Levitikas 16

Remnak Ni

1Aaron fapa pahnih nih Bawipa hmai an va naih i an thih hnuah khan Bawipa nih Moses cu a chawnh i 2Moses sinah hi bangin Bawipa nih a ti: “Na u Aaron cu va chim law, puanzar chung hmunthiang ah, kuang cung i a ummi velngeihnak ṭhutdan hmaiah cun zeitikhmanh ah lut hlah seh, a thi sual lai; zeitintiah velngeihnak ṭhutdan cungah cun minmei in ka lang lai. * 3Sihmanhsehlaw hi bangin Aaron nih hmunthiang chungah, sual thawinak caah cawtum no pakhat le khangh thawinak caah tuukawng pakhat he tiah, * 4la hmangṭhia angkileng cu aa hruk lai i la hmangṭhia tawhrolh cu aa hrolh lai, la hmangṭhia taisawm aa sawmh lai i la hmangṭhia lupawng aa ponh lai; mah hna hi thilpuan thiang an si. A pum cu ti in aa kholh lai i mah cucu aa hruk hna lai. 5Cun Israel mibu sin cun meheh tum pahnih sual thawinak caah, tuukawng pakhat khangh thawinak caah a lak lai.

6“Cun Aaron nih cawtum cu amah caah sual thawinak caah a thawi lai i amah le a innchungkhar caah remnak a ser lai. 7Cu hnuah cun meheh pahnih kha a lak hna lai i Bawipa hmaiah tonnak thlam innka ah cun a chiah hna lai; 8Aaron nih meheh pahnih hna cungah cun camcawh fung a khiah lai, camcawh fung pakhat cu Bawipa caah, a dang pakhat cu Azazel caah. 9Cun Aaron nih Bawipa ca camcawh fung a tlaknak meheh cu a lak lai i sual thawinak ah a thawi lai; 10sihmanhsehlaw Azazel ca camcawh fung a tlaknak meheh cu a cungah remnak ser awkah a nung in Bawipa hmaiah chuahpi a si lai, ram lakah Azazel sinah hei thlah a si nakhnga.

11“Aaron nih amah ca i sual thawinak ah cawtum cu a chuahpi lai i amah ca le a innchung khar caah remnak a ser lai; cawtum cu amah ca i sual thawinak caah a thah lai. 12Cun Bawipa hmai i a ummi biakṭheng cung meiṭil in a khatmi mei-laknak-kheng cu a lak lai i rimhmui dip tein denmi zapei hnih he puanzar chungah a luhpi lai i 13rimhmui cu Bawipa hmai i mei ah cun a paih lai, rimhmui khu nih cun biahngalhternak cung i velngeihnak ṭhutdan cu a khuh i a thih sual nakhnga lo caah a si lai, 14cun cawtum thi cu tlawmpal in a lak lai i a kutdong in velngeihnak ṭhutdan a hmailei cu a theh lai, cun velngeihnak ṭhutdan hmaika ah cun thi cu a kutdong in voi sarih a theh lai.

15“Cun mi zapi ca i a simi sual thawinak meheh kha a thah lai i a thi cu puanzar chungah a luhpi lai, cun a thi cu cawtum thi a tuah bantuk khan a tuah lai, velngeihnak ṭhutdan cung le velngeihnak ṭhutdan hmai kha a theh lai; * 16Israel mi an thian lonak ruang le an phungbuarnak, an sualnak vialte ruangah, cu bangin hmunthiang caah cun remnak a ser lai; cu bantuk ṭhiamṭhiam in an thian lonak chung i annih he a um camcinmi tonnak thlam caah cun a tuah lai. 17Remnak ser awk i a thiangmi hmun ah a luh tikah a chuah ṭhan i amah ca le a innchungkhar ca le aa pummi Israel mi ca i remnak a ser dih hlantiang, ahohmanh tonnak thlam chungah an um lai lo. 18Cun Bawipa hmai i a ummi biakṭheng leiah cun a chuak lai i cu biakṭheng caah cun remnak a ser lai, cawtum le meheh thi kha tlawmpal in a lak hna lai i biakṭheng ki cu a velchum in a thuh hna lai. 19Cun a cungah thi cu tlawmpal in a kutdong in voi sarih a theh lai i Israel mi an thian lonak cun a tlengh lai i a thianh lai.

20“Hmunthiang ca le tonnak thlam ca le biakṭheng ca i remnak a tuahnak a dih tikah, meheh nung cu a pekchanh lai; 21Aaron nih a kut pahnih in meheh nung lu ah cun a chuan lai i Israel mi ṭhat lonak vialte, an phungbuarnak vialte le an sualnak vialte cu a cungah cun a phuan lai i meheh lu cungah cun a chiah hna lai, mi pakhat timhcia in a ummi nih khan ramlak ah a kalpi lai. 22Meheh nih cun an ṭhat lonak vialte cu hmunking ah a phorh lai i, meheh cu ramlak ah cun a thlah lai.

23“Cun Aaron cu tonnak thlam chungah a lut lai i hmunthiang chung i a luh i aa hrukmi la hmangṭhia thilpuan kha aa phoih hna lai i cuka ah cun a kaltak hna lai; * 24hmunthiang ah a pum cu ti in aa kholh lai i a thilpuan cu a aih hna lai i a ra chuak lai i amah ca khangh thawinak le zapi ca khangh thawinak kha a thawi lai i amah ca le zapi caah remnak a ser lai. 25Sual thawinak thau cu biakṭheng cungah a khangh lai. 26Azazel sinah meheh kha a thlahtu nih khan a hnipuan kha a suk lai i ti in a pum kha aa kholh lai i cu hnuah riahnak hmun chungah khan a lut lai. 27Cun sual thawinak ca i cawtum le sual thawinak ca i meheh, hmunthiang chung i remnak ser awk ca i an thi rak luhpimi hna kha, riahnak hmun lengah chuahpi an si lai; an phaw le an sa le an ek hna cu mei in khangh an si lai. * 28A khangtu hna nih a hnipuan kha a suk i a pum kha ti in aa kholh awk a si lai, cu hnuah riahhmun chungah a lut kho lai.

29“Cun mah hihi nannih nan phung zungzal a si lai, thla sarih thla a ni hra ni ah nan i temhinter lai i nanmah mi hrimhrim nih siseh, khual nan sin i a ummi nih siseh, rian nan ṭuan lai lo; * 30zeitintiah hi ni ah hin nannih caah, nannih cu thianh awkah, remnak ser a si lai; nan sualnak vialte in Bawipa hmaiah nan thiang lai. 31Nannih caah dinh zirziarnak sabbath a si lai i nannih nih nan i temhinter lai; zungzal ca phung a si. 32Cun tlangbawi a pa hmun i tlangbawi si awk i chiti thuhmi le thleidanmi nih la hmangṭhia thil puan thiang kha i hruk in remnak kha a ser lai; 33hmunthiang caah remnak a ser lai, tonnak thlam le biakṭheng caah remnak a ser lai; tlangbawi hna le aa pummi mi vialte caah remnak a ser lai. 34Cun mah hihi nannih caah zungzal phung a si lai, Israel mi hna caah an sualnak vialte ruangah kum khat ah voi khat remnak ser a si lai.” Cun Moses nih Bawipa nih nawl a pek bangin a tuah.

⇑

[Remove Footnotes]