G'uiˬ sha yawˇ ve Yaˇ hpu hta˰ cuˇ leh k'oˆ maˍ laˇ peuˬ ve awˬ lawn
1G'uiˬ sha lehˬ, aˬ sho-eˬ htaˇ tcuh kaˍ paˍ teˇ hpaˍ hta˰ cuˇ leh, awˬ puˍ awˬ pi teˇ hpaˍ hta˰ laiˉ ceuˬ awˬ hk'aw lo laiˉ pawˆ tawˇ yaw piˇ ve yoˬ.
2Awˬ leh meuˇ ve awˬ nyi awˬ haˉ chi awˬ hk'aw lo, yawˇ ve Yaˇ hpu hta˰ cuˇ leh, yawˇ ngaˬ hui hta˰ tawˇ k'aw˰ yawˇ laˇ peuˬ. Awˬ shinˉ hk'a peu-eˬ hta˰ caˇ shehˍ hpaˇ hpeh˰ tuˬ, Yaˇ hpu oˇ ve hta˰ G'uiˬ sha leuˆ yuˬ taˍ ve yoˬ. G'uiˬ sha yawˇ hta˰cuˇ leh, sha hpa˰ laˬ hpa˰ htaˆ hk'a peu-eˬ hta˰ te hpanˍ taˍ ve yoˬ.
3Yaˇ hpu lehˬ, G'uiˬ sha ve awˬ me˰ awˬ hponˇ hta˰ ba tawˆ la leh, G'uiˬ sha nyi ma taˍ ve hk'a shuˍ shuˍ yawˇ taˍ ve yoˬ. Kanˉ paˆ hk'a biˇ cawˬ ve yawˇ ve tawˇ hkawˇ hta˰ cuˇ leh, hk'a cawˬ ve hk'a peu-eˬ hta˰ yawˇ ha˰ shaˉ leh ga piˇ chehˇ ve yoˬ. Chaw yaˇ ve venˇ bˆ teˇ hpaˍ hta˰ yawˬ tsuhˇ baˬ peuˬ hk'aw˰ nawˉ, mvuh kuiˬ lo chehˇ ve kanˇ paˆ uiˍ shehˍ hpaˇ ve la˰ sha paˉ lo yawˬ mui taˍ ve yoˬ.
Mvuhˇ naw ma tcuh yaˇ hui a˰ kehˉ Yaˇ hpu uiˍ ve
4Mvuhˇ naw ma tcuh yaˇ hui da˰ ve awˬ meh cawˬ ve a˰ kehˉ yawˇ g'a taˍ ve awˬ meh lehˬ da˰ leuˉ ve yoˬ. Chi hk'a shuˍ shuˍ, yawˇ lehˬ yawˇ hui a˰ kehˉ uiˍ leuˉ da˰ leuˉ ve yoˬ.
5Nawˬ lehˬ ngaˬ ve Yaˇ hpu yoˬ. -
Ya˰ nyi ngaˬ nawˬ ve Awˬ pa hpeh˰ la peuˬ.
teh˰ G'uiˬ sha lehˬ mvuhˇ naw ma tcuh yaˇ hk'aˬ ve teˇ g'aˇ hta˰ k'oˆ piˇ jaw le. Maˇ heˆ k'o,
-
Ngaˬ lehˬ yawˬ ve awˬ pa hpeh˰ leh, yawˇ ngaˬ ve yaˇ hpeh˰ tuˬ yoˬ,
teh˰ G'uiˬ sha lehˬ mvuhˇ naw ma tcuh yaˇ hk'aˬ ve teˇ g'aˇ hta˰ k'oˆ piˇ aw le.
6Chi hk'oˆ ka˰, yaˇ uiˍ hta˰ miˬ guiˬ hk'oˆ peu laˇ ve teˇ yanˇ, -
G'uiˬ sha ve mvuhˇ naw ma tcuh yaˇ hk'a peu-eˬ yawˇ hta˰ oˉ k'oˉ pui loˬ,
teh˰ yawˇ k'oˆ piˇ ve yoˬ.
7Mvuhˇ naw ma tcuh yaˇ teˇ hpaˍ awˬ lawn G'uiˬ sha k'oˆ ve, -
Yawˇ ve tcuh yaˇ teˇ hpaˍ hta˰ mvuhˇ haw hk'a shuˍ shuˍ hpeh˰ tcuh leh,
-
yawˇ ve awˬ ceˬ teˇ hpaˍ hta˰ aˬ miˍ ha hk'a shuˍ shuˍ hpeh˰ tcuh ve yoˬ.
teh˰ yawˇ k'oˆ taˍ ve yoˬ.
8Ya˰ hk'aˇ, Yaˇ hpu ve awˬ lawn chi hk'e k'oˆ ve, -
G'uiˬ sha-oˬ, nawˬ ve k'aw jaw co co taiˍ taiˍ yeˬ chehˇ ve yoˬ.
-
Nawˬ ve mvuhˇ miˬ hta˰ hteˇ lehˍ cawˇ lehˍ nawˬ uˉ peunˍ ve yoˬ.
-
9Nawˬ hteˇ ve cawˇ ve hta˰ ha˰ leh, maˇ hteˇ maˇ cawˇ ve hta˰ canˇ ve yoˬ. -
Chi hta˰ pa taw nawˬ ve G'uiˬ sha lehˬ,
-
nawˬ ve awˬ chawˇ teˇ hpaˍ hta˰
-
pfuhˍ piˇ ve a˰ kehˉ, ha lehˬ ve naˍ manˇ nawˬ hta˰ yawˇ pfuhˍ laˇ peuˬ,
teh˰ k'oˆ ve yoˬ.
10Peuˬ leh, -
Jawˇ mawˇ G'uiˬ sha-oˬ, awˬ hkuiˉ puiˍ htaˇ nawˬ miˬ guiˬ hta˰ te hpanˍ taˍ leh,
-
mvuhˇ nawˬ ma hta˰ htawˇ nawˬ ve la˰ sheh te hpanˍ taˍ ve yoˬ.
-
11Oˇ ve teˇ hpaˍ luˬ k'ai tuˬ yoˬ. -
Ya˰ hk'aˇ, nawˬ lehˬ hk'aˬ htaˆ ka˰ yeˬ chehˇ tuˬ yoˬ.
-
Oˇ ve hk'a peu-eˬ veu˰ k'aˇ hk'e piˍ k'ai tuˬ yoˬ.
-
12Aˉ po˰ lonˉ hta˰ lo˰ taˍ ve hk'a shuˍ shuˍ -
oˇ ve teˇ hpaˍ hta˰ nawˬ lo˰ leh k'aw˰ pa piˇ tuˬ yoˬ.
-
Ya˰ hk'aˇ, nawˬ hk'aˬ htaˆ ka˰ hk'a shuˍ shuˍ hpeh˰ leh,
-
nawˬ ve awˬ hk'aw˰ htawˇ maˇ peuˬ maˇ leh,
teh˰ k'oˆ ve yoˬ.
13Oˇ ve awˬ hk'oˆ ka˰, -
Nawˬ ve canˇ paˍ teˇ hpaˍ hta˰
-
nawˬ ve hkui sheh awˬ hawˉ lo ngaˬ taˍ htaˇ hk'a gaˬ,
-
ngaˬ ve la˰ sha paˉ lo mui chehˇ-oˆ,
teh˰ G'uiˬ sha lehˬ mvuhˇ naw ma tcuh yaˇ hk'aˬ ve teˇ g'aˇ hta˰ k'oˆ piˇ jaw le.
14Mvuhˇ naw ma tcuh yaˇ hk'a peu-eˬ lehˬ, htaiˍ hk'aw˰ ve awˬ shinˉ hta˰ g'a caˇ tuˬ ve chaw hui awˬ pon kanˉ te tuˬ, tcuh taˍ ve awˬ ha teˇ hpaˍ hpeh˰ ve maˇ heˆ laˇ.
