Levitikas 18

Nu le Pa Sualnak Phunphun Thlauhnak

1Cun Bawipa nih Moses cu a chawnh i, 2“Israel mi hna sinah hitin va chim tuah, Kei cu Bawipa nan Pathian ka si. 3Nannih nan rak umnak Izipt ram i an tuah bantuk khan nan tuah lai lo i kan kalpi hna lainak ram Kanaan ram i an tuah bantuk zongin nan tuah lai lo. Annih an nawlbia kha nan zul lai lo. 4Ka phunglam hna kha nan tuah lai i ka nawlbia hna kha nan ulh lai i nan zulh hna lai. Keimah cu Bawipa nan Pathian ka si. 5Cucaah nannih nih ka nawlbia le ka phunglam kha nan ulh hna lai, cu tuahnak thawngin mi nih an nung lai: keimah hi Bawipa cu ka si. *

6“Nannih lak i ahohmanh nih mah he aa naihmi rualchan cu an pumlawnnak hlim awkah nan fuk hna lai lo. Keimah hi Bawipa cu ka si. 7Na pa cu a pumlawnnak na hlim lai lo, mah cucu na nu pumlawnnak a si; amah cu na nu a si; amah pumlawnnak cu na hlim lai lo. 8Na pa nupi pumlawnnak cu na hlim lai lo; mah cucu na pa pumlawnnak a si ko. * 9Na far pumlawnnak cu na hlim lai lo, na pa fanu a si ah, na nu fanu a si ah, innchung i hrinmi a si ah, kaa dang i hrinmi a si ah a pum lawnnak na hlim lai lo. * 10Na fapa fanu pumlawnnak siseh, na fanu i fanu pumlawnnak siseh na hlim lai lo; zeitintiah an pumlawnnak cu nangmah pumlawnnak a si ko. 11Na pa nupi fanu, na pa nih a hrinmi cu a pumlawnnak na hlim lai lo, zeitintiah amah cu nangmah far a si. 12Na pa far pumlawnnak na hlim lai lo; zeitintiah amah cu na pa he aa naihmi sahlawh a si. * 13Na nu unau pumlawnnak kha na hlim lai lo, zeitintiah amah cu na nu he aa naihmi rualchan a si. 14Na pa unau pumlawnnak kha na hlim lai lo, cucu a nupi kha na fuk lai lo ti a si; amah cu na nu a si. 15Na fapa nupi pumlawnnak kha na hlim lai lo, amah cu na fapa nupi a si, a pumlawnnak kha na hlim lai lo. * 16Na unau nupi pumlawnnak kha na hlim lai lo, amah cu na unau i pumlawnnak a si. * 17Nu le fa an pumlawnnak kha na hlim hna lai lo, a pumlawnnak hlim awkah a fapa fanu siseh, a fanu fanu siseh, na la lai lo; annih cu nangmah he aa naihmi na sahlawh an si; mah cucu ṭhat lo cikcek a si. * 18Cun na nupi unau cu na nupi a nun chungah a pumlawnnak hlim awkah na kemh ṭi awk a si lo.

19“Nu cu a nuphung hngalhnak in a thianlo lioah a pumlawnnak hlim awkah na fuk lai lo. * 20Na innpa nupi cu amah he i thurter awkah pumsa duhnak in na ihpi lai lo. * 21Molek sin i mei in chanh awkah na fale chungin ahohmanh na pe lai lo; cu bantuk tuahnak in na Pathian min thurter hlah; keimah hi Bawipa cu ka si. * 22Nu he ih ṭi bantukin pa he na it ṭi lai lo; mah cucu fihnung a si. * 23Cun zei saram paoh ihpi in i thurter hlah, nu zong nih saram he ih ṭi awkah i pe hlah seh: mah cucu thil ningcanglo a si. *

24“Mah thil hna chung hin a zeihmanh hin i thurhnawmhter hlah u, zeitintiah nan hmai i ka hlonh laimi miphun hna nih hin mah thil hna hin an i thurter cang i 25ram cu a thurhnawm cang i cu caah a ṭhat lonak kha dan ka tat i ram nih cun a chung i a ummi kha a luak hna. 26Sihmanhsehlaw nannih nih cun ka nawlbia hna le ka phunglam hna kha nan zulh hna lai i hi fihnung a simi hna hi pakhat hmanh nan tuah hna lai lo, nanmah ram mi nih siseh, khual nan sin i a pemmi nih siseh nan tuah lai lo. 27(Zeitintiah hi fihnung vialte hna hi nan hlan i a rak ummi, cu ram mi nih cun an tuah i cucaah cu ram cu a thurhnawm cang); 28nannih hlan i a rak ummi miphun a luak hna bantuk khan nannih cu nan thurhhnawmh tikah an luak ve sual hna lai. 29Zeitintiah hi thil fihnung hna a zeipaoh hi a tuahtu paoh cu, cu a tuahtu hna paoh cu, an mi sinin hlonh an si lai. 30Cucaah fihnung a simi phung nan hlanah an rak tuahmi hna hi, pakhat hmanh nan tuah ve nakhnga lo le, mah hna hin nan i thurhhnawmh nakhnga lo, ka nawlbia hi i tlaih tuah u: keimah cu Bawipa nan Pathian cu ka si,” tiah a ti.

⇑

[Remove Footnotes]