NEHEMIAH

Nehemiah

Biahmaiṭhi

Nehemiah cauk hi ṭhen thum ah ṭhen khawh a si:

1. Nehemiah nih a hrui hna i Jerusalem khua kulhnak kha an remh. Nehemiah cu Persia siangpahrang nih a thlahmi a si.

2. Ezra nih khan Pathian Nawlbia kha mizapi cu a relpiak hna i an sualnak kha an i phuang i an i ngaihchih.

3. Nehemiah cu Judah ram mangki a si.

Nehemiah hi Pathian aa bochan ngaingaimi a si i Pathian sinah hin thla a cam zungzalmi a si.

Tlangpi Hna
Nehemiah cu Jerusalem ah a kir ṭhan 1.12.20
Jerusalem vampang an remh ṭhan hna 3.17.73
Phungbia kha an rel i biakamnak an tharchuah 8.110.39
Nehemiah rianṭuannak a dangdang hna 11.113.31

Nehemiah 1

Jerusalem Caah Nehemiah Thlacamnak

1Hakaliah fapa Nehemiah bia.

Kum kulnak kum, Khislev thla i Susa khuapi chungah ka umlioah, 2ka unau Hanani cu Judah ram chung mi cheukhat he an ra; cun a nung rihmi Judah mi salchuak hna kong le Jerusalem khua kong kha ka hal hna. 3Cun annih nih an ka thawh i, “Saltannak chungin a luatmi khika ram i a nung rihmi hna cu harnak nganpi chung le ningzahnak chungah an um ko; Jerusalem kulhnak vampang hna cu an cim dih i a kutka hna cu mei nih a hrawh dih hna,” an ti.

4Hi bia cu ka theih tikah ka ṭhu i ka ṭap i saupi ngaihchia in ka um i vancung Pathian hmaiah khan rawl ul lengmang le thlacam lengmang in ka um. 5Cun kaa thawh i, “Maw Bawipa, vancung Pathian, nangmah an dawtu le na nawlbia a ulmi hna cung i biakamnak le a fekmi na dawtnak a hmunhtertu a lian a ngan i ṭih a nungmi Pathian, 6Israel mi hna nih nangmah cungah kan sual cang i cu sualnak cu phuang in na sal Israel mi hna caah chun zan in nangmah hmaiah thla ka cammi hi theih awkah na hna in ka ngaihpiak law, na mit in ka hmuhpiak ko sawh. Asi, keimah le ka pa innchungkhar hna cu kan sual cang. 7Nangmah cungah ṭhat lonak kan tuah i na sal Moses sinah na pekmi na nawlbia le phungbia le phunglam hna kha kan zul hna lo. 8Na sal Moses sinah nawl na pek i, ‘Zumhawktlak loin nan um ahcun miphun hna lakah kan ṭhek hna lai; * 9sihmanhsehlaw ka sinah nan kir i ka nawlbia kha nan zulh hna i nan tuah hna ahcun, nan mi aa ṭhekmi hna cu a hlatnak bik vanhramdeng khi phan hna hmanh seh law, khika khan ka pumh hna lai i ka min chiahnak ah ka thim cangmi hmun ah cun ka pumh hna lai,’ ti in na timi kha philh hin hlah. * 10Annih cu nangmah nih na ṭhawnnak a nganmi le a ṭhawngmi na kut in na tlanhmi hna na sal le na mi an si. 11Maw Bawipa na sal ka thlacamnak hi ka ngaihpiak ko sawh; cun na sal hi nihin ah ka hlawh ka tlinter ko law hi mipa hmaiah hin zaangfahnak ka pe ko,” tiah ka ti.

Cu lioah cun kei cu siangpahrang hrai putu ka rak si.

⇑

[Remove Footnotes]