Levitikas 12

Fahrin Hnuah Nu Thianternak

1 Bawipa nih Moses sinah hitin a ti, 2“Israel mi kha chim hna: Nu nih fa a pawi i fapa a hrin ahcun, ni sarih thianglo a si lai; nuphung a hngalh caan bantuk khan thianglo a si lai. 3Cun a ni riat ni ah a cuarpar tan a si lai. * 4Cun thisen ruangah cun i thianh lengmang in ni sawm thum le ni thum a um rih awk a si lai; aa thianhnak ni a tlin hlan lo cu thil thiang zeihmanh a tawng lai lo, hmunthiang chung zongah a lut lai lo. 5Sihmanhsehlaw fanu a hrin ahcun, zarh hnih thianglo a si lai, nuphung a hngalh caan bantuk khan; cun thisen ruangah cun i thianh lengmang in ni sawm ruk le ni ruk a um rih awk a si lai.

6“Cun aa thianhnak ni kha a tlin tikah, fapa caah siseh, fanu caah siseh, tlangbawi sinah, tonnak thlam innka ah khangh thawinak caah tuufa kum khat a timi a rak put lai i sual thawinak caah laileng no pakhat maw ṭhuro pakhat dik a rak put lai. 7Cun amah nih Bawipa hmaiah a thawi lai i remnak a serpiak lai; cun a thi chuahnak cun amah cu a thiang lai. Mah hihi fapa a hringmi caah siseh, fanu a hringmi caah siseh, phunglam a si. 8Cun tuufa kha a ngeih khawh lo ahcun, ṭhuro pahnih maw, laileng no pahnih dik a lak hna lai, pakhat cu khangh thawinak caah a si lai i a dang cu sual thawinak caah a si lai; cun tlangbawi nih remnak a serpiak lai i amah cu a thiang lai.” *

⇑

[Remove Footnotes]