Nambar 14

Israel Mi Nih Bawipa An Doh

1Cun aa pummi vialte hna cu fak piin an ṭap i cu zan cu mi hna cu an ṭap dih. 2Cun Israel mi vialte nih Moses le Aaron cu an zaihnawh hna; an bu ningin annih sinah, “Izipt ram ah khan rak thi u si law, a ṭha deuh hnga! Asiloah ramcar chungah hin hei thi dih ko u si law, a ṭha deuh hnga! 3Zeicahdah Bawipa nih hi ram chungah hin vainam in thih awkah a kan luhpi hnga? Kan nupile hna le kan ngakchia hna hi tlaihkhih awk men an si lai; Izipt ah kir ṭhan u si law, kan caah a ṭha deuh hnga lo maw?” tiah an ti.

4Cun pakhat le pakhat cu, “Hruaitu pakhat i thim u si law, Izipt ah kir ṭhan u sih,” tiah an i ti. 5Cun Moses le Aaron cu Israel mibu aa pummi hmaiah cun an bawk. 6Cun Nun fapa Joshua le Jefunneh fapa Kaleb, ram a hung ngia thlaitu hna lak i aa tel vemi hna nih khan an puan an thleh i, 7Israel mibu ningpi sinah khan, “Ngiatthlai awkah kan hung ṭolmi ram cu ram ṭha hringhran a si ko. 8 Bawipa cu kan cungah aa lawmh ahcun hi ram chungah cun a kan luhpi lai i a kan pek lai, cawhnuk le khuaihliti in a luangmi ram a si ko. 9 Bawipa cu a doh bel do sawh hlah u; cun cu rammi cu ṭih hna hlah u, zeitintiah kan caah rawl pei an si ko cu; annih an himnak cu an sinin ṭhial a si cang, Bawipa cu kanmah he pei a um cu, ṭih hna hlah u,” tiah an ti. * 10Sihmanhsehlaw an bu ning piin, lung in cheh an zalh hna.

Cun Bawipa sunparnak cu tonnak thlam ah khan Israel mi vialte sinah a lang. 11 Bawipa nih Moses cu, “Mah mi hna nih hin zei can dah an ka zawmhtaih lai? Cun zei can dah zum loin an ka um lai, anmah lak i hmelchunhnak mah vialte ka tuah ko ṭung? 12Rai in ka hrem hna lai i ka hlawt hna lai, nangmah chung hin annih nak i a ngan deuh le a ṭhawng deuh miphun ka ser lai,” tiah a ti.

13Sihmanhsehlaw Moses nih Bawipa kha a chawnh i, “Cu ti a si ahcun, Izipt mi nih an theih lai i hi ram i a ummi hi an chimh hna lai, * 14zeitintiah hi miphun hi annih lakin na chuahpimi an si. Annih nih, maw Bawipa, nang cu hi hna lakah na um kha an theih; zeitintiah maw Bawipa, nang cu hmaitonh tein an in hmuh i na minmei nih an cungah a dir i nangmah nih an hmaiah na kal, chun ah minmei tung in, cun zan ah mei alh tung in. 15Cun mah mi hna hi mi pakhat men bantukin na thah hna ah cun, na minthannak a rak theimi miphun hna nih khan, 16 Bawipa nih hi mi hna hi chiatser tein a kamhmi hna ram ah khan a luhpi khawh hna lo caah ramcar chungah a thah hna,’ an ti lai. 17,18 Cucaah Bawipa, nangmah nih, ‘ Bawipa cu a thin a fual i a fekmi dawtnak tampi a ngei, ṭhat lonak le phung buarnak cu a ngaihthiam khawh, sihmanhsehlaw a sualmi cu zei ti hmanh in a luatter men lai lo; an pale ṭhat lonak cu an fale cungah a tlunter lai, chan thum chan li tiangin,’ ti i bia na rak kamnak a lianhngan tluk khan na ṭhawnnak cu lianngan ko seh tiah kan nawl. * 19A fekmi na dawtnak a ngan rup le hi mi hna cu Izipt ram in atu tiang na ngaihthiam hna bangin, hi mi hna an ṭhat lonak hi ngaithiam ko hna,” tiah a ti.

Israel Mi Kha Dan A Tat Hna

(Deu 1.34-40)

20Cun Bawipa nih, “Nangmah bia bangin ka ngaihthiam hna, 21sihmanhsehlaw biangai tein, keimah ka nun le vawlei cung vialte Bawipa sunparnak in a khah dih lai bantukin, * 22ahohmanh, Izipt ram chung le ramcar chung i ka tuahmi ka sunparnak le ka hmelchunhnak a hmu i, sihmanhsehlaw hi voi hra tiang a ka hneksak i ka aw a ngai lomi cu, 23an pupa sin i kan pek hna lai ti i chiat ka sermi ram kha an hmu lai lo, ahohmanh a ka zawmtaimi nih cun an hmu lai lo. 24Sihmanhsehlaw ka sal Kaleb cu lungthin dang a ngei i tling tein a ka zulh caah, a va kalnak ram ah khan ka luhpi lai i a tefa hna nih an co lai. * 25Kha, Amalek mi hna le Kanaan mi hna cu nelrawn chungah an um caah thaizing cu i mer u law, Rili Sen lam lei in ramcar ah kal tuah u,” tiah a ti.

26Cun Bawipa nih Moses le Aaron sinah hitin a chim i, 27“Zei can dah hi a ṭha lomi bu nih hin an ka zaihnawh lai? Israel mi an phunzainak, keimah cung i an phunzainak cu ka theih cang. 28Annih sinah hi bangin va chim tuah, Bawipa nih, ‘Ka nun bangin, keimah theih hngan i nan chimmi cu nan cungah ka tuah lai: 29Nan ruak hna cu ramcar chungah an um lai; cun nannih lak i rel ciami vialte, kum kul ri in a cunglei keimah cungah a phunzaimi vialte kha, * 30Jefunneh fapa Kaleb le Nun fapa Joshua dah ti lo cu, kan umter hna lai ti i chiat ka sermi ram ah khan pakhat hmanh nan lut lai lo. 31Sihmanhsehlaw nan ngakchia hna, annih cu tlaih khih awk men an si lai, nan timi hna kha ka luhpi hna lai i nannih nih zei i nan rel lomi ram kha an umhnawh lai. 32Sihmanhsehlaw nannih tu cu nan ruak cu hi ramcar ah hin an um lai. 33Cun nan fale hna cu mah ramcar chungah hin kum sawm li tuukhal an si lai i nan ruak a hmanung bik cu hi ramcar chung i a ciam dih hlantiang zumhawktlak lo nan si caah khan sifah an in lai. * 34Ram kha nan hung ngiatthlai ni zat khan, ni sawm li, ni khat caah kum khat, nan ṭhat lonak kha nan in lai, kum sawm li, cun ka lunglawmh lonak kha zeidah a lawh ti kha nan hngalh lai,’ a ti. 35Keimah, Bawipa, nih ka chim cang; keimah doh awkah aa pummi, hi miṭhalo hna hi an dihlak cungah mah hihi ka tuah hrimhrim lai: hi ramcar chungah hin an donghnak taktak cu an phan lai i khika ah khan an thi lai,” a ti.

Ram Ngiatu Pahra An Thi

36Cun Moses nih ram kha hung ngiatthlai awkah a thlah i a hung kir ṭhan i mi zapi vialte kha ram kong thawngchia an run phorhnak thawngin a cungah a zaitermi hna, 37ram kong thawng ṭhalo a run phormi hna cu, Bawipa hmaiah rai in an thi. 38Sihmanhsehlaw Nun fapa Joshua le Jefunneh fapa Kaleb cu, ram ngiatthlai awkah a hung kalmi hna lakah khan, a nung in an tang.

Hormah Ah An Sung

(Deu 1.41-46)

39Cun Moses nih mah bia hna hi Israel mi vialte kha a chimh hna i an ngaih a chia ngaingai. 40Cun zingka tein an tho i tlangram a sannak ah an kai i, “Zohhmanh, mahka ah hin kan um hi, Bawipa biakammi hmun ah cun kan hung kal lai; zeitintiah kan sual cang,” tiah an ti. 41Sihmanhsehlaw Moses nih, “Zeicaahdah atu ah Bawipa nawlbia kha nan buar, zeitintiah mah cucu santlai ding a si ṭung lo? 42Hung kal hlah u, nan ral nih a thah lam an in thah sual hna lai, zeitintiah Bawipa cu nan sinah a um lo. 43Zeitintiah khika ah Amalek mi le Kanaan mi hna cu nan hmaiah an um i vainam in nan tlu lai. Bawipa cu nan kirtak cang caah Bawipa nih nan sinah a um lai lo,” tiah a ti. 44Sihmanhsehlaw Bawipa biakamnak kuang siseh, Moses siseh, riahhmun in an chuak lo nain, tlangram a sannak i hung kai cu an i tim ṭhiamṭhiam. 45Cun cu tlangram i a ummi Amalek mi le Kanaan mi hna nih an rung ṭum i an rung tei hna i an dawi hna, Hormah tiangin.

⇑

[Remove Footnotes]