RUTH

Ruth

Biahmaiṭhi

Ruth tuanbia hi Biaceihtu hna chan chungah khan thlakchih a si ve. Moab minu Ruth cu Israel mipa nih a ṭhit. A va cu a thih tikah Ruth nih cun a va i a nu kha a dawt i fek tein aa tlaih i Israel mi hna Pathian kha fek tein a biak. A donghnak ah cun a va rualchan hna lak i pakhat nih khan a hun ṭhit i cuticun Israel mi siangpahrang ngan bik David pi ah khan a cang.

Biaceihtu hna tuanbia chungah hin Pathian a pialtakmi hna cungah a tlungmi rawhralnak kha kan hmuh. Ruth tuanbia ah hin ramdangmi a si nain Israel Pathian a tlaihchanmi cung i thluachuahnak a tlunnak kong kha kan hmuh.

Tlangpi Hna
Naomi cu Bethlehem ah Ruth he an kir 1.1-22
Ruth nih Boaz a ton 2.13.18
Boaz nih Ruth a ṭhit 4.1-22

Ruth 1

Ruth le Naomi

1Biaceihtu hna nih an rak uk lioah khan ram chungah cun mangṭam a tlung i, Judah ram chung i Bethlehem khuami pakhat cu, a nupi le a fapa pahnih hna he tiah, Moab ram i pem awkah an kal. 2Cu mipa a min cu Elimelek a si, a nupi min cu Naomi a si i a fapa pahnih hna min cu Mahlon le Khilion an si; Judah ram chung Bethlehem khua i Efrath mi an si. Moab ram ah cun an va kal i khika ah an va um. 3Sihmanhsehlaw Naomi va Elimelek cu a thi i amah le a fapa pahnih cu a roh hna. 4Cun Moab minu kha nupi ah an ṭhit hna; pakhat cu a min ah Orpah a si i a dang pakhat cu a min ah Ruth a si. Khika ah kum hra tluk an um i, 5Mahlon le Khilion cu an pahnih in an thi i, cucaah Naomi cu a fapa pahnih hna le a va nih khan an roh ai.

6Cun a fapale nupi hna he khan tiah kir ṭhan awkah Moab ram khan aa thawh, zeitintiah Bawipa nih a mi kha a len cang hna i rawl a pek hna ti kha, Moab ram chung khan a theih. 7Cucaah a umnak hmun khan a fapale nupi hna he khan aa thawh i Judah ram i kir ṭhannak lam ah khan an kal. 8Sihmanhsehlaw Naomi nih a fapale nupi pahnih hna kha a thawh hna i, “Va kal cang u, nanmah le nan nu le inn cio ah khan va kir cang u. Mithi hna le keimah cungah nan tuah bantuk hin Bawipa nih nan cungah zaangfahnak tuah ve ko seh. 9Cun nan pahnih in va inn tangah khuasaknak nan ton khawh nakhnga Bawipa nih zaangfahnak in pe ko hna seh!” tiah a ti. Cun a hnamh hna i nguingui thlak in an ṭap. 10Cun annih nih amah cu, “Kan kir lai lo, nangmah sinah na miphun hna sinah kan kir ve ko lai,” an ti. 11Sihmanhsehlaw Naomi nih, “Ka fanule hna, kir ko u, zeicahdah keimah sinah cun nan kal lai? Nan va ding caah ka paw chungah fapa ka ngeih ti ṭung hna lo? 12Va kir ko u, ka fanule hna, va kal ko u, va ngeih awkah ka tar tuk cang. Ruahchannak ka ngei rih tiin tuzan hmanh ah hin va hei ngei in fapa hei ngei hna ning law, 13nannih nih an upat tiang nan hngah hna hnga maw? Va ngei loin maw nan um ko hnga? Si hlah e, ka fanu hna, nanmah caah hin ka ngaih a chia hringhran ko, Bawipa kut cu keimah doh ah cun pei a chuah cang fam cu,” tiah a ti. 14Cun nguingui thlak in an ṭap ṭhan; Orpah nih cun a pi cu a hnamh, sihmanhsehlaw Ruth tu nih cun aa tlaih peng.

15Cun amah nih, “Zohhmanh, na va unau nupi cu amah miphun le a pathian hna sinah a kir cang; nang zong na va unau nupi cu zul in kir ve tuah,” tiah a ti. 16Sihmanhsehlaw Ruth nih, “Nangmah he i ṭhen awk le nangmah zul lo i kir ṭhan awkah ka lem len hlah; zeicahtiah na kalnak ah ka kal ve lai i na riahnak ah ka riak ve lai; na miphun cu ka miphun an si ve lai i na Pathian cu ka Pathian a si ve lai; 17na thihnak ah ka thi ve lai i khika ah cun an ka vui ve ko lai. Pathian nih cu bantukin ka cungah tuah seh law, tam deuh zongin tuah ko seh, thihnak hmanh nih nangmah sinin ka ṭhen ai kun,” tiah a ti. 18Cun Naomi nih amah sinah kal aa tim hrimhrim ti kha a hmuh tikah zeihmanh a chim ti lo.

19Cucaah Bethlehem tiangin an pahnih in an kal. Cun Bethlehem an phak tikah anmah ruangah an khuapi in an i tuai ur i nu hna nih cun, “Mah hihi Naomi kha a si maw?” tiah an ti. 20Cun anih nih annih cu, “Naomi ka ti hlah u, Mara ka ti u, zeicahtiah Lianngan Bik nih khaa ngaingai in ka cungah a tuah cang. 21Khatte in ka rak kal i Bawipa nih kutro in a ka kirpi ṭhan. Bawipa nih a ka hrem i Lianngan Bik nih ka cungah harnak a tlunter tikah hin zeicahdah Naomi nan ka ti?” tiah a ti.

22Cu bantukin Naomi cu, Moab ram in a kirmi Moab minu Ruth, a fapa nupi he khan a ra kir. Cun annih cu barli ṭuan domh ah khin Bethlehem khua an phan.

⇑

[Remove Footnotes]