Ruth 4

Boaz Nih Ruth A Ṭhit

1Cun Boaz cu hauka ah khan a hung kal i khika ah a ṭhu; cun zohhmanh, Boaz i a chimmi rualchan naih kha a ra. Cucaah Boaz nih, “Ka kawi, ra pial ta rih tuah; hika ah hin ṭhu tuah,” tiah a ti i a ra pial i a ṭhu. 2Cun khua chung upa pahra kha a lak hna i, “Hika ah hin ṭhu tuah u,” a ti hna i an ṭhu. 3Cun rualchan naih sinah cun, “Moab ram in a kir ṭhanmi Naomi nih kan phunhawi Elemelek ta a simi lobung pakhat kha a zuar. 4Cucaah cun, cu kong cu nangmah kha kan chimh awk le hika i a ummi hna le ka mi hna lak i upa hna hmaiah hin caw, kan ti awk a si tiah ka ruah. Na tlanh hnga a si ahcun, tlan tuah; sihmanhsehlaw na tlanh duh lo ahcun, ka hngalh nakhnga ka chim tuah, zeicahtiah nangmah hleiah a tlantu ding an um ti lo i nangmah an changtu cu keimah ka si ko,” tiah a ti. Cun, “Ka tlanh lai,” tiah a ti. 5Cun Boaz nih a thawh i, “Naomi kut in lo cu na cawk ni in mithipa nupi Moab minu Ruth zong kha na cawk a si; mithipa min cu a ro ah na kirter ṭhan nakhnga,” tiah a ti. 6Cun rualchan naihpa nih cun, “Keimah ro tu kha ka hrawh sual lai caah, keimah caah cun ka tlan kho lai lo. Keimah nih ka tlanh khawh lo caah nangmah tu nih tlan khotu ka sinak cu i lak ko,” tiah a ti.

7Cun mah hihi, hlan lioah cun Israel mi lakah tlanhnak le thlennak kongah, phung a rak si; biatlaknak fehternak ah pakhat nih a kedan kha aa phoih i pakhat kha a pek, mah hihi Israel mi nih thil an rak fehterning cu a si. * 8Cucaah rualchan naih nih khan Boaz cu, “Nangmah caah i cawk ko,” a ti tikah khan a kedan aa phoih. 9Cun Boaz nih upa hna le mizapi hna sinah khan, “Nannih cu nihin ni ah hin Naomi kut chungin Elimelek ta a simi vialte le Khilion le Mahlon ta a simi vialte cu ka cawk cang hna, ti hngaltu nan si. 10Mithipa min cu a unau hna sin le a chuahnak hmun hauka in a loh nakhnga lo, mithipa min cu a ro chung i hmunhter awkah, Mahlon nih a rohmi Moab minu Ruth zong kha ka nupi si awkah ka cawk cang; cucu nannih hi nihin ah hin a hngaltu nan si,” tiah a ti. * 11Cun hauka ah a ummi vialte le upa hna nih khan, “Hngaltu kan si. Na inn chungah a ra ding minu cu, Rachel le Leah, Israel innchungkhar a dirhtu pahnih hna bantuk ah khan Bawipa nih ser ko seh. Efrathah ah hin khua awng tong law, Bethlehem ah na min thang ko seh; * 12cun Bawipa nih hi ngaknu sinin an pek laimi tefa hna thawngin, na innchungkhar cu Tamar nih Judah a hrinpiakmi Perez innchungkhar bantuk kha si ko seh,” an ti. *

13Cucaah Boaz nih Ruth cu a lak i a nupi ah a cang; a theihhngalh i Bawipa nih fapawinak a pek i fapa a hrin. 14Cun nu hna nih khan Naomi sinah cun, “Nihin ni i rualchan naih chambau loin an umtertu Bawipa cu thangṭhat si ko seh; amah min cu Israel mi lakah thang ko seh! 15Amah cu nangmah caah nunter ṭhantu le na tar leiah an cawmtu a si lai; zeitintiah na fapa nupi, nangmah an dawtu, nangmah ca i fapa pasarih nakin a ṭha deuhmi nih cun, a hrin cang,” tiah an ti. 16Cun Naomi nih ngakchia cu a lak i a pom i a umh. 17Cun innpa nu pawl nih khan min an sak i, “Naomi caah fapa a chuak,” tiah an ti. Obed tiah min an sak; amah cu David pa Jesse i a pa a si.

18Cun mah hna hi Perez tefa cu an si: Perez cu Hezron pa a si, 19Hezron cu Ram pa a si, Ram cu Amminadab pa a si, 20Amminadab cu Nahshon pa a si, Nahshon cu Salmon pa a si, 21Salmon cu Boaz pa a si, Boaz cu Obed pa a si, 22Obed cu Jesse pa a si i Jesse cu David pa a si.

⇑

[Remove Footnotes]