Levitikas 22

Pekchanhmi Thil Hna Thiannak

1Cun Bawipa nih Moses a chawnh i, 2“Aaron le a fapale hna kha, keimah sinah Israel mi hna nih an ka pekmi thil thiang cu hrial hna seh, ka min thiang cu an thurhhnawmh nakhnga lo, tiah chim hna; keimah cu Bawipa ka si. 3Annih cu, ‘Nan tefachin tiangin, nan tefa vialte hna lakah ahohmanh nih, Israel mi nih Bawipa sinah an pekmi thil thiang hna cu, thian lonak a ngeih lioah a naih ahcun, cu pa cu ka hmaika in hlonh a si lai; keimah cu Bawipa ka si. 4Aaron tefa a simi lak in ahohmanh mithinghmui a si ah, thilchuak a ngeimi a si ah, a thian hlan lo, thilthiang cu a ei hna lai lo. Mithi he i tawnghnak in a thiang lomi thil zeihmanh siseh, a ci a chuakmipa siseh, a tawngmi paoh le, 5ahohmanh amah a thurter khotu a lawnmi thil siseh, a sinin thian lonak aa lak khawh dingmipa, cu pa thian lonak cu zei bantuk hmanh si ai kun, a tawngmi paoh cu — 6cu bantuk a tawngmi cu zanlei tiang thianglo a si lai i a pum cu ti in aa kholh lo ahcun thil thiang cu a ei hna lai lo. 7Ni a tlak tik in a thiang lai i cu hnuah cun thil thiang cu a ei hna lai, mah cu hna cu a rawl ca an si. 8I thurter awkah amah tein a thimi siseh, sa nih a sehmi siseh, a ei lai lo; keimah cu Bawipa ka si.’ 9Biakinn cu an thurhhnawmh ruangah sual an huah i a chungah an thih sual nakhnga lo, ka nawlbia cu an ulh lai, keimah cu Bawipa ka si, keimah nih ka thianter hna.

10“A lengmi nih thil thiang cu a ei lai lo. Tlangbawi sin i khua a sami nih siseh, kuli a ṭuanmi nih siseh, thil thiang cu an ei lai lo; 11sihmanhsehlaw tlangbawi nih tangka in a thil si awk caah sal a cawk ahcun, cu sal nih cun a ei lai; cun a inn chungah a chuakmi hna nih cun a rawl cu an ei lai. 12Tlangbawi fanu cu a lengmi he an i ṭhit ahcun thil thiang pekchanhmi kha a ei hna lai lo. 13Sihmanhsehlaw tlangbawi fanu cu nuhmei maw, makmi maw a si i fa a ngeih lo i a ngaknut lio bantukin a pa inn ah a kir ṭhan ahcun, a pa rawl cu a ei ve ko lai; sihmanhsehlaw a lengmi nih cun ahohmanh nih an ei lai lo. 14Cun pakhatkhat nih thil thiang cu hngalh loin a ei sual ahcun, a man cheu nga cheu khat cu a chawnh lai i thil thiang cu tlangbawi sinah cun a pek lai. 15Tlangbawi hna nih Israel mi hna thil thiang, Bawipa sinah an pekchanhmi cu an thurhhnawmh hna lai lo, 16cu bantuk tuahnak in ṭhat lonak le mawhnak an thil thiang an ei hna thawngin an cungah i tlunhter hna hlah seh: zeitintiah keimah cu a thiantertu hna Bawipa cu ka si,” tiah a ti.

17Cun Bawipa nih Moses cu a chawnh i, 18“Aaron le a fapa hna le Israel mi vialte kha chim hna. Israel innchungkhar mi ahohmanh nih siseh, Israel mi hna sin i a pemmi nih si hna seh, a pekchanhnak a tuah tikah, biakamnak a tuahmi ca i a pekmi siseh, Bawipa sinah khangh thawinak bantukin pekmi mah lungthote pekchanhnak siseh, 19cohlan awk ahcun cawtum hna lakin maw, tuu hna lakin maw, meheh hna lakin maw, a pa dotla nan thawi lai. 20Dotlak lonak a ngeimi thil zeipaoh nan pechan lai lo, zeitintiah an cohlanpiak hna lai lo. * 21Cun ahohmanh nih, daihnak pekchanhmi thil thawinak Bawipa sinah a pekchanh tikah, biakamnak tlinternak ca i a si ah siseh, mah lungthote i pekchanhnak ca i a si ah siseh, cawrun chungin a si ah, tuurun chungin a si ah, cohlan awk dingah cun a tlingmi a si lai; a cungah dotlak lonak zeihmanh a um lai lo. 22A mit a cawmi maw, a ruh a kiakmi maw, a kut ke a rawkmi maw, hma a ngeimi maw, thakpherh a ngeimi maw, a pharmi maw, cu bantuk saṭil hna cu Bawipa nan pechan lai lo, mei in biakṭheng cung i Bawipa sin i thawinak ca zongah nan hmang hna lai lo. 23Cawtum siseh, tuufa siseh, a kut ke pakhatkhat a sau tuk maw a tawi tuk a ngeimi cu mah lung tho pekchanhmi ahcun nan pek ko lai, sihmanhsehlaw biakamnak thawinak caah cun cohlan khawh a si lai lo. 24Zei saram hmanh, a til a kek, a kuai, a tlek a bauhmi paoh cu Bawipa nan pechan lai lo, nan ram chung zongah nan thawi lai lo; 25cun cu bantuk saram ramdangmi sinin nan hmuhmi cu nan Pathian rawl caah nan pechan fawn lai lo. An kiahkuainak thawngin an cungah dotlak lonak a um caah, an cohlanpiak hna lai lo,” tiah a ti.

26Cun Bawipa nih Moses cu a chawnh i, 27“Cawtum siseh, tuu siseh, meheh siseh, a chuah tikah a pi sinah ni sarih a um lai; cun a ni riat ni thawk cun Bawipa sin i mei in pekchanh awk caah cohlan a si lai. 28A pi cu caw a si zongah, tuu a si zongah, a pi he a fa he ni khatte ah an pahnih in nan that hna lai lo. 29Lawmhnak thawinak Bawipa sinah nan pekchanh tikah nannih cu cohlan nan si nakhnga dingin nan thawi lai. 30Cu ni theng ah cun ei dih a si lai, zinglei tiangin a zeihmanh nan tanter lai lo; keimah cu Bawipa ka si.

31“Cu bangin ka nawlbia cu nan ulh hna lai i nan tuah hna lai: keimah cu Bawipa ka si. 32Nannih nih ka min thiang kha nan thurhhnawmh lai lo, sihmanhsehlaw Israel mi hna lakah keimah cu thianter ka si lai; keimah cu nannih an thiantertu hna, 33nan Pathian si awkah Izipt ram in an chuahpitu hna Bawipa kha ka si: keimah cu Bawipa ka si,” tiah a ti.

⇑

[Remove Footnotes]