Levitikas 19

Thiannak le Dinnak Tuahnak Phunglam Hna

1Cun Bawipa nih Moses cu a chawnh i, 2“Hi bangin Israel mibu hna sinah va chim tuah; Nan thian awk a si, zeitintiah keimah, Bawipa nan Pathian cu ka thiang. * 3Nannih vialte nih nan nu le nan pa kha nan upat hna lai i ka sabbath hna kha nan ulh hna lai, kei cu Bawipa nan Pathian ka si. * 4Siasal leiah i mer hlah u, thletmi pathian zong i ser hna hlah u: keimah hi Bawipa nan Pathian cu ka si. *

5“Nannih nih daihnak thawinak Bawipa sinah nan pek tikah cohlan nan si nakhnga in nan pek lai. 6Nan pek ni ah ei a si lai, asiloah a thaizing ah; a kiptuh tiang a tangmi paoh cu mei in khangh a si lai. 7A kiptuh ah ei a si sual ahcun, mah cucu fihnung a si; cohlan a si lai lo i 8a eitu paoh nih a ṭhat lonak cu a in lai, zeitintiah Bawipa thil thiang pakhat a thurhhnawmh a si; cu pa cu a mi hna sinin hlonh a si lai.

9“Nan lo rawl nan ṭuan tikah nan lo cu a pawngri tiang taktak in nan ṭuan lai lo, famua zong nan ṭuan hnuah nan sua lai lo. * 10Nan mitsur dum kha nan thianh hirhiar lai lo, nan mitsur dum chung i a tlami mitsur thei zong kha nan char hna lai lo; misifak le mipem caah nan nganhtak hna lai: keimah cu Bawipa nan Pathian cu ka si.

11“Nan fir lai lo; hlennak in thil nan ti fawn lai lo, pakhat le pakhat lih nan i chim fawn lai lo. * 12Ka min chalh in lih in chiat nan ser lai lo, mah cucu nan Pathian min thurhnawmhter a si; keimah cu Bawipa ka si. *

13“Na innpa kha na serhsat lai lo i a ramh zong na ramh lai lo. Kuli ṭuanmi rianṭuan man cu zan khuadei a thaizing tiang na sinah i chiah hlah. * 14Hnachet cu va vawlpam hlah, mitcaw hmaiah tlukrilhnak thil va chia hlah, sihmanhsehlaw na Pathian cu va ṭih ko: keimah hi Bawipa cu ka si. *

15“Biaceihnak ah dinlonak nan tuah lai lo; sifakmi kha na duhdanh hna lai lo, mingan zong kha na hmaizah hlei lai lo, sihmanhsehlaw dinnak in na innpa bia kha na ceih lai. * 16Na mi hna lakah mi kongthang ceih in vak len ko hlah, na innpa nunnak hrawh awkah dir hlah: keimah hi Bawipa cu ka si.

17“Na unau cu na lungchung in na hua lai lo, sihmanhsehlaw na innpa cu na chimhhrin lai, amah ruangah sualnak na ing sual lai. * 18Nangmah na phun hawi cungah phu na hlam lai lo, na lung chungin huatnak zong na pawi lai lo, sihmanhsehlaw na innpa cu nangmah naa dawt bantukin na dawt lai: keimah hi Bawipa cu ka si. *

19“Ka nawlbia kha nan ulh lai. Na saṭil cu phun dangdang he fa na ngeihter hna lai lo; na lo ah thlaici phun hnih na tuh lai lo; thil phun hnih in tahmi puan zong naa aih fawn lai lo. *

20“Nu pakhatkhat cu sal a si i pa he aa ham cangmi a si nain tlanh rih lo, a luatnak pek rih lo a si, cu nu cu pa pakhatkhat nih pumsa duhnak in a ihpi ahcun, dothlatnak ser awk a si lai. Thah cu an si lai lo, zeicahtiah nu cu a luatmi a si lo; 21sihmanhsehlaw pa nih amah caah phungbuar thawinak kha Bawipa sinah a rak put lai, tonnak thlam innka ah cun, phungbuar thawinak ca i tuukawng cu a rak put lai. 22Cun tlangbawi nih amah cu phungbuar thawinak tuukawng cun Bawipa hmaiah sualnak a tuahmi caah cun remnak a serpiak lai i a tuahmi sualnak cu ngaihthiam a si lai.

23“Ram chung i nan luh i nannih nih rawl caah thingkung a phunphun nan cin tikah, nannih nih cu an theitlai cu ulhmi ah nan rel hna lai; nannih caah kum thum chung ulhmi ah rel a si lai; ei hrimhrim lo awk a si lai. 24Cun a kum linak ah an theitlai vialte cu Bawipa thangṭhat pekchanhnak caah thleidan an si lai. 25Sihmanhsehlaw a kum nganak ah cun an theitlai cu nan ei hna lai, nannih caah tam chin in an tlai nakhnga: keimah cu Bawipa nan Pathian ka si.

26“Zei sa hmanh a chung i a thi he nan ei lai lo. Kut ṭial zoh siseh, eih siseh, nan tuah lai lo. * 27Nan bep sam nan i met lai lo, nan khahmul zong a par nan riam lai lo. * 28Mithi hna ruangah nan taksa zeihmanh i at hlah u, nan pum cungah a ṭial zong i ṭial fawn hlah u: keimah cu Bawipa ka si.

29“Na fanu cu hlawhhlangnu ah ser in thurter hlah, ram cu hlawhhlangnu sinak chungah, a tla lai i ṭhat lonak a khat sual lai. * 30Ka sabbath hna cu nan ulh hna lai i ka hmunthiang cu nan upat hna lai: keimah cu Bawipa ka si. *

31“Khuavang le camhthiam kha fukpanh hna hlah u; annih nih nannih kha thurter awkah va kawl hna hlah u: keimah hi Bawipa nan Pathian cu ka si. *

32“Sam parmi hmaiah cun na dir lai i tar a simi hmai cu na upat lai, cun na Pathian cu na ṭih lai: keimah cu Bawipa ka si.

33“Khual pakhatkhat nih nan ram ah an pem hna tikah a cungah ṭhat lonak nan tuah lai lo. * 34Nannih an pemmi hna khual cu nannih lak i nanmah rammi bantuk a si lai i nangmah naa dawt bantukin na dawt lai; zeitintiah nannih zong Izipt ram ah khual nan rak si: kei cu Bawipa nan Pathian ka si.

35“Tahnak ah mi nan hleng lai lo; a saulei tahnak ah siseh, a rih leiah siseh, a tam leiah siseh, nan lih lai lo. * 36A dikmi cuai thlainak, a dikmi cuai lung, a dikmi ephah, a dikmi hin * nan hman lai: keimah cu Bawipa nan Pathian Izipt ram in an chuahtertu hna kha ka si. 37Ka nawlbia vialte le ka phunglam vialte kha nan ulh hna lai i nan tuah hna lai: keimah cu Bawipa ka si.”

⇑

[Remove Footnotes]