Levitikas 13

Thinghmui Zawtnak Kongah Phunglam

1 Bawipa nih Moses le Aaron sinah hitin a ti, 2“Mi pakhatkhat cu a pum cuar cungah phinnak siseh, pharnak siseh, bonak siseh pakhatkhat a ngeih i cucu a pum cuar cung i thinghmui zawtnak ah a can tikah, cu tikah cun tlangbawi Aaron sinah siseh, tlangbawi a simi a fapa pakhatkhat sinah siseh, ratpi a si lai i 3tlangbawi nih cun a pum cuar cung i zawtnak a umnak zawn cu a zoh lai; zawtnak a umnak zawn hmul cu a ran i a zawtnak cu a pum cuar nakin a thuk deuh a lawh ahcun, cucu thinghmui zawtnak a si; tlangbawi nih a zoh dih tikah amah cu thianglo a si tiah a thanh lai. 4Sihmanhsehlaw a pum cuar i a bomi cu a ran i cuar nakin a thuk deuh a lawh lo i a hmul kha a ran lo ahcun, tlangbawi nih zawtnak a ngeimi cu ni sarih chung a hren lai i 5ni sarihnak ni ah cun a zoh lai, cun amah hmuhnak ah zawtnak cu amah ning a si i a cuar ah zawtnak cu a karh lo ahcun, tlangbawi nih a dang ni sarih a hren rih lai; 6tlangbawi nih cun ni sarihnak ni ah a zoh ṭhan lai i zawtnak a umnak zawn cu a dulh i zawtnak cu cuar ah khan a karh lo ahcun, tlangbawi nih cun amah cu a thiang tiah a thanh lai; mah cucu a phar sawhsawhmi a si; a thilpuan a suk hna lai i a thiang ko lai. 7Sihmanhsehlaw amah thiannak ca i tlangbawi sin i aa hmuh hnuah khan a pharmi cu a cuar ah a karh ahcun, tlangbawi hmaiah khan a chuak ṭhan lai; 8cun tlangbawi nih a zoh lai i a cuar ah a pharnak kha a karh ahcun tlangbawi nih cun amah cu a thianglo tiah a thanh lai; mah cucu thinghmui zawtnak a si.

9“Mi pakhatkhat cu thinghmui zawtnak nih a tlaih tikah tlangbawi sinah chuahpi awk a si lai; 10cun tlangbawi nih a zoh lai i a cuar ah a rangmi hmul a chuahtertu a rangmi phinnak a um i a phinnak ah cun a sa hring a langh ahcun, 11cucu a pum cuar chung i thinghmui hma hlun a si, tlangbawi nih amah cu thianglo a si tiah a thanh lai; a hreng lai lo, zeitintiah amah cu thianglo a si ko. 12Cun thinghmui zawtnak cu cuar ah a chuah i, tlangbawi nih a hmuh khawh tiangah a zawmipa a cuar cu a lu in a ke tiang thinghmui zawtnak nih cun chuak lakin a khuh ahcun, 13tlangbawi nih a zoh lai i thinghmui zawtnak nih khan a pum dihlak kha a chuah cang ahcun, cu pa cu cu zawtnak in a thiang tiah a thanh lai; a rang ah a cang dih cang i amah cu a thiang. 14Sihmanhsehlaw a cungah sa hring a langh ahcun amah cu thianglo a si lai. 15Tlangbawi nih sa hring cu a zoh lai i amah cu thianglo a si tiah a thanh lai; sa hring cu thianglo a si, zeicahtiah thinghmui zawtnak a si. 16Sihmanhsehlaw a sa hring cu aa thlen ṭhan i a rang ah aa can ṭhan ahcun tlangbawi sinah a ra lai i 17tlangbawi nih a zoh lai i a zawtnak cu a rang ah aa thlen ahcun, tlangbawi nih a zawmi cu a thiang tiah a thanh lai; amah cu a thiang cang. 18Cun pakhatkhat cuar i khuaihli a um i a dam tikah, 19cu khuaihli umnak i a rangmi phinnak siseh, a sen nawn a rang nawn in a bomi siseh a chuah ahcun, tlangbawi sinah hmuhsak awk a si lai; 20cun tlangbawi nih a zoh lai i cuar nakin thuk deuh a lawh i a hmul kha a ran ahcun, tlangbawi nih amah cu thianglo a si tiah a thanh lai; mah cucu thinghmui zawtnak a si, hma chungin a hung langmi a si. 21Sihmanhsehlaw tlangbawi nih a zoh i a cung i a ummi hmul kha a ran lo i, cuar nakin a thuh deuh lo i sihmanhsehlaw a dulh ahcun, tlangbawi nih ni sarih a hren lai; 22cun cuar ah a karh ahcun tlangbawi nih amah cu thianglo a si tiah a thanh lai; a cuar cu zawtnak a ing. 23Sihmanhsehlaw a bomi cu kaa khat lawngah a um i a karh lo ahcun, khuaihli hma hmape a si; tlangbawi nih a thiang tiah a thanh lai.

24“Asiloah, mipa pakhat cu a cuar a kangh i a kanghnak tit hring cu a bo i sen nawn rang nawn in a um, asiloah a ran tikah, 25tlangbawi nih a zoh lai i a bonak ka i hmul cu a ran i cuar nak thuk deuh in a langh ahcun, cucu thinghmui zawtnak a si; mei hma in a hung chuakmi a si tlangbawi nih amah cu thianglo a si tiah a thanh lai; thinghmui zawtnak a si. 26Sihmanhsehlaw tlangbawi nih a zoh i a bonak ka i a hmul kha a ran lo i cuar nakin a thuk deuh lo i a dulh ahcun, tlangbawi nih amah cu ni sarih a hren lai i 27ni sarihnak ni ah a zoh lai; cuar ah a karh ahcun tlangbawi nih amah cu thianglo a si tiah a thanh lai; cucu thinghmui zawtnak a si. 28Sihmanhsehlaw a bo cu kaa khat lawngah a um ko i cuar ah a karh lo i a dulh ahcun, mah cucu mei hma in a hung phingmi a si; tlangbawi nih amah cu a thiang ko tiah a thanh lai; zeicahtiah mah cucu mei hma hmape a si ko.

29“Pa nih siseh, nu nih siseh, an lu ah maw an khahmul ah maw zawtnak an ngeih tikah, 30tlangbawi nih zawtnak cu a zoh lai i cuar nakin thuk deuh in a langh i cuka hmul cu a en i a pan ahcun, tlangbawi nih amah cu thianglo a si tiah a thanh lai; mah cucu thakpherh, lu maw khahmul thinghmui zawtnak a si. 31Cun tlangbawi nih a thakmi zawtnak cu a zoh i cuar nak i thuk deuh in a langh lo i a chungah hmul nak a um lo ahcun, tlangbawi nih cun thakpherh zawtnak a ngeimi cu ni sarih a hren lai; 32ni sarih ni ah tlangbawi nih cu zawtnak cu a zoh lai i thakpherh cu a karh lo i a chungah hmul eng a um lo i thakpherh cu cuar nakin thuk deuh in a langh lo ahcun, 33a hmul cu amah nih aa meh lai; sihmanhsehlaw thakpherh umnak zawn cu a met lai lo; cun tlangbawi nih thakpherh zawtnak he a ummi cu a dang ni sarih a hren rih lai. 34Cun ni sarihnak ni ah cun thakpherh cu tlangbawi nih a zoh lai i cuar ah khan a karh lo i cuar nakin thuk deuh in a langh lo ahcun, tlangbawi nih cun amah cu a thiang tiah a thanh lai, cun a hnipuan a suk hna lai i a thiang lai. 35Sihmanhsehlaw aa thianh hnuah thakpherh cu a cuar ah khan a lawn ahcun, 36tlangbawi nih amah cu a zoh lai i thakpherh cu a cuar ah a lawn ahcun, tlangbawi nih hmul eng kha kawl a herh lai lo; amah cu thianglo a si. 37Sihmanhsehlaw a hmuhnak ah thakpherh cu amah bon a si i a umnak ah hmul nak an khoh ahcun, thakpherh cu a dam a si, amah cu a thiang; tlangbawi nih amah cu a thiang, tiah a thanh lai.

38“Pa nih siseh, nu nih siseh a pum cungah bonak, a rangmi bonak, a ngeih ahcun 39tlangbawi nih a zoh lai i pum cung cuar i bonak cu a ranning a dulh nawn ahcun, cucu takthak, cuar i a hung chuakmi a si; amah cu a thiang ko.

40“Mipa pakhatkhat cu a sam a tlong i a lu a kolh, sihmanhsehlaw a thiang ko. 41Cun mipa pakhat cu a hmailei sam le a bep sam a tlong i a cal a ngau, sihmanhsehlaw a thiang ko. 42Sihmanhsehlaw a lukheng dau ah cun siseh, a cal ngau ah cun siseh, a sen nawn a rang nawn in zawtnak bo a um ahcun, mah cucu a cal kolh ah siseh, a kheng kolh ah siseh, thinghmui zawtnak a chuakmi a si. 43Cu tikah tlangbawi nih amah cu a zoh lai i a kheng kolh ah siseh, a cal kolh ah siseh, zawtnak a hung phingmi cu sen nawn rang nawn in a um i pum cuar cung i thingmui zawtnak a chuakmi bantuk a si ahcun, 44amah cu mi thinghmui a si, amah cu thianglo a si; tlangbawi nih amah cu thianglo a si tiah a thanh hrimhrim lai; a zawtnak cu a lu cungah a um.

45“Mithinghmui, cu zawtnak a ngeimi nih cun, hni puan tlek aa aih lai i a sam cu a thlaiter lai i a hmur cunglei cu aa huh lai i, ‘Ka thianglo, ka thianglo,’ tiah a au lai. 46Cu zawtnak a ngeih chung cu thianglo a si lai; amah cu thianglo a si ko; riahhmun lengah amah lawngin a um lai.

47“Puan zong, sahmul puan siseh, la hmangṭhia puan zong siseh; 48a tah in tahmi siseh, a phiar in phiarmi siseh, la hmangṭhia siseh, sahmul zong siseh; saphaw siseh zeipaoh saphaw in sermi siseh, 49thinghmui zawtnak a um i cu zawtnak cu puan ah siseh, saphaw ah siseh, a tah in tahmi ah siseh, a phiar in phiarmi ah siseh, zeipaoh saphaw in sermi ah siseh, a hring deuh in siseh, a sen deuh in siseh, a langh ahcun, thinghmui zawtnak a si i tlangbawi zohter awk a si. 50Cun tlangbawi nih zawtnak cu a zoh lai i zawtnak a ngeimi cu ni sarih a hren lai i 51zawtnak cu ni sarihnak ni ah a zoh lai. Zawtnak cu puan ah, a tah in tahmi ah siseh, a phiar in phiarmi ah siseh, saphaw, zei ca paoh i an hmanmi saphaw ah siseh, a lawn ahcun cucu a fakmi phun thinghmui zawtnak a si; mah cucu thianglo a si. 52Cun puan cu tahmi siseh, phiarmi siseh, sahmul siseh, la hmangṭhia siseh, saphaw in sermi paohpaoh siseh, thinghmui zawtnak umnak paoh cu a khangh lai, a fakmi phun thingmui zawtnak a si, mei ah khangh hrimhrim awk a si.

53“Cun tlangbawi nih a zoh i puan ah cun, tahmi siseh, phiarmi siseh, saphaw in sermi paohpaoh zong siseh, zawtnak cu a lawn lo ahcun, 54zawtnak a umnak puan cu a sukter hna lai i ni sarih chung a hren rih lai; 55cun tlangbawi nih zawtnak a umnak thil kha an suk hnuah a zoh lai. Cun zawtnak a umnak hmun kha a mui aa dan hlei lo ahcun, zawtnak kha a lawn lo nain, mah cucu thianglo a si; mei ah nan khangh lai, thinghmui zawtnak a umnak cu a hmailei i a si zongah, a hnulei i a si zongah nan khangh lai.

56“Sihmanhsehlaw tlangbawi nih a zoh i suk hnuah zawtnak cu a loh dengmang ahcun, cu zawn cu puan ah khan siseh, saphaw ah cun siseh, tahmi ah cun siseh, phiarmi ah cun siseh, a thleh lai; 57cun puan ah cun, tahmi ah siseh, phiarmi ah siseh, saphaw in sermi paoh ah siseh, a langh ṭhan ahcun a karh a si; cu zawtnak a umnak thil cu mei in nan khangh lai. 58Sihmanhsehlaw puan tahmi siseh, phiarmi siseh, saphaw in sermi paoh siseh, nan suk tikah zawtnak nih a kaltakmi cu, a voi hnihnak nan suk ṭhan lai i a thiang lai.”

59Mah hihi, sahmul siseh, la hmangṭhia siseh, tahmi siseh, phiarmi siseh saphaw in sermi puan siseh, thinghmui zawtnak a ummi a thian le a thian lo khiahnak phunglam cu a si.

⇑

[Remove Footnotes]