Ruth 3

Phuhri Ah Ruth le Boaz

1Cun a pi Naomi nih cun amah cu a thawh i, “Ka fanu, nangmah ca i a ṭhat nakhnga, khuasaknak kawlpiak loin maw kan um hnga? 2A ngaknu pawl he na va umnak Boaz kha kan rualchan a si lo maw? Zohhmanh, tuzan ah phuhri ah barli a zap lai. 3Cucaah i kholh law, sathau i thuh law, na hnipuan ṭha bik i hruk hna law, phuhri ah cun vung kal tuah; sihmanhsehlaw ei le din a dih hlantiang, mipa sinah cun i hngalhter hlah. 4Sihmanhsehlaw a ih tikah a ihnak kha i ngiat; cun va kal law, a ke kha va hlim law, va it ve; cun amah nih zei tuah awk kha an chimh lai,” tiah a ti. 5Cun anih nih, “Na chimmi paoh cu ka tuah lai,” tiah a leh.

6Cucaah phuhri ah cun a vung kal i a pi nih a chimh bantukte khan a tuah. 7Cun Boaz cu a ei a din dih in a lung aa lawm i rawltlun hram i ih awkah a kal. Cun din tein a ra i a ke cu a hlim i a it ve. 8Cun zanlai ah mipa cu a lau i a khel aa let i, zohhmanh, nu pakhat kha a kehram ah a rak it ko! 9Cun, “Ahodah na si?” tiah a ti i, “Na salnu Ruth ka si; ka rualchan naih na si caah na salnu hi na puan ka zawn tuah,” tiah a ti. 10Cun anih nih, “Ka fanu, Bawipa nih thluachuahnak in pe ko seh; tlangval a sifakmi siseh, a rummi siseh na zulh hna lonak ah hin, a hmasa bik i nak hmanh khan hi a hmanung bik na vel hi na dawhter deuh cang. 11Cun ka fanu, ṭih hlah, ka khuapi hawi vialte nih nangmah cu mi ṭha na si kha an hngalh ko caah na ka halmi vialte cu kan tuahpiak lai. 12Cun keimah cu na rualchan naih ka si taktak, asinain keimah nakin a nai deuhmi pakhat a um rih. * 13Tuzan cu hika ah um ko, thaizing ah amah nih nangmah caah aa naihmi rualchan nih tuah awk kha a tuah duh ahcun, a ṭha ko; tuah ko seh. Sihmanhsehlaw nangmah caah aa naihmi rualchan nih tuah awk kha a tuah duh lo ahcun, khi tikah, keimah nih, Bawipa a nun bangin, nangmah ca i aa naihmi rualchan nih tuah awk cu ka tuah lai. Zinglei tiangin it ko,” tiah a ti.

14Cucaah a kehram ah cun zinglei tiang a it, sihmanhsehlaw ahohmanh fiangfai in i hmuh khawh hlanah khin a tho; cun amah nih, “Phuhri ah minu a ra ti kha ahohmanh theihter lo si seh,” tiah a ti. 15Cun a thawh i, “Naa aihmi na puan kha rak pu law, rak dawn tuah,” tiah a ti. Cucaah a dawnh i barli kha rel ruk a tah i a cungah a khinh; cun khua chungah a lut. 16Cun a pi sin a va phak tikah, “Zeitindah na si, ka fanu?” tiah a rak ti. Cun mipa nih a ca i a tuahmi vialte kha a chimh i, 17“Hi barli rel ruk hi a ka pek i, ‘Na pi sinah kut ro in na kir hrimhrim hnga lo,’ a ka ti,” tiah a ti. 18Cun amah nih, “Zeitindah thil cu a si ti kha na hngalh hlantiang, ka fanu, hngak ko rih, zeicahtiah nihin ah cu thil cu a lim hlantiang mipa cu a um sawhsawh lai lo,” tiah a ti.

⇑

[Remove Footnotes]