak thlam innka khan, nan thih sual nakhnga lo, chuak hlah u; zeitintiah Bawipa thuhnak chiti cu nan cungah a um,” tiah a ti. Cun Moses bia bangin an tuah.

8Cun Bawipa nih Aaron cu a chawnh i, 9“Nangmah nih siseh, na fapale hna nih siseh, tonnak thlam chungah nan luh tikah mitsur hang siseh zu siseh nan ding lai lo, nan thih sual nakhnga lo; mah cucu a zungzal in nan tefa hna chan tiangin nawlbia a si lai. 10Nannih nih a thianghlim le zaran tawnghmi, cun a thianglo le a thiang kha nan thleidan lai i 11Israel mi hna kha Moses in Bawipa nih a chimmi nawlbia vialte kha nan cawnpiak hna lai,” tiah a ti.

12Cun Moses nih, Aaron le a tangmi a fapa hna Eleazar le Ithamar sinah, “ Bawipa sinah mei in thawinak hna chungin a tangmi changvut thawinak kha la u law, biakṭheng pawngah thilnu telh loin ei u, zeitintiah mah cucu a thiang bik a si. * 13 Bawipa sinah mei in pekmi thawinak hna chungin nangmah le na fapa hna vo a simi kha, nawlpek nan si bangin hmunthiang ah nan ei lai. 14Sihmanhsehlaw hninhmi ii le thawimi phei cu, nangmah le na fapa hna le na fanu hna le tiah, a thiangmi hmun paoh ah nan ei lai. Zeicaahtiah Israel mi hna pekchanhmi daihnak thawinak chungin, mah hna cu nangmah le na fapa hna vo ah pek nan si. * 15Thawimi phei le hninhmi ii cu Bawipa hmai i hninh thawinak ca i hninh awkah, mei in thawinak hna thau he nan rak put lai, mah cucu nangmah le na fapa hna caah, Bawipa nawl peknak bangin, zungzal in nan vo a si lai,” tiah a ti.

16Cun Moses nih sual thawinak meheh kong kha fel tein a hlat i zohhmanh, an rak khangh diam cang ai! Cun Aaron fapa a taangmi hna Eleazar le Ithamar cungah a thin a hung i, 17“Zeicahdah sual thawinak cu hmunthiang chungah nan ei lo? A thiang bik thil mi zapi ṭhat lonak phortu ding i Bawipa hmai i remnak serpiaknak ca i mah cucu nannih kha pekmi a si ṭung! * 18Zohhmanh, a thi cu hmunthiang a chunglei ah nan luhpi lo. Nannih nih nawl kan pek hna bang khan hmunthiang chungah nan rak ei hrimhrim awk a si,” tiah a ti. 19Cun Aaron nih Moses sinah, “Zohhmanh, nihin ah Bawipa hmai i an sual thawinak le an khangh thawinak kha an thawi cang, sihmanhsehlaw mah hi bantuk thil hna nih hin an ka tlak kun! Nihin ah sual thawinak kha rak ei ning law, Bawipa mithmuh ah cohlan awk tlak a rak si hlei hnga maw?” a ti. 20Cun Moses nih mah cucu a theih tikah a lung a tling ko.

⇑

[Remove Footnotes]