Levitikas 15

Pum In A Chuakmi Thil Thianglo

1 Bawipa nih Moses le Aaron sinah hitin a ti: 2“Israel mi cu hi bangin chim hna u. Pa paohpaoh nih a pum chungin a chuakmi thil a ngeih ahcun cu a thil chuakmi cu a thianglo a si. 3Mah hihi thil chuakmi ruang i a thian lonak ca i phunglam cu a si: a pum chung cun a chuah camcin ah siseh, a chuah cu a pih ah siseh, amah chungah thian lonak a si ko. 4Cu thil chuakmi a ngeimi i a ihnak ihkhun paoh cu thianglo a si lai i a ṭhut nenhmi thil paoh cu thianglo a si lai. 5Cun ahohmanh a ihkhun cu a tawngmi paoh nih a hnipuan cu a suk hna lai i ti in aa kholh lai i zanlei tiang thianglo a si lai. 6Cun ahohmanh thil chuak ngeimi nih a ṭhut nenhmi thil cungah a ṭhumi paoh nih a hnipuan a suk hna lai i ti in aa kholh lai i zanlei tiang thianglo a si lai. 7Cun ahohmanh thil chuak a ngeimipa pum a tawngmi cu a hnipuan a suk awk a si lai i ti in aa kholh lai i zanlei tiang thianglo a si lai. 8Thil chuakmipa nih a thiangmi pakhatkhat cu cil a chak ahcun a hnipuan cu a suk hna lai i ti in aa kholh lai i zanlei tiang thianglo a si lai. 9Thil a chuakmi nih aa citnak kengdan paohpaoh cu thianglo a si lai. 10Amah toiah a ummi thil zeipaoh a tawngmi paoh cu zanlei tiang thianglo a si lai; cu bantuk thil a phortu nih cun a hnipuan a suk hna lai i ti in aa kholh lai i zanlei tiang thianglo a si lai. 11Cun thil chuak ngeimi nih a kut ti in tlengh loin mi pakhatkhat a tawngh ahcun a tawnghmi nih khan a hnipuan kha a suk hna lai i ti in aa kholh lai i zanlei tiang thianglo a si lai. 12Thil chuak a ngeimi nih a tawnghmi tlak um cu khuai a si lai i thing umkheng hna cu ti in tlengh an si lai.

13“Cun thil chuakmi cu a thil chuakmi in a thian tikah amah thianhnak caah ni sarih aa rel lai i a hnipuan a suk hna lai i a luangmi ti ah a pum cu aa kholh lai i a thiang lai. 14Cun ni riat ni ah ṭhuro pahnih maw laileng no pahnih dik aa put hna lai i Bawipa hmaiah tonnak thlam innka ah cun a ra lai i tlangbawi sinah cun a pek hna lai; 15tlangbawi nih cun a thawi hna lai, pakhat cu sual thawinak caah, pakhat cu khangh thawinak caah; cun tlangbawi nih amah caah cun a thil chuakmi caah khan Bawipa hmaiah remnak a serpiak lai.

16“Mipa pakhatkhat cu a ci a chuah ahcun a pum dihlak in ti in aa kholh lai i zanlei tiang thianglo a si lai. 17Puan siseh saphaw siseh a ci nih a nehmi paoh cu ti in suk a si lai i zanlei tiang thianglo a si lai. 18Pa nih nu he a ih i a ci a chuah ahcun an pahnih in ti in an i kholh lai i zanlei tiang thianglo an si lai.

19“Nu nih a nuphung tawn a hngalh tikah, ni sarih chung thianglo in a um lai i ahohmanh amah a tawngtu cu zanlei tiang thianglo a si lai. 20A thianlo chung i a ihnak paoh cu thianglo a si lai; a ṭhutnak paoh zong thianglo a si lai. 21Ahohmanh a ihnak a tawng paoh cu a hnipuan kha a suk lai i ti in aa kholh lai i zanlei tiang a thianlo awk a si lai. 22Cun a ṭhuthnawhmi thil zeihmanh a tawngtu cu a hnipuan kha a suk lai i ti in aa kholh lai i zanlei tiang a thianlo awk a si lai; 23ihkhun siseh, a ṭhuthnawhmi thil zeipaoh siseh, a tawngh tikah zanlei tiang thianglo a si lai. 24Cun pa ahohmanh nih amah he a ih i a thian lonak cu a cungah a um ahcun cu pa cu ni sarih chung thianglo a si lai i a ihnak ihkhun paoh cu thianglo a si lai.

25“Nu nih nuphung a hngalh caan ah si loin a thi ni tampi a chuah ah siseh, cun a nuphung tawn nakin sau deuh a thi a chuah ahcun siseh, a thi a chuah chung vialte cu thianglo in a um ko lai; nu phung a hngalh caan i a thianlo bantukin thianglo a si ko lai. 26A thi a chuah chung vialte cu a ihnak ihkhun paoh cu a nuphung hngalh tawn caan i a ihkhun bantuk kha a si lai i a ṭhutnak paoh cu a thianlo tawn caan lio i a thianlo bantuk khan a si lai. 27Cun ahohmanh cu thil hna a tawngtu cu thianglo a si lai i a hnipuan kha a suk hna lai i ti in aa kholh lai i zanlei tiang thianglo a si lai. 28Sihmanhsehlaw a thichuahnak kha a thian ahcun ni sarih aa rel lai i cu hnuah cun a thiang lai. 29Cun ni riat ni ah cun ṭhuro pahnih maw laileng no pahnih dik a lak lai i tlangbawi sinah, tonnak thlam innka ah cun, a rak put hna lai. 30Tlangbawi nih pakhat cu sual thawinak caah, a dang pakhat cu khangh thawinak caah a thawi hna lai i amah cu Bawipa hmaiah thichuah i a thian lonak caah cun tlangbawi nih remnak a serpiak lai.

31“Cu bangin Israel mi hna cu an thian lonak in nan fimkanter hna lai, annih lak i a ummi keimah puan biakinn thurternak in an thih sual nakhnga lo,” a ti.

32Thil chuak a ngeimi le ci chuak a ngeimi, cu thawngin a thiang lomi hna le nu amah thian lonak in a zawmi, cun ahopaoh, pa siseh, nu siseh, thil chuak a ngeimi paoh, 33cun thian lonak a ngeimi nu he a itmi zong, mah hna caah hin mah hihi phunglam cu a si.

⇑

[Remove Footnotes]