Levitikas 11

A Thiang le A Thianglo Saram

(Deu 14.3-21)

1Cun Bawipa nih Moses le Aaron sinah, 2“Israel mi hna sinah va chim tuah u, vawlei cung i a ummi saram vialte lakah mah hna hi a nungmi thil nan ei awk cu an si lai. 3Saram lakah a tin a ṭe i aa ṭhen i rawlret a khaimi cu nan ei lai. 4Asinain rawlret khaimi lakah siseh, tin ṭemi lakah siseh, mah hna hi cu nan ei lai lo: kalauk, rawlret cu a khai nain a tin a ṭet lo caah nannih caah a thianglo a si. 5Cun vawrvok, rawlret a khai nain a tin a ṭet lo caah nannih caah a thianglo a si. 6Cun saveh, rawlret a khai nain a tin a ṭet lo caah a thianglo a si. 7Cun vok, a tin a ṭe i aa ṭhen ko nain rawlret a khai lo caah, nan caah a thianglo a si. 8An sa nan ei lai lo i an ruak nan tawng lai lo; nan caah a thianglo an si.

9“Ti chung i a ummi thil vialte lakah mah hna hi nan ei lai. Rili chungah siseh, tiva chungah siseh, ti chung i a ummi, ṭeh le phokphawher a ngeimi thil paohpaoh cu nan ei hna lai. 10Sihmanhsehlaw rili chungah siseh, tiva chungah siseh, a ummi, ṭeh le phokphawher a ngei lomi, ti chungah a lawn in a lawnmi thil le ti chung i a nungmi thil hna cu, nannih caah fihnung an si. 11Nannih caah fihnung an si zungzal lai; an sa nan ei lai lo i an ruak cu fihnung ah nan rel hna lai. 12Ti chungah a ummi thil zeipaoh ṭeh le phokphawher a ngei lomi cu nan caah fihnung a si.

13“Cun, va hna lakah mah hna hi fihnung ah nan rel awk an si lai, nan ei hna lai lo, fihnung an si: muvanlai, tettet, mu-ar-cawi, 14kaite, muchia phun kip, 15langak phun kip, 16ostrik, thlanghnap, rili-va mupi phun kip, 17chimbu, tingala, tivapual, 18ti-ar, pelikan, langta, 19tivakok, ram varang phun kip, chuangtuar, le palak.

20“Buṭit-khaubawk thla a ngei i ke pali in a kalmi vialte cu nan caah fihnung an si. 21Sihmanhsehlaw thla ngeimi buṭit-khaubawk ke pali in a kalmi lakah a keṭeng cung i vawlei i pernak ca i ke a ngeimi cu nan ei lai. 22Cu hna chungah cun, khauzik phun kip, khuangbai phun kip, buṭit phun kip, le khaubawk phun kip cu nan ei khawh hna lai. 23Sihmanhsehlaw thla ngeimi buṭit-khaubawk ke pali a ngeimi vialte cu nannih caah fihnung an si.

24“Cun mah thil hna thawng hin thianglo nan cang lai; an ruak a tawngtu paoh cu zanlei tiang an thur lai i 25an ruak in zeipaoh a latu nih a thilpuan a suk lai i zanlei tiang thianglo a si lai. 26A tin a ṭe nain a tin aa ṭhen lomi saram siseh, rawlret a khai lomi saram siseh, nannih caah a thianglo a si; a tawngmi hna paoh cu thianglo an si lai. 27Ke pali in a kalmi saram hna lakah a kebor in a kalmi vialte cu nannih caah thianglo an si; an ruak a tawngtu paoh cu zanlei tiang thianglo an si lai i 28an ruak a phortu nih a thilpuan kha a suk lai i zanlei tiang thianglo a si lai; annih cu nan caah thianglo an si.

29“Cun vawlei ah a lawn in a lawnmi hna lakah mah hna hi nan ca i thianglo an si: zuhri, zu, kinglang ngan phun kip, 30ṭekral, tang, kinglang, thetse rawn kinglang le conghrang. 31A lawnmi thil vialte lakah mah hna hi nan ca i thianglo an si; mah hna hi an thih tikah a tawngtu hna paoh cu zanlei tiang thianglo an si lai. 32Cun, an thih tikah an tlakhnawhmi thilri paoh cu a thur lai, thing thilri siseh, puan siseh, saphaw siseh, sawngkhoi siseh, hman awk thil a simi paohpaoh; ti chungah ciah a si hrimhrim lai i zanlei tiang thianglo a si lai; cu tikah a thiang lai. 33Cun annih lak i pakhatkhat cu tlak um a simi paohpaoh cungah a tlak ahcun, a chung i a ummi vialte cu thianglo an si lai i nan khuai lai. 34Cu um chung i ei awk a ummi zei rawl paoh, ti nih a ciahmi paoh cu, thianglo a si lai; cun cu bantuk um paohpaoh chung i din awk thil vialte cu thianglo an si lai. 35Cun zei thil paoh an ruak pelpawi a zeipaoh nih a tlakmi hna cu thianglo an si lai; changreu rawhnak a si zongah, meiphu a si zongah, khuai cikcek a si lai; thianglo an si i nan caah thianglo an si lai. 36Sihmanhsehlaw cerhti siseh tikuang a chung i ti a ummi cu siseh a thiang lai, asinain zeipaoh an ruak a tawngtu paoh cu thianglo an si lai. 37Cun an ruak zei zawn paoh nih cin awk a simi thlaici zei paoh a nenh ahcun, a thiang ko; 38sihmanhsehlaw thlaici cu ti in ciah a si i an ruak zei zawn paoh nih a nenh ahcun, nan caah thianglo a si.

39“Cun nan eimi saram zeipaoh a thih ahcun, a ruak a tawngtu paoh cu zanlei tiang thianglo a si lai, 40cun a ruak a eimi paoh cu a thilpuan a suk hna lai i zanlei tiang thianglo a si lai; a ruak a putu paoh zong nih a thilpuan a suk hna lai i zanlei tiang thianglo a si lai.

41“Vawlei ah a vah in a vak lulhmalhmi thil paoh cu fihnung a si; ei awk a si lai lo. 42A paw in a lawnmi zeipaoh siseh, ke pali in a kalmi zeipaoh siseh, ke tampi a ngeimi zeipaoh siseh, vawlei ah a vah in a vakmi thil vialte cu nan ei hna lai lo; zeitintiah fihnung an si. 43A vah in a vakmi thil zeihmanh khan nannih nih fih nan i nunter lai lo; cun cu hna cun a thur zong nan i thurter lai lo, thianglo nan si sual hnga. 44Zeitintiah keimah cu Bawipa nan Pathian ka si; cu caah i thianter u law, thianghlim u, keimah ka thian caah. Vawlei ah a vah in a vakmi thil zeihmanh in i thurter hlah u. * 45Zeitintiah keimah cu nan Pathian si awkah, Izipt ram in an chuahpitu hna Bawipa ka si; cucaah nannih cu nan thian awk a si, keimah ka thian caah,” tiah a ti.

46Mah hihi saram le va le ti chung i a cawlcangmi thilnung kip le vawlei i a vakmi thil kip kong i phunglam a si; 47a thiang le thianglo le a nungmi thil ei awk a si hngami le a nungmi thil ei awk lo a si hngami hna thleidannak caah a si.

⇑

[Remove Footnotes]