Levitikas 17

Raithawinak Caah Hmun Pakhat Lawnglawng

1Cun Bawipa nih Moses sinah, 2“Aaron le a fapa hna le Israel mi vialte sinah, ‘Mah hihi Bawipa nawlpekmi thil a si,’ tiah va chim tuah. 3Israel innchungkhar chungmi mi zeihmanh nih cawtum siseh, tuufa siseh, meheh siseh, riahhmun chungah siseh, riahhmun lengah siseh, a thah i 4 Bawipa puan biakinn hmaiah Bawipa sin i laksawng caah tonnak thlam innka ah a rak put lo ahcun, cu pa cungah cun thisen chuah mawhnak khinh a si lai; thisen a chuah hrimhrim ko; cu pa cu a mi hna sinin hlonh a si lai. 5Mah hihi, Israel mi nih khualeng i an thahmi an i thawinak hna kha Bawipa sinah, tonnak thlam innka i a ummi tlangbawi sinah an rak put hna i Bawipa sin i daihnak thawinak ca i an thahnak hna hnga caah a si; 6tlangbawi nih cun Bawipa biakṭheng cungah tonnak thlam innka ah cun a thi cu a theh lai i a thau cu Bawipa ca i rimthaw ah a khangh lai. 7Cucaah hlawhhlang an sihnawhmi meheh khuachia hna caah khan an raithawinak cu an that ti lai lo. Mah hihi an tefa chin tiang i an zungzal phung cu a si lai.

8“Cun annih sinah, Israel inn-chungkhar chungmi siseh, annih lak i a pemmi siseh, ahohmanh khangh thawinak siseh, raithawinak siseh, a tuah i 9 Bawipa sin i thawi awkah tonnak thlam innka ah a ratpi lomi cu, cu pa cu a mi hna sinin hlonh a si lai, na ti lai.

Thi Ei Thlauh

10“Israel innchungkhar mi siseh, an sin i a pemmi siseh, ahohmanh nih zei thi hmanh a ei ahcun, thi a eimi cu ka hmai ka chiathnawh lai i a mi hna chungin ka hlonh lai. * 11Zeitintiah titsa nunnak cu thi chungah a um i nan nunnak ca i biakṭheng cung i remnak sernak caah kan pekmi hna a si; zeitintiah nunnak thawng cun thi cu remnak sertu cu a si. * 12Cucaah Israel mi cu, ‘Nannih lakah ahohmanh nih thi nan ei lai lo; nan lak i an pemmi hna zong nih an ei lai lo,’ tiah ka ti hna kha. 13Israel mi siseh, annih sin i a pemmi khual siseh, ahohmanh nih ram vaihnak ah ei awk a simi sa siseh, va siseh, a hmuhton ahcun a thi kha a zor lai i leidip in a khuh lai.

14“Zeitintiah titsa vialte nunnak cu thi cu a si; cu caah Israel mi sinah, zei sa thi hmanh nan ei lai lo, zeitintiah titsa vialte nunnak cu an thi cu a si; a eitu paoh cu hlonh a si lai, tiah ka rak ti. 15Cun amah thih in a thimi siseh, sa nih a sehmi siseh, a eimi paoh cu anmah rammi a si ah khual a si ah, a thilpuan kha a suk hna lai i ti in aa kholh lai i zanlei tiang thianglo a si lai; cu hnuah cun a thiang lai. 16Sihmanhsehlaw a suk hna lo i a taksa aa kholh lo ahcun a mawhnak cu amah nih a in lai,” tiah a ti.

⇑

[Remove Footnotes]