MALAKHI

Malachi

Biahmaiṭhi

Malakhi cauk hi Biakinn remh ṭhan a si hnu, B.C. 400 hrawng i a chuakmi a si Profet Malakhi nih biapi bik in a chimmi cu tlangbawi le mizapi nih khan Pathian sin i bia nan i kammi kha tharchuah ṭhan u, ti hi a si. Hi nih hin Pathian an biaknak ah an dorzaw ti kha a langhter. Tlangbawi le mizapi hna nih khan Pathian pek awk a simi raithawinak kha Pathian an pe lo i a duhning in an nung lo. Cucaah Bawipa cu a ra lai i a mi cu bia a ceih hna lai i a thianh hna lai i hmaiah a lamkal kha a thlah lai i amah nih cun a lam kha a rak remhpiak lai i a biakamnak kha a rak thanh chung lai.

Tlangpi Hna
Israel sualnak 1.12.16
Pathian biaceihnak le zawnruahnak 2.174.6

Malakhi 1

1 Bawipa nih Malakhi * sinin Israel mi sinah a chimmi bia:

Biaknak Lei Ṭumchuknak

2“Nannih cu kan dawt hna,” tiah Bawipa nih a ti. Nannih nih nan i thawh i, “Kannih cu na kan dawt maw?” nan ti. * * 3Esau cu Jakob unau a si lo maw? tiah Bawipa nih a ti. Jakob cu ka dawt, sihmanhsehlaw Esau cu ka huat, a tlang ram hna cu pakpalawng ah ka ser hna i a hringsortu inn cu ramlak cenghngia tlonnak ah ka canter, a ti. 4Edom nih, “Kannih cu kan rawk cang, a rawkmi kan inn cu sa ṭhan hna u sih,” tiah a ti tikah, Bawipa bia cu hihi an si: “An sak ṭhan hna ahcun ka ṭheh ṭhan hna lai. Annih cu ṭhat lonak a tamnak ram, Bawipa nih zungzal in chiat a serhmi miphun,” ti an si lai. 5Nanmah hrimhrim nih nan mit in nan hmuh lai i nanmah hrimhrim nih, “ Bawipa lianhngannak nih Israel ram leng kha a phanh,” nan ti lai.

6Fa nih a pa kha a upat i sal nih a bawi kha a ṭih. Pa ka si ahcun khuazei ah dah nan ka upatnak cu a si kun? Bawi ka si ahcun khuazei ah dah nan ka ṭihnak cu a si kun? Cuticun ralkapbu Bawipa nih ka min zei i a rel lomi nannih tlangbawi cu kan ti hna. 7Nannih nih nan i thawh i, “Zeitindah na min cu zeirello in kan um?” nan ti. Zeirello i nan um cu ka biakṭheng cung i a thurhnawmmi rawl nan ka pekchanh hi a si. Nannih nih nan i thawh i, “Zeitindah kan in thurhnawmh,” nan ti. Nan ka thurhhnawmhnak cu hitihin a si: Nan i thawh i, Bawipa cabuai cu zohhnawmh si ko seh, 8a mit a cawmi saṭil kha kan pekchanh ahcun zeihmanh a poi lai lo, a ke a beimi saṭil si hna seh, a zawmi si hna seh, kan pekchanh hna ahcun zeihmanh a poi lai lo tiin nan ruah caah hin nan ka thurhhnawmh cu a si. Cu bantuk laksawng cu uktu bawi kha va pe tuah hna ngat u. An cohlang hna in mithmai ṭha an pe hna hnga maw, tiah ralkapbu Bawipa nih a chim. *

9Nannih tlangbawi hna mithmai ṭha kan pe tuah tiah Bawipa cu hal hnek u, nan thlacamnak cu an let hna lai lo; nanmah palh a si ko lai. 10Nannih pakhatkhat nih innkhar ngan kha pit tein rak khar u law ka biakṭheng cungah khan ceu kha lut lo lawlaw in rak um seh law a ṭha deuh suaumau hnga. Nan cungah lunglawmhnak ka ngei lo, nan sinin pekchanhmi thil zeihmanh ka cohlang lai lo, tiah ralkapbu Bawipa nih a ti. 11Nichuahlei deng in nitlaklei deng tiang, ka min cu miphun hna sinah a lianngan ko. Khua zakip ah rimhmuimi raithawinak le a thiangmi laksawng kha ka min in mi nih an pekchanh hna i ka min cu miphun hna lakah a lianngan ko, tiah ralkapbu Bawipa nih a ti. 12Sihmanhsehlaw nannih nih cun Bawipa cabuai cu thurhhnawmh khawh a si ko, kanmah i zei i kan rel lomi rawl cu a cungah hun khawh a si ko, ti i nan ruahnak thawng hin ka min cu nan thurhhnawmh. 13Nan hnimh i, ‘A kan nor’ nan ti, tiah ralkapbu Bawipa nih a ti. Nannih nih nan pekchanh awk saṭil caah khan a ke a bulmi hna, a beimi hna, zawtnak a ngeimi hna, nan rak put i cucu kan cohlang hna hnga maw, tiah Bawipa nih a ti. 14‘A tuurun chungah a ṭhami tuukawng a ngei ko nain a biakam tlinternak caah Bawipa sinah hlennak in do a tla lomi saṭil a pechanmi cu a cungah chiat tlung seh! Keimah cu a liannganmi Siangpahrang ka si i ka min cu miphun hna nih an ṭih, tiah ralkapbu Bawipa nih a ti.

⇑

[Remove Footnotes]