Nambar 36

Fanu Roconak Kong Phung

1Josef fapa hna phun cung i a ummi Manasseh fapa Makhir i fapa Gilead fapa hna i chungkhar hna chung i phun lu cio a simi hna nih an ra naih i Moses hmai le hruaitu hna, Israel miphun lu cio a simi hna, hmaiah khan an chim; 2annih nih, “ Bawipa nih ka bawipa kha camcawh fung khiah in Israel mi cu ram kha ro ca i pek awkah nawl an pek; cun ka bawipa cu Bawipa nih kan unau Zelofehad ro cu a fanu hna sinah pek awkah nawl an pek. * 3Sihmanhsehlaw Israel miphun chung i hrin dang sinah va an ngeih ahcun, an ro cu kan pupa hna ro chungin lak a si lai i an fonhmi hrin hna ro ah khan chap a si hnga. Cucaah kannih kan ro kan covo chungin mah cucu lak a si hnga. 4Cun Israel mi jubili a phak tikah, an ro cu an fonhmi hna hrin i ro ah chap a si lai i kan pa hrin ro chungin an ro cu lak a si lai,” tiah an ti.

5Cun Moses nih Israel mi cu Bawipa bia ningin nawl a pek hna i, “Josef fapa hna phun hi an dik ko. 6Mah hihi Zelofehad fanu hna kong ah Bawipa nawl pekmi cu a si, ‘A ṭha bik tiah an ruahmi kha va hna seh; sihmanhsehlaw an pa phun innchungkhar chung mi lawnglawng va hna seh. 7Israel mi an ro cu hrin khat in hrin dang ah ṭhial si hlah seh, zeitintiah Israel mi vialte nih an pupa phun ro cio kha an i tlaih lai. 8Israel mi vialte nih an pupa ro cio an ngeih khawh nakhnga, Israel miphun chung i ro a ngeimi fanu paohpaoh cu a pa phun innchungkhar chung mi kha a vat awk a si lai. 9Cucaah hrin khat in hrin dang ah ro zeihmanh ṭhial a si lai lo, zeitintiah Israel miphun vialte nih anmah le an ro cio kha an i tlaih lai,’ ” tiah a ti.

10 Bawipa nih Moses nawl a pek bangin Zelofehad fanu hna nih an tuah; 11Mahlah, Tirzah, Hoglah, Milkah le Noah, Zelofehad fanu hna nih an pa unau le fapa kha an vat hna. 12Josef fapa Manasseh i fapa hna chungkhar kha an vat hna i an ro cu an pa innchungkhar phun chungah khan a tang.

13Mah hihi Bawipa nih Moab nelrawn Jordan tiva kam Jeriko zawn ah khan Moses sinin Israel mi kha a pekmi hna nawlbia le phunglam cu an si.

⇑

[Remove Footnotes]