NAMBAR

Numbers

Biahmaiṭhi

Nambar cauk nih hin, Israel mi Sinai Tlang in an i thawh i Pathian nih a kamhmi hna ram, a nichuahlei ramri an phak tiang, kum sawm li chung hrawng an vahnak kong kha a chim. A cauk min hi, Moses nih Sinai Tlang in an i thawh hlanah milu relnak a tuahmi le cu hnu chan khat hnuah Jordan nichuahlei Moab ram i milu relnak an tuah ṭhannak kong chuankhan in bunhmi a si. Hi milu relnak pahnih hna karlak ah hin Israel mi cu Kanaan ram thlanglei kam i a ummi Kadesh Barnea kha an hung phan i cuka cun luh an i tim, sihmanhsehlaw an lut kho lo. Cuka hrawng i kum tampi an um hnuah Jordan Tiva nichuahlei kap khan, kamhmi ram cu an hun fuh i cuka ah cun a cheu cu khua an sa colh i a cheu nih cuka cun Kanaan ram chung luh awk cu an i tim.

Nambar cauk chungah hin harnak an ton tikah an hnabei a dong lengmang ve tawn i Pathian le Pathian nih a thimmi Moses bia a ngai duh tawn lomi hna kong kha kan hmuh. Asinain Pathian tu cu, a mi hna kha cu bantukin zumhawktlak lo le nawl ngai loin um tawn hna hmanh seh law zumhawktlak a si zungzal i an zawn a ruattu a si zungzal ti kha a lang. Cun Moses zong kha voi khat voi hnih cu thin tawi in um tawn hmanh seh law Pathian a ṭanhnak le a miphun a dawt hnanak ah khan cun a fek zungzalmi a si.

Tlangpi Hna
Israel mi cu Sinai tlang khan ṭhial an i tim 1.19.23
   Milurelnak pakhatnak 1.14.49
   Phunglam hna le zulh awk dangdang 5.18.26
   Lanhtak pahnihnak 9.1-23
Sinai tlang in Moab ram tiang 10.121.35
Moab ram chung thil cangmi hna 22.132.42
Izipt in Moab tiang an kalnak a tawinak in 33.1-49
Jordan an tan hlanah chimchungnak 33.5036.13

Nambar 1

Sinai Ah Israel Mi An Rel Hna

1 Bawipa nih Moses cu Sinai ramlak ah, tonnak thlam chungah cun, Izipt ram in an chuah hnu kum hnihnak kum thla hnihnak thla ni khatnak ni ah cun, a chawnh i hitin a ti: * 2“Israel mibu vialte hna cu an milu rel tuah hna, a chungchung in, a phunphun in, an min zat ningin, pa paohpaoh, pakhat hnu pakhat; 3kum kul ri in a cunglei, Israel mi chung i phawnam tlai kho vialte, a phu a phu in Aaron le nangmah nih nan rel hna lai. 4Cun nan sinah phun khat chungin mi pakhat cio an um lai i cu hna cu an chung lak i a lu cio an si lai. 5Mah hna hi nanmah an umpitu hna ding an min cu a si. Reuben phun chungin, Shedeur fapa Elizur; 6Simeon phun chungin, Zurishaddai fapa Shelumiel; 7Judah phun chungin Amminadab fapa Nahshon; 8Issakhar phun chungin, Zuar fapa Nethanel; 9Zebulun phun chungin, Helon fapa Eliab; 10Josef fapa hna chungin, Efraim chungin Ammihud fapa Elishama, cun Manasseh chungin Pedahzur fapa Gamaliel; 11Benjamin phun chungin Gideoni fapa Abidan; 12Dan phun chungin, Ammishaddai fapa Ahiezer: 13Asher phun chungin Okhran fapa Pagiel; 14Gad phun chungin, Deuel fapa Eliasaf; 15Naftali phun chungin Enan fapa Ahira.” 16Mah hna hi mibu chungin thimmi, an thawhkehnak phun hruaitu hna. Israel mi chung i miphun hna an lu cu an si.

17Moses le Aaron nih minthlak a simi hna hi an lak hna i 18 Bawipa nih Moses cu nawl a pek bangin, thla hnihnak thla ni khatnak ni ah cun, a chungchung in, a phunphun in, kum kul ri in a cunglei an min zat ningin, pakhat hnu pakhat in, min aa thlami hna cu, Israel mibu cu a ning piin an pumh hna. 19Cu bangin Sinai ramlak ah a rel hna.

20Israel fapa upa bik Reuben mi hna cu, an tefa hna, an chungchung in, an phunphun in, an min zat ningin, pakhat hnu pakhat in, kum kul ri in a cunglei pa paohpaoh, phawnam tlai kho vialte: 21Reuben phun mi cu sang li le thong ruk le za nga an si.

22Simeon mi hna cu, an tefa hna, an chungchung in, an phunphun in, min thlakmi hna cu, an min zat ningin, pakhat hnu pakhat in, kum kul ri in a cunglei pa paohpaoh, phawnam tlai kho vialte: 23Simeon phun mi cu sang nga thong kua le za thum an si.

24Gad mi hna cu, an tefa hna, an chungchung in an phunphun in, an min zat ningin, kum kul ri in a cunglei paohpaoh, phawnam tlai kho vialte: 25Gad phun mi cu sang li, thong nga, za ruk le sawm nga an si.

26Judah mi hna cu, an tefa hna, an chungchung in, an phunphun in, an min zat ningin, kum kul ri in a cunglei paohpaoh, phawnam tlai kho vialte: 27Judah phun mi cu sang sarih, thong li le za ruk an si.

28Issakhar mi hna cu, an tefa hna, an chungchung in, an phunphun in, an min zat ningin, kum kul ri in a cunglei paohpaoh, phawnam tlai kho vialte: 29Issakhar phun mi cu sang nga, thong li le za li an si.

30Zebulun mi hna cu, an tefa hna, an chungchung in, an phunphun in, an min zat ning in, kum kul ri in a cunglei paohpaoh, phawnam tlai kho vialte: 31Zebulun phun mi cu sang nga, thong sarih le za li an si.

32Josef mi hna chungin Efraim mi hna cu, an tefa hna, an chungchung in, an phunphun in, an min zat ningin, kum kul ri in a cunglei paohpaoh, phawnam tlai kho vialte: 33Efraim phun mi cu sang li le za nga an si.

34Manasseh mi hna cu, an tefa hna, an chungchung in, an phunphun in, an min zat ningin, kum kul ri in a cunglei paohpaoh, phawnam tlai kho vialte: 35Manasseh phun mi cu sang thum, thong hnih le za hnih an si.

36Benjamin mi hna cu, an tefa hna, an chungchung in, an phunphun in, an min zat ningin, kum kul ri in a cunglei paohpaoh, phawnam tlai kho vialte: 37Benjamin phun mi cu sang thum, thong nga le za li an si.

38Dan mi hna cu, an tefa hna, an chungchung in, an phunphun in, an min zat ning in, kum kul ri in a cunglei paohpaoh, phawnam tlai kho vialte: 39Dan phun mi cu sang ruk, thong hnih le za sarih an si.

40Asher mi hna cu, an tefa hna, an chungchung in, an phunphun in, an min zat ningin, kum kul ri in a cunglei paohpaoh, phawnam tlai kho vialte: 41Asher phun mi cu sang li, thong khat le za nga an si.

42Naftali mi hna cu, an tefa hna, an chungchung in, an phunphun in, an min zat ningin, kum kul ri in a cunglei paohpaoh, phawnam tlai kho vialte: 43Naftali phun mi cu sang nga, thong thum le za li an si.

44Mah hna hi relmi cu an si, Moses le Aaron nih Israel mi hruitu hleihnih, anmah le an phun cio airawl hna he i bawmh in an relmi hna cu. 45Cucaah Israel mi cu an ning piin, an phunphun in, kum kul ri in a cunglei paohpaoh, phawnam tlai kho vialte: — 46an ning piin sing ruk, thong thum, za nga le sawm nga an si.

Levi Mi Rian Peknak

47Sihmanhsehlaw Levi mi hna cu an chuahkehnak phun in annih sinah relchih an si lo. 48Zeicahtiah, Bawipa nih Moses sinah, 49“Levi phun lawnglawng hi na rel hna lai lo i annih cu Israel mi hna lakah min relnak na tuah hna lai lo; 50sihmanhsehlaw Levi mi cu hngalhternak puan biakinn le a thilthuam vialte le a chung i a ummi thil vialte zohkhenhtu ah na chiah hna lai; annih nih puan biakinn le a thilthuam vialte an put awk le an zohkhenh awk a si lai i puan biakinn velchum ah cun riah hmun an khuar lai. 51Puan biakinn cu kalpi awk a si tikah Levi mi nih an ṭheh lai i puan biakinn cu bunh awk a si tikah Levi mi nih an bunh lai; midang ahohmanh nih a ra naih ahcun, amah cu thah a si lai. 52Israel mi hna nih an thlam cu an bu ning cio ah an bunh hna lai, mi kip nih mah le bu cio ah, cun mah le hmelchunhnak cio ah; 53sihmanhsehlaw Levi mi hna cu hngalhternak puan biakinn velchum ah riahhmun an khuar lai, Israel mi an bu cungah thinhunnak a um nakhnga lo; cun Levi mi nih hngalhternak puan biakinn cu an zohkhenh lai,” a ti. 54Cu bangin Israel mi nih an tuah; Bawipa nih Moses nawl a pekmi dihlak bang khan an tuah.

⇑

[Remove Footnotes]